تۇركىستان وبلىسىندا ءوندىرىس ورىندارىن اشۋ، ينۆەستيسيا تارتۋعا باسىمدىق بەرىلگەن. وبلىس اكىمدىگىنىڭ قولداۋىمەن اۋدان، قالا اكىمدەرى مەن كاسىپكەرلەر كورشىلەس ەلدەردىڭ كاسىپورىندارىن ارالاپ، ينۆەستورلارمەن كەلىسسوزدەر جۇرگىزىپ، ول كەزدەسۋلەر جەمىسىن بەرۋدە، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ورداباسى اۋدانىندا بوي كوتەرەتىن زاۋىتتا جۇڭگو ەلىنىڭ تاجىريبەسى مەن جوعارى تەحنولوگياسى قولدانىلادى. وبلىس اكىمى جوبانى ۋاقتىلى جۇزەگە اسىرۋ كەرەكتىگىن ايتتى.
– شەتەلدىڭ وزىق تەحنولوگيالارىن مەڭگەرىپ، باتىل شەشىمدەر قابىلداۋ كەرەك. بۇل زاۋىتتىڭ جوسپارلانعان مەرزىمدە اشىلۋى قاداعالانادى. جۇمىس ىستەيمىن، حالىقتى جۇمىسپەن قامتيمىن دەيتىن ينۆەستورلار مەن كاسىپكەرلەرىمىزگە قولداۋ كورسەتىلەدى، – دەگەن دارحان ساتىبالدى جاڭا زاۋىتتىڭ ۋاقىت كاپسۋلاسىن سالۋ راسىمىنە قاتىستى.
«Altyn land» ءجشس-نىڭ ديرەكتورى بەرەكە دۇيسەبەكوۆ جوباعا قولداۋ كورسەتكەن وبلىس، اۋدان باسشىلىعىنا العىسىن ءبىلدىردى. ونىڭ ايتۋىنشا، قىش زاۋىتىندا زاماناۋي تەحنولوگيالر قولدانىلادى. جوبانىڭ جالپى قۇنى – 5 ملرد تەڭگە، كاسىپكەردىڭ جەكە قارجىسى جانە نەسيە ارقىلى جۇزەگە اسىرىلادى.
اتالعان زاۋىتتا جىلىنا 90 ملن. دانا كىرپىش، كۇنىنە 250 مىڭ دانا كىرپىش شىعارىلادى دەپ جوسپارلانىپ وتىر. وسى ارقىلى جەرگىلىكتى نارىقتا يمپورتتى ازايتىپ، وتاندىق ءونىم كولەمىن ارتتىرۋ كوزدەلگەن. قازاقستاندا تەڭدەسى جوق زاۋىتتا جەرگىلىكتى 70 تۇرعىن جۇمىسپەن قامتىلادى. بۇگىندە جوبانىڭ جسق-سى ازىرلەنۋدە، قحر-دان قۇرال-جابدىقتى جەتكىزۋ تۋرالى كەلىسىمشارتقا قول قويىلىپ، جەر تەگىستەۋ، ىرگەتاسىن قۇيۋ جۇمىستارى ءجۇرىپ جاتىر.
