تۇركىستان وبلىسى بايدىبەك اۋدانى، قوشقار اتا اۋىلىنان شىققان كاسىپكەر ورالبەك قوجامجار ۇلى ەلىمىزدەگى قالتالى ازاماتتاردى قاراپايىم حالىققا قولۇشىن سوزۋعا شاقىردى.  «باي بولساڭ، حالقىڭا پايداڭ ءتيسىن» دەگەن ءتامسىلدى ومىرلىك ۇرانىما اينالدىرىپ كەلەمىن كاسىپكەر تۋعان اۋىلىنىڭ جولىن جوندەپ، كوشەلەرىنە كۇننەن قۋات الاتىن جارىق شامدار ورناتقان.

تابىسىنىڭ بەلگىلى ءبىر بولىگىن قايىرىمدىلىققا جۇمسايتىن كاسىپكەر

كۇننەن قۋات الاتىن شامداردى اقتاۋ، شىمكەنت جانە تاراز قالالارىندا دا ورناتۋعا ءوز ۇلەسىن قوسقان.

– اقىلدى شامداردى ەلىمىزدىڭ ءبىرقاتار وڭىرىنە ورناتتىم. ول شامدار كەش باتقاندا اۆتوماتتى تۇردە جانادى، تاڭ اتقاندا قايتا وشەدى. كۇننەن ەنەرگيا الاتىن شامداردى شىعارۋمەن اينالىساتىن زاۋىت قۇرىلىسىن باستاۋعا جەر الىپ قويدىم. اقىلدى شامداردىڭ ءبىر ەرەكشەلىگى – 70% ۇنەم جاسايدى، سوسىن ءار باعانادا سيم-كارتا، ينتەرنەت، رادار، قۋاتتاعىش سىندى 14 ءتۇرلى قوندىرعى بار.

تۋعان اۋىلىم قوشقار اتادا 19 شاقىرىم اۋماققا 480 دانا جارىق شام ورناتتىق، اۋىلدىڭ ويدىم-شۇقىرعا اينالعان جولىن جوندەتىپ، مەكتەپ سالدىم. «جاقسىلىعىڭدى سۋداعى بالىق قانا ءبىلسىن» دەمەي مە، ءبىراق كەيدە پايدالى ىستەر وزگەلەرگە دە ۇلگىلى بولسا دەيسىڭ. ودان بولەك، پويىزعا، ۇشاققا ءمىنىپ كورمەگەن اۋىل تۇرعىندارىن الماتى، نۇر-سۇلتان سىندى قالالارعا ساياحاتقا جىبەرىپ تۇرامىن. اقتوبەدەن 60 جەتىم بالانى بىلتىرعى جىلى «بالداۋرەن» دەمالىس ورنىنا جىبەرگەنمىن. جىلىنا اۋىلىمداعى مەكتەپ وقۋشىلارىنىڭ ۇش-تورتەۋىنىڭ وقۋ اقىسىن جابۋعا جاردەمدەسەمىن، - دەدى ول.

كاسىپكەردىڭ ايتۋىنشا، پاندەميا كەزىندە كومەككە مۇقتاج جانداردىڭ قاتارى كوبەيگەن.

– الەمدى جايلاعان كوروناۆيرۋس ىندەتى ەل تۇرعىندارىنىڭ قاراپايىم عانا مەديسينالىق بەتپەردەدەن باستاپ، دارى-دارمەك، ازىق-تۇلىككە مۇقتاج ەكەنىن كورسەتتى.  بۇكىل الەمنىڭ باسىنداعى جاعداي بولعان سوڭ، شاعىم ايتا المايمىز. مەملەكەت ءوز كەزەگىندە كاسىپكەرلەردى دە، قازاقستاندىقتاردى دا قولداۋعا تىرىسىپ جاتىر.  پاندەميا كەزىندە قاراپايىم حالىقتىڭ جۇمىسسىز قالعانىن كوزىم كوردى. ۇكىمەتتەن 42 500 تەڭگە كولەمىندە الەۋمەتتىك كومەك بەرىلدى. دەسە دە بۇل كىرىسىنەن ايىرىلعان وتباسىلاردىڭ مۇقتاجىن تولىق وتەي الماي وتىر. تالاي ادامعا جۇمىس بەرۋشى رەتىندە ءوزىم دە قولاستىمداعى مامانداردىڭ ەشقايسىسىن قىسقارتپاۋعا تىرىسىپ، ءبىر-بىر ءۇيدى اسىراپ وتىرعان جانداردىڭ نان تابۋىنا سەپتىگىمدى تيگىزدىم. كوروناۆيرۋستى ينفەكسيا ورشىگەن تۇستا حالىققا تەگىن بەتپەردە تاراتىپ، يراننان دارى-دارمەكتەر الدىردىق. اۋرۋى اسقىنعان جاندارعا تەگىن ءدارى جەتكىزدىك، – دەيدى ورالبەك قوجامجار ۇلى.

كەيىپكەرىمىز كەيدە جاعدايى بولا تۇرىپ، اقشا سۇرايتىنداردىڭ دا كەزدەسەتىنىن جاسىرمادى.

