وڭتۇستىك قازاقستان وبلىسىندا وبلىستىق سوت ءتوراعاسى اۋىستى ءارى ءبىرقاتار اۋداندىق سوت ءتوراعالارىنىڭ وكىلەتتىك مەرزىمدەرى اياقتالىپ، ولاردىڭ ورنىنا جاڭادان باسشىلار تاعايىندالدى، دەپ حابارلايدى وبلىستىق سوت باسپا ءسوز قىزمەتى.

وڭتۇستىك قازاقستان وبلىستىق سوتىنىڭ ءتوراعاسى قىزمەتىنە تالعات باراتبەكوۆ تاعايىندالدى.

تالعات قوجان ۇلى باراتبەكوۆ 1973 جىلى تۋعان. ەڭبەك جولىن وڭتۇستىك قازاقستان وبلىسىنىڭ تولەبي اۋداندىق سوتىندا سوت ورىنداۋشىسى بولىپ باستاعان. ول وڭتۇستىك قازاقستان وبلىستىق جانە الماتى قالالىق ادىلەت باسقارمالارىندا ءبولىم باسشىسى، الماتى وبلىستىق ادىلەت باسقارماسى باستىعىنىڭ ورىنباسارى، الماتى وبلىستىق ارنايى مامانداندىرىلعان اۋدانارالىق سوتىنىڭ سۋدياسى، شىمكەنت قالاسىنداعى اباي اۋداندىق سوتىنىڭ، وڭتۇستىك قازاقستان وبلىس­تىق ارنايى مامانداندىرىلعان اۋدانارالىق سوتىنىڭ ءتوراعاسى لاۋازىمدارىن اتقارعان. 2009 – 2016 جىلدار ارالىعىندا ق ر باس پروكۋراتۋراسى باس­قارماسىنىڭ باستىعى، دەپارتامەنت باستىعىنىڭ ورىنباسارى، استانا قالاسى پروكۋرورىنىڭ ورىنباسارى، الماتى وبلىستىق سوتى سوت كوللەگياسىنىڭ ءتوراعاسى بولعان. 2016 جىلدان باستاپ ق ر جوعارعى سوتىندا سۋديا قىزمەتىن اتقارىپ كەلدى.

وسىعان دەيىن بايدىبەك اۋداندىق سوتىن باسقارىپ كەلگەن ءابدىعاپپار بەكباتىروۆ شىمكەنت قالاسىنداعى مامانداندىرىلعان اكىمشىلىك سوتىنىڭ سۋدياسى بولىپ تاعايىندالدى. ال بايدىبەك اۋداندىق سوتىنىڭ ءتوراعاسى قىزمەتىن وسىعان دەيىن تۇلكىباس اۋداندىق سوتىنىڭ سۋدياسى بولعان ەرمەك قاراقۇلوۆ اتقاراتىن بولدى.

ال وتىرار اۋداندىق سوتىنىڭ ءتوراعاسى بولىپ بۇعان دەيىن وسى اۋداننىڭ سۋدياسى بولىپ قىزمەت ەتكەن اكىمبەك جاناسوۆ تاعايىندالدى.

وبلىستاعى كامەلەتكە تولماعاندار جونىندەگى مامانداندىرىل­عان اۋدانارالىق سوتتىڭ ءتوراعاسى قىزمەتىن قاناتبەك قوڭىربايەۆ اتقاراتىن بولدى.