2024 جىلدىڭ 7 قىركۇيەك كۇنى ورال قالاسىندا قازيتجۋ ستۋدەنتتەر سارايىندا مەملەكەت جانە قوعام قايراتكەرى، اقىن، كسرو جۋرناليستەر وداعىنىڭ مۇشەسى راحمەتوللا سۇيىندىك ۇلى ەگىزبايەۆتىڭ تۋعانىنا 100 جىل تولۋىنا وراي جانە اقىننىڭ مۇرالارى توپتاستىرىلعان «شارىمبەت سازدارى» اتتى جيناقتىڭ جارىق كورۋى سەبەپتى ادەبي-سازدى كەش وتكىزىلدى.
تاڭعى ساعات 10 دا باستاپ ەكى ساعاتقا سوزىلعان ادەبي-سازدى كەشتىڭ قوناقتارى باتىس قازاقستاننىڭ زيالى قاۋىمى، عالىم-ۇستازدار، ادەبيەتشىلەر، ارداگەرلەر جانە ستۋدەنت جاستار بولدى. كەشتىڭ جۇرگىزۋشىسى جازۋشى-جۋرناليست، قازاقستان جازۋشىلار وداعىنىڭ جانە قازاقستان جۋرناليستەر وداعىنىڭ مۇشەسى، قازاقستان جازۋشىلار وداعىنىڭ بقو فيليالىنىڭ ءتوراعاسى، ق ر اقپارات سالاسىنىڭ ۇزدىگى، ق ر قۇرۇلتاي مۇشەسى عۇبايدۋللين باۋىرجان بولدى. اقىن راحمەتوللا سۇيىندىك ۇلى تۋرالى جان-جاقتى اقپارات، باياندار ايتىلىپ، ولەڭدەرى ساحنا تورىنەن ورىندالدى. سولاردىڭ ىشىندە تۋعان جەرى تەگىسشىلدەن كەلگەن جاستار دا بار: سادييەۆ داۋرەن مەن مۋحمامبەتقاليەۆ سانجار. ودان وزگە دە كوركەمسوز وقۋشىلار ءسوز مارجانىن مانەرىنە كەلتىرە جۇرەكتەن جۇرەكتەرگە جەتكىزدى.
مەرەيتوي يەسىنىڭ كوزكورگەن ارىپتەستەرى، سوڭىنان ەرگەن، تالىم-تاربيەسىن العان زامانداستارى دا اقىن تۋرالى ەستەلىك ايتۋدان شەت قالمادى. ولار –جايساڭ اقباي، كۋجەكوۆا روزا، حامزينا ءسانيا.
كەشتىڭ سۇبەلى جەرى ارينە، «شارىمبەت سازدارى» دەپ اتالىپ اقىننىڭ ءوز سوزىمەن ايتقاندا، «اقسۇڭقارداي قايتا تۇلەگەن» تولىقتىرىلىپ، ەستەلىكتەر مەن ارناۋلارمەن تولىسىپ جارىق كورگەن جىر جيناقتىڭ تۇساۋ كەسۋ ءساتى بولدى. تۇساۋ كەسۋ تاريح عىلىمدارىنىڭ دوكتورى، اكادەميك تۇياقباي رىسبەكوۆ مەن جانىبەك اۋدانى اكىمىنىڭ ورىنباسارى جاقسىلىق ابدولوۆ جولداندى.
ال ادەبي-سازدى كەشىمىزدىڭ تۇزدىعى رەتىندە انشى-كومپوزيتور قۋانىش قيسمەتوۆتىڭ ر.س.ەگىزبايەۆ اقىننىڭ سوزىنە جازعان «شارىمبەتىم» ءانى اسلان بورانبايەۆتىڭ ورىنداۋىندا شىرقالدى.
سوڭىندا «شارىمبەت سازدارى» ادەبي-سازدى كەشتى ۇيىمداستىرۋشى م.ب.ىقسانوۆ اتىنداعى قوعامدىق قوردىڭ ءتوراعاسى، ەڭبەك، تىل ارداگەرى اتايەۆ اسقار مەن «شارىمبەت سازدارى» كىتابىنىڭ قۇراستىرۋشىسى، مەرەيتويعا قاتىستى شارالارعا اتسالىسۋشى فيلولوگيا عىلىمدارىنىڭ كانديداتى وبلىستىق «قازاق ءتىلى» قوعامىنىڭ ءتوراعاسى ابدۋلمانوۆ التىنبەك كەشكە قاتىسقان، ونەر كورسەتكەن جاستاردى ارنايى العىس حاتتارمەن، سىيلىقتارمەن ماراپاتتادى.
