بۇل تۋرالى بۇگىن وقو وڭىرلىك كوممۋنيكاسيالار قىزمەتىندە وتكەن بريفينگتە وبلىستىق سايلاۋ كوميسسياسىنىڭ ءتوراعاسى ءا.ومىرالييەۆ مالىمدەدى.
ءتوراعانىڭ ايتۋىنشا، ءماسليحات دەپۋتاتتىعىنا بارلىعى 42 ۇمىتكەر ۇسىنىلعان، ونىڭ ىشىندە 38 ۇمىتكەر تىركەلىپ وتىر. قالعان 4 ۇمىتكەر تىركەۋگە قاجەتتى قۇجاتتاردى «قازاقستان رەسپۋبليكاسىنىڭ سايلاۋ تۋرالى» كونستيتۋسيالىق زاڭىنىڭ تالاپتارىنا ساي وكرۋگتىك كوميسسياعا تاپسىرماعان.
«وسى ۇمىتكەرلەردى پارتيالىق قۇرامى جاعىنا قارايتىن بولساق، «نۇر وتان» پارتياسىنان - 7 ۇمىتكەر، «اق جول» پارتياسىنان 1 ۇمىتكەر تىركەلدى. پارتيالىعى كورسەتىلمەگەنى - 21 ۇمىتكەر بولسا، 9 ۇمىتكەر پارتيادا جوق»، - دەدى ءا.ومىرالييەۆ.
ءماسليحات دەپۋتاتتارىنىڭ سايلاۋى 7 وكرۋگتە وتكىزىلەدى. وبلىستىق ءماسليحاتقا سايلاۋ 4 وكرۋگتە وتەدى. ولار – شىمكەنت قالاسىنداعى №11، 35 جانە شاردارا اۋدانىنداعى № 49، 50 وكرۋگتەر. قالالىق ءماسليحاتقا – 2 وكرۋگ (شىمكەنت قالاسىنداعى №22، تۇركىستان قالاسىنداعى №7). اۋداندىق ءماسليحاتقا سارىاعاش اۋدانىنان №22 وكرۋگتە سايلاۋ وتەدى. وبلىستىق ءماسليحاتقا 23 ۇمىتكەر تىركەلسە، قالالىق ءماسليحاتقا - 12 ۇمىتكەر، اۋداندىق ءماسليحاتقا 3 ۇمىتكەر تىركەلدى.
ايتا كەتەيىك، ەڭ جاس ۇمىتكەر - وبلىستىق ءماسليحاتقا ۇمىتكەر، شىمكەنت قالاسىنىڭ تۇرعىنى تەمىربايەۆ جانعالي باحتيار ۇلى (21 جاستا). ال جاسى ەڭ ۇلكەن ۇمىتكەر - №7 تۇركىستان قالالىق وكرۋگتەن تۇسكەلى وتىرعان جارقىنبەكوۆ سارسەنبەك مۇباراك ۇلى (64 جاستا). 2017 جىلدىڭ 3 قازانىندا ساعات 24:00-دە ۇمىتكەرلەردى تىركەۋ اياقتالىپ، جەكە ۇمىتكەرلەردىڭ سايلاۋ الدىنداعى ۇگىت-ناسيحات جۇمىستارى 4 قازاننان باستالدى.
وقو اكىمىنىڭ باسپا ءسوز قىزمەتى
