بۇل تۋرالى بريفينگتە ق ر دەنساۋلىق ساقتاۋ ءمينيسترى الەكسەي سوي ايتتى.
ول ەلىمىزدەگى مەكتەپتەردە قاشىقتىقتان وقىتۋ فورماتىن ساقتاۋ ءماجبۇرلى شارا ەكەنىن باسا ايتتى. ۇيىمداسقان جابىق توپتاردا ينفەكسيا جۇعۋ ءقاۋپى جوعارى. ماسەلەن، ەگەر سىنىپتا ءبىر ادام كوروناۆيرۋسپەن اۋىرسا، وندا ونىمەن بايلانىستاعىلاردىڭ سانى ەداۋىر ارتادى، بۇل - ناۋقاستىڭ سىنىپتاستارى، مۇعالىمدەرى، تۋىستارى، دوستارى جانە ت.ب.
دەنساۋلىق ساقتاۋ ءمينيسترى ءبىلىم بەرۋدىڭ قالىپتى رەجيمىنە ورالعان باسقا ەلدەردى مىسالعا كەلتىردى. ونىڭ ايتۋىنشا، ونداي ەلدەردە مەكتەپتەر ينفەكسيانىڭ ورشۋىنە بايلانىستى ءبىراز ۋاقىتتان كەيىن قايتا كارانتينگە جابىلا باستاعان. مىسالى، گەرمانيا، انگليا، اقش، فرانسياداعى مەكتەپتەردە كوروناۆيرۋستىڭ ونشاقۇتى دەرەگى انىقتالىپ، اقىرى مەكتەپتەر كارانتينگە قايتا جابىلىپ جاتىر.
قازاقستان رەسپۋبليكاسىنىڭ مەكتەپتەرىندەگى كەزەكشى توپتارعا كەلەتىن بولساق، ونداعى ەپيدەميولوگيالىق جاعداي تۋرالى قورىتىندى جاساۋعا ءالى ەرتە، ويتكەنى 14 كۇندىك ينكۋباسيالىق كەزەڭ ءالى وتپەگەن.
سونىمەن بىرگە سوي جىل سايىنعى ءجرۆي-دىڭ ماۋسىمدىق بوي كوتەرۋلەرىن ەسكە ءتۇسىردى.
- بۇل شارا ۋاقىتشا بولىپ تابىلادى. 15 قىركۇيەكتەن 15 قازانعا دەيىن ۆاكسيناسيا جاسايمىز. وسىلايشا، ءبىز تۇماۋ مەن كۆي-مەن قاباتتاسۋىن بولدىرماۋ ءۇشىن حالىقتىڭ وسال توپتارى مەن بالالارعا، اسىرەسە جرۆي-مەن، تۇماۋمەن ءجيى اۋىراتىن بالالارعا ەكپە سالامىز. بۇل ءبىز ءۇشىن وتە ماڭىزدى، سوندىقتان ءى-توقساندى وقۋشىلار قاشىقتىقتان وقيتىن بولادى. بولاشاقتا بىزدە ۇيىمداسقان توپتاردا قانداي اۋرۋلار بار ەكەنىن زەرتتەگەننەن كەيىن ءبىز بۇل ماسەلەنى قاراۋ ءۇشىن ۆەدومستۆوارالىق كوميسسياعا جىبەرەمىز، سول كەزدە ونى قوسىمشا قاراستىرامىز، - دەدى مينيستر.
