بۇگىن وبلىس اكىمى جانسەيىت تۇيمەبايەۆ ورداباسى  اۋدانىنىڭ اكتيۆىنە  ق ر پرەزيدەنتى اكىمشىلىگى  مەن اۋداندىق ءماسليحاتتىڭ كەلىسىمىمەن  تاعايىندالعان جاڭا اكىمدى تانىستىردى.

وڭتۇستىك قازاقستان وبلىسى اكىمىنىڭ وكىمىمەن ورداباسى اۋدانىنىڭ اكىمى بولىپ راشيد ءۇسىپحان ۇلى قايىپجانوۆ  تاعايىندالدى.

جاڭا باسشىنى تانىستىرۋدا ءوڭىر باسشىسى لاۋازىم يەسىنىڭ جۇمىسىنا تابىس تىلەپ، ورداباسى اۋدانىنىڭ  الەۋمەتتىك-ەكونوميكالىق ءال-اۋقاتىن كوتەرۋدە ەلباسى تاپسىرمالارىن مەرزىمدى ءارى ناتيجەلى ورىنداپ، سەنىم ۇدەسىنەن شىعۋدى تاپسىردى. سونىمەن بىرگە، اۋدان ەكونوميكاسىن دامىتۋدا  ينۆەستيسيا تارتۋ، جاڭا جۇمىس ورىندارىن كوپتەپ اشۋدى جۇكتەدى.  ءوڭىر باسشىسى اۋداننىڭ دامۋىنا ءوز ۇلەسىن قوسقان بۇرىنعى اكىم الماسبەك مامىتبەكوۆكە العىسىن ءبىلدىردى.

«ورداباسى اۋدانىندا وبلىسىمىزداعى ءىرى يندۋستريالدى ايماق پەن   كاسىپورىندار  كوپتەپ شوعىرلانعان.  ونىڭ ۇستىنە اۋداندى  «باتىس-قىتاي، باتىس – ەۋروپا» اۆتوماگيسترالى قيىپ وتەدى.  تەمىر جول قاتىناسى دا جولعا قويىلعان. وسى مۇمكىندىكتەردى پايدالانىپ، ءوڭىردىڭ ەكونوميكالىق دامۋ كورسەتكىشتەرىن جاقسارتۋعا ابدەن بولادى. سونداي-اق اۋداندا  ينفراقۇرىلىمدىق-كوممۋنالدىق قاجەتتىلىكتەر ياعني سۋ، جارىق، جول ماسەلەلەرى شەشىلمەگەن ەلدىمەكەندەر بارشىلىق. جاڭا باسشىعا كۇرە جولدىڭ بويىنان سەرۆيستىك قىزمەت نىساندارىن كوپتەپ سالىپ، تابىستى ەسەلەپ، تۋريستىك باعىتتاعى نىسانداردى زاماناۋي ۇلگىدە دامىتۋ جۇكتەلىپ وتىر. بۇدان بولەك، اۋدانداعى ءبىلىم، اۋىل شارۋاشىلىعى سالالارىن جاقسارتۋدى تاپسىرامىن» ،- دەدى ج. تۇيمەبايەۆ.

راشيد ءۇسىپحان ۇلى قايىپجانوۆ 1970 جىلى 2 قاڭتاردا تۋىلعان، ءبىلىمى جوعارى، ماماندىعى بويىنشا بىلىكتىلىگى - ينجەنەر-مەحانيك. قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنىڭ مەملەكەتتىك ساياساتىڭ ۇلتتىق مەكتەبىنىڭ تۇلەگى بولىپ تابىلادى، اكادەميالىق دارەجەسى – الەۋمەتتىك عىلىمدار ماگيسترى.

ەڭبەك جولىن 1986 جىلى وڭتۇستىك قازاقستان وبلىسى سارىاعاش اۋدانىنىڭ  تەلمان كولحوزىندا جۇمىسشى بولىپ باستاعان.

1992-2011 جىلدارى «USKAX-IMEX» شاعىن كاسىپورىندا مەنەدجەر، «استانا» اكسيونەرلىك قوعامىنىڭ اۆتوكولىك مامانى رەتىندە جۇمىس اتقارعان، «اقجار» وندىرىستىك كووپەراتيۆىنىڭ مۇشەسى بولعان، «ەڭبەك» شارۋا قوجالىعى ءتوراعاسىنىڭ ورىنباسارى، وڭتۇستىك قازاقستان وبلىسى سارىاعاش اۋدانىنىڭ اقجار اۋىلدىق وكرۋگىنىڭ اكىمى لاۋازىمدارىن اتقارعان.

2011 جىلدىڭ قاڭتار ايىنان باستاپ وڭتۇستىك قازاقستان وبلىسى سارىاعاش اۋدانى اكىمىنىڭ ورىنباسارى  لاۋازىمىن اتقارىپ كەلدى.

وقو اكىمىنىڭ باسپا ءسوز قىزمەتى