قازىرگى تاڭدا قازاقستاننىڭ ورتا ءبىلىم بەرۋ جۇيەسىندە بارلىعى 8 848 مەكتەپ بار
قازاقستاننىڭ ءبىلىم ءمينيسترى جۇلدىز سۇلەيمەنوۆا جالپى ءبىلىم بەرەتىن مەكتەپتەر ديرەكتورلارىنىڭ قىزمەت مەرزىمىن شەكتەۋ جانە روتاسيا جۇيەسىن ەنگىزۋ تۋرالى باستاما كوتەردى. ونىڭ ايتۋىنشا، بۇل ۇسىنىس كەڭىنەن تالقىلاندى جانە مينيسترلىكتە اناليتيكالىق جانە ساراپتامالىق زەرتتەۋ تاقىرىبىنا اينالدى، دەپ حابارلايدى Dalanews.kz
وقۋ-اعارتۋ ءمينيسترى اتاپ وتكەندەي، ول بۇعان دەيىن مىناداي ۇلگىنى بەكىتۋدى ۇسىنعان بولاتىن: مەكتەپ ديرەكتورى ەكى وقۋ جىلىنا تاعايىندالادى، ال وڭ ناتيجەلەرمەن ونىڭ وكىلەتتىگى تاعى ەكى جىلعا – ناتيجەسىندە ءبىر مەكتەپتە ەڭ كوپ دەگەندە ءتورت وقۋ جىلىنا ۇزارتىلۋى مۇمكىن.
“مەن وسىدان بىرنەشە اپتا بۇرىن جالپى مەكتەپ ديرەكتورلارىنىڭ تاعايىندالۋى، ولاردىڭ جۇمىس ىستەۋ ۇزاقتىعىنا بايلانىستى ءبىر ۇسىنىسىمدى ورتاعا سالعان بولاتىنمىن. ياعني، كەز كەلگەن ديرەكتور تاعايىندالعاننان كەيىن 2 وقۋ جىلى جانە جاقسى ناتيجە كورسەتىپ جاتسا تاعى دا ەكى وقۋ جىلى، سوندا تۇبىندە 4 وقۋ جىلىنا تاعايىندالۋى قاجەت دەگەندى ايتقانمىن”، – دەدى سۇلەيمەنوۆا.
مينيسترلىكتىڭ مالىمەتىنە سايكەس، قازىرگى تاڭدا قازاقستاننىڭ ورتا ءبىلىم بەرۋ جۇيەسىندە بارلىعى 8 848 مەكتەپ بار. ونىڭ ىشىندە 5233 مەكتەپ اۋىلدىق جەردە، 2815 مەكتەپ قالالىق جەردە ورنالاسقان. 2026 جىل 24 قاڭتارداعى جاعدايعا سايكەس، 7238 مەكتەپ ديرەكتورى جۇمىس ىستەيدى. ولاردىڭ ولاردىڭ 810-ى، ياعني 10 پايىزى، – مەكتەپ باسشىسى قىزمەتىن ۋاقىتشا اتقارۋشىلار.
“مەنى مەكتەپ ديرەكتورىنىڭ مىندەتىن ۋاقىتشا اتقارۋشىلاردىڭ ساندىق ۇلەسى الاڭداتادى. ەڭ جوعارعى كورسەتكىش بقو-دا – 15،6 پايىز. سقو-دا –13 پايىز، شقو-دا – 12 پايىز. ءبىز باسشىلاردىڭ وسى ساناتىنا دا كوبىرەك كوڭىل ءبولۋىمىز كەرەك”، – دەپ اتاپ ءوتتى مينيستر.
مينيسترلىكتىڭ مالىمەتىنە سۇيەنسەك، مەكتەپ باسشىلارىنىڭ اراسىنداعى ايەلدەردىڭ ۇلەسى – 62 پايىز، ەرلەردىڭ ۇلەسى – 38 پايىز. مەكتەپ باسشىلارىنىڭ ورتاشا جاسى – 48،5 جاس. ديرەكتورلاردىڭ باسىم بولىگىنىڭ ماگيستر دەڭگەيى بار: ولاردىڭ ەڭ جوعارعى ۇلەسى استانا قالاسىندا – 43 پايىز. الماتى قالاسىنداعى مۇعالىمدەردىڭ 32 پايىزىنىڭ، شىمكەنتتىك ۇستازداردىڭ 27،5 پايىزىنىڭ ماگيسترلىك اتاعى بار.
“مەنىڭ ويىمشا، بۇل وتە جاقسى كورسەتكىش”، – دەپ ويىن ءبىلدىردى سۇيوەيمەنوۆا.
مينيستر مەكتەپ ديرەكتورلارىنىڭ جالپى ەڭبەك وتىلىنە ەرەكشە نازار اۋداردى. قازاقستانداعى مەكتەپ ديرەكتورلارىنىڭ ورتاشا ەڭبەك ءوتىلى – 26 جىل. ونىڭ ىشىندە 86 مەكتەپ ديرەكتورىنىڭ (1،2 پايىز) ەڭبەك ءوتىلى 5 جىلعا دەيىنگى ۋاقىتتى قامتيدى ەكەن. 6-10 جىلدىڭ ەڭبەك ءوتىلى بار ديرەكتورلار (328 ادام) 4،5 پايىزدى، 11-15 جىل ارالىعىندا ءوتىلى بار باسشىلار (759 ادام) 10،5 پايىزدى قۇرايدى. ال 16 جىلدان جانە ودان دا جوعارى ۋاقىت مەكتەپ ديرەكتورى قىزمەتىن اتقارعانداردىڭ ۇلەسى – 84 پايىز، ياعني 6065 پەداگوگ.
“ەندى ءبىر قىزىعىن ايتقىم كەلەدى، مەن 20 جىلدان جوعارى قىزمەت ەتكەندەردى قاراستىردىم. ولاردىڭ سانى 129 ەكەن. ونىڭ ىشىندە اقمولا وبلىسىندا 23 ديرەكتور، جامبىل وبلىسىندا 10 ديرەكتور، سقو-دا 24 ديرەكتور، پاۆلودار وبلىسىندا 13 ديرەكتور، شقو-دا 12 ديرەكتور، اقتوبە وبلىسىندا 6 ديرەكتور، اباي وبلىسىندا 14 ديرەكتور، جەتىسۋ وبلىسىندا 5 ديرەكتور بار”، – دەدى مينيستر.
سۇلەيمەنوۆانىڭ ايتۋىنشا، ناقتى شەشىم ءالى قابىلدانباعان، ويتكەنى بۇل ماسەلەنى تولىق زەردەلەۋ قاجەت. ءبىراق، مەنىڭ ويىمشا، ءبىر جەردە ۇزاق وتىرعان جاندارعا ءبارىبىر روتاسيا جاسالۋى ءتيىس.
“ءبىز ءالى ءبىر شەشىمگە كەلگەن جوقپىز. ءبىراق، مەنىڭ ويىمشا، 20 جىل بويى ديرەكتورلىق قىزمەت اتقارعان باسشىعا قاتىستى روتاسيا قولدانىلۋى ءتيىس. ەگەر جاقسى قىزمەت ەتىپ، ۇزدىك ناتيجەلەرگە قول جەتكىزسە، وندا باسقا مەكتەپكە بارىپ، ونى دا ءدال سولاي دامىتسىن. ولاردى ەشكىم قايتادان مۇعالىمدىككە ءتۇسىرىپ تاستايىن دەپ جاتقان جوق”، – دەپ ءتۇسىندىردى ول.
مينيستر باسشى كادرلاردىڭ ورنىن اۋىستىرۋ ارقىلى مەكتەپتەردى دامىتۋعا قول جەتكىزۋ ماقساتىن كوزدەيتىنىن جاسىرمادى.
“ءبىراق ءبىر مەكتەپتە العاشقى ەكى جىلدا، ودان كەيىنگى ءتورت جىل كولەمىندە قىزمەتىن جاقسى جاعىنان كورسەتسىن دەپ تۇرمىز عوي. ودان كەيىن باسقا مەكتەپتى دە كوتەرسىن. سونداي ۇسىنىستاردى قاراستىرىپ جاتىرمىز”، – دەدى جۇلدىز سۇيلەيمەنوۆا..