– ەلىمىزدىڭ ءار تۇكپىرىنەن كومەك سۇرايتىندار اراسىنان الاياقتار دا تابىلىپ جاتىر. العاشىندا قارجىدان قىسىلىپ تۇرعانداردى تەكسەرمەي-اق، كومەك بەرەتىنمىن. بىردە جامبىل وبلىسىنان ءبىر كەلىنشەك تەلەفون شالىپ، مۇلدە جاعدايى جوق ەكەنىن ايتتى. ءدارىحاناعا باراتىن اقشاسى بولماي، اۋرۋى اسقىنىپ، بالالارى قاراۋسىز قالعانىن جەتكىزگەن سوڭ، جۇرەگىم اۋىرىپ كەتتى. دەرەۋ سول وڭىردەگى تانىس ازاماتتارعا حابارلاسىپ، بىرلەسىپ قولۇشىن بەرەيىك دەپ ۇسىنىس تاستادىم. انىقتاي كەلگەندە، جاڭاعى كومەككە مۇقتاجبىز دەگەن ايەل ەكى شاشتارازى، استىندا Lexus ماركالى كولىگى، كوتتەدجى بار ادام بولىپ شىقتى. وسى جاعداي ماعان ۇلكەن ساباق بولىپ، سودان بەرى كومەك كورسەتەتىن جانداردى تەكسەرىپ الاتىن بولدىم. ءار نارسە ادامنىڭ نيەتىنەن عوي، ادامداردىڭ پەيىلى تارىلماسىن. كەز-كەلگەن قيىنشىلىقتىڭ اياقتالار كەزى بار، – دەيدى ورالبەك.

ورالبەكتىڭ تابىسىنىڭ بەلگىلى ءبىر بولىگىن قايىرىمدىلىققا جۇمساۋدى ادەتكە اينالدىرۋىنا بالا كەزدەگى كورگەن قيىندىقتارى اسەر ەتكەن.

– كوپبالالى وتباسىنان شىققان سوڭ، ءبىر كىسىدەي قينالعان ساتتەرىمىز بولدى. اپكەم ەكەۋمىز ءتورت جىل بويى ءبىر پالتونى الما-كەزەك كيەتىنبىز. تۇسكە دەيىن پالتونى اپكەم، تۇستەن كەيىن مەن ساباققا كيىپ باراتىن ەدىم. مەنىڭ بيزنەستەگى جولىم سول بالا كۇننەن باستالدى دەسەم، ارتىق ايتقاندىق بولماس. تاۋ ەتەگىندە وسكەن قوزىقۇيرىقتى قالاعا اكەلىپ ساتاتىنبىز. كەيىن سول اقشانى جيناپ، قالادا وقيتىن ستۋدەنت اعا-اپكەلەرىمە سالىپ جىبەرەتىنمىن.

كاسىپ جاساۋعا دەگەن يكەمدىلىگىم مەنى وسى كۇنگە دەيىن جولدان تايدىرعان جوق. وزىمنەن ارتىلعانىن جاستارعا، قاريالارعا بەرگەندى ءجون كورەمىن. ­­­­­­ ولاردىڭ باتاسىنان ارتىق ەشتەڭە جوق. ال ستۋدەنتتەرگە بەرگەن كومەگىمدى بولاشاققا سالىنعان ينۆەستيسيا دەپ بىلەمىن. سەبەبى، بىزگە ءبىلىمدى، مىقتى كادرلار كەرەك. اۋىل كوشەلەرىنە جارىق ورناتىپ، جول سالىپ بەرگەندە ارقامنان جۇك تۇسكەندەي بولدى. سەبەبى، ءار ادام ءوزىنىڭ تۋعان اۋىلىنا قارىزدار. شاما كەلسە، تۋعان اۋىلدىڭ كوركەيۋىنە اتسالىسۋ كەرەك. ءار كاسىپكەر ينۆەستيسيانى تۋعان اۋىلىنا سالىپ، جول جوندەپ، كوپىر ورناتىپ، اۋىل بالالارىنا فۋتبول الاڭىن سالىپ، اۋىل وقۋشىلارى ءۇشىن قولجەتىمسىز كىتاپتاردى تەگىن تاراتسا، يگىلىك دەگەن وسى ەمەس پە؟! – دەدى ول.

ءبىر كەزدەرى ت.جۇرگەنوۆ اتىنداعى ونەر اكادەمياسىن بىتىرگەن كاسىپكەر ساحنادا جۇرمەسەم دە، ونەر مەن سپورتتا  جۇرگەن جاستارعا دەمەۋشىلىك جاساپ تۇرامىن دەيدى.

– ونەر اكادەمياسىن بىتىرگەنمەن، ول سالادان الىستاپ كەتتىم. كاسىپتىڭ بىرنەشە تۇرىمەن اينالىسىپ كوردىم. كەيبىرىنەن جاقسى پايدا تاپسام، ەندى بىرىنەن بانكروت بولعان كەزدەر دە بولدى. اسىرەسە، سپيرت ونىمدەرىمەن اينالىسقان ماعان جاقپايتىنىنا كوزىم جەتتى. ونەر ساحناسىندا جۇرمەسەم دە، ونەردىڭ، سپورتتىڭ دامۋىنا ءوز ۇلەسىمدى قوسىپ كەلەمىن. ايگىلى شولپان جانداربەكوۆانىڭ كۋرسىنان ءبىتىرىپ شىققانىمدى ماقتان تۇتامىن. بەكجان تۇرىس، عاني قۇلجانوۆ سەكىلدى ەلگە تانىمال كۋرستاستارىممەن بايلانىسىم ۇزىلگەن ەمەس، – دەيدى ول.