كەزدەسۋ بارىسىندا ايماق باسشىسى ءوڭىرىمىزدىڭ ءبىلىم سالاسىنىڭ جاي-كۇيىمەن تانىستىرىپ، قوناقتاردى پرەزيدەنت قويعان مىندەتتەردى بىرلەسىپ ورىنداۋعا شاقىردى.
– ەلباسى 2022 جىلعا دەيىن 75 مىڭ ورىندىق ستۋدەنتتەر ءۇيىن سالۋدى تاپسىرعانى بەلگىلى. وسى رەتتە وزدەرىڭىزدىڭ تاجىريبەلەرىڭىزبەن بولىسە وتىرىپ، جاتاقحانا سالۋ، وقۋ ورىندارىنداعى تەحنيكالىق وقۋ بازاسىنىڭ جاقسارۋىنا مايلىنشە ىقپال ەتۋگە شاقىرامىن. ستۋدەنتتەر جاتاقحانامەن قامتىلسا، كوپتەگەن ماسەلە شەشىلگەلى تۇر. اتاپ ايتقاندا، تومەن باعادا جاتاتىن ورىن، جولاقى شىعىنى جانە جاستاردىڭ قاۋىپسىزدىگى وڭىنان شەشىلەدى دەگەن ويدامىن، – دەدى جانسەيىت تۇيمەبايەۆ.
سونداي-اق، وبلىس اكىمى وڭىرىمىزدەگى ءبىلىم سالاسىنا ەنگىزىلگەن سيفرلاندىرۋ جۇيەسىندەگى جاڭالىقتارمەن دە ءبولىستى. بۇگىندە وڭتۇستىكتەگى ءبىرقاتار اۋدان قالالاردا مەكتەپ ديرەكتورىن جۇمىسقا، بالالاردى بالاباقشا مەن ءبىلىم ۇيالارىنا قابىلداۋ جۇمىستارى ەلەكتروندىق جۇيەگە كوشكەن. ودان بولەك ەلەكتروندى كۇندەلىك باعدارلاماسى دا العاش بولىپ وقو-دا قولعا الىنىپ وتىر. ناتيجەسىندە ءبىلىم بەرۋ سالاسىندا ادامي فاكتورلار ازايىپ، قاعازباستىلىق پەن سىبايلاستىقتىڭ تومەندەگەنى ءسوز بولدى.
ءوز كەزەگىندە ءماجىلىس دەپۋتاتى ءا.بەكتۇرعانوۆ وبلىستا اتقارىلىپ جاتقان جۇمىستار كوڭىل قۋانتاتىنىن ايتىپ، ءبىلىم سالاسىنداعى ماسەلەلەردى شەشۋ جولىندا اتقارىلىپ جاتقان جۇمىستاردى باياندادى. حالىق قالاۋلىلارى وبلىسىمىزدا بىرنەشە كۇن بولىپ، وقۋ ورىنداردى ارالىپ جاتاقحانالاردىڭ جاي-كۇيىمەن تانىساتىندارىن جەتكىزدى.
ايتا كەتەيىك، وقو-دا بۇگىندە تەحنيكالىق جانە كاسىپتىك ءبىلىم بەرۋ ۇيىمدارىندا 74 مىڭنان اسا ستۋدەنت ءبىلىم الۋدا. مەملەكەتتىك 36 كوللەدجدىڭ 32ء-سى جاتاقحانامەن قامتاماسىز ەتىلگەن. مەملەكەتتىك 36 كوللەدجدىڭ بارلىعى 100% اسحانا جانە بۋفەتتەرمەن قامتاماسىز ەتىلگەن.
وقو اكىمىنىڭ باسپا ءسوز قىزمەتى
