قازاقستاننىڭ 2050 جىلعا دەيىنگى دامۋىنىڭ جاڭا ستراتەگياسى ەلىمىزدى قازىرگى زامانعى سىن-قاتەرلەرگە جاۋاپ بەرەتىن جاھاندىق جانە تۇجىرىمدامالىق مىندەتتەردى شەشۋگە جانە قۋاتتى ءارى باسەكەگە قابىلەتتى ەكونوميكا، سەنىمدى الەۋمەتتىك ساياسات، جوعارى تەحنولوگيالى يندۋستريالىق سەكتور قۇرۋدىڭ العىشارتتارىن جاساۋعا باعىتتايدى. سوڭعى مىندەت وڭىرلەردىڭ تىكەلەي ءارى بەلسەندى قاتىسۋىن كوزدەيدى. سەبەبى، ولار ينۆەستيسيا تارتۋدىڭ، ينفراقۇرىلىمداردى كەڭەيتۋ مەن جاڭعىرتۋدىڭ جانە جاڭا ءوندىرىس ورىندارىن اشۋدىڭ ورتالىقتارى بولادى. ەلباسىنىڭ تاپسىرماسىنا ساي وڭتۇستىك قازاقستان وبلىسىندا بۇگىندە جاڭا ءوندىرىس ورىندارى كوپتەپ اشىلۋدا. وسى ورايدا وڭىردە شيكىزات سەكتورىنان دايىن ءونىم سەكتورىنا ءوتۋ باعىتىندا 8 ءىرى ينۆەستيسيالىق جوبالار جۇزەگە اسىرىلۋدا. بۇل تۋرالى  وڭىرلىك كوممۋنيكاسيا قىزمەتىندە وتكەن بريفينگتە وبلىستىق اۋىل شارۋاشىلىعى باسقارماسى باسشىسى سەرىك تۇربەكوۆ ءمالىم ەتتى.

ونىڭ ايتۋىنشا، وبلىستا ينۆەستيسيا سومماسى 18،5 ملرد. تەڭگەنى  قۇرايتىن، قۋاتتىلىعى جىلىنا 30 مىڭ توننا قۇس ەتىن وندىرەتىن    «اK Kazyna» ءجشس-نىڭ جوباسىن ىسكە اسىرۋ جۇمىستارى باستالعان. ال، «ورداباسى-قۇس» جشس-گى كۇركە تاۋىق ەتىن ءوندىرۋ وڭدەۋ وندىرىستىك قۋاتتىلىعىن جىلىنا 25 مىڭ تونناعا جەتكىزۋ بويىنشا كەلىسىمگە قول قويعان. مۇنان بولەك، شاردارا اۋدانىندا بالىق ونىمدەرىن قايتا وڭدەيتىن ەكى زاۋىتتى ىسكە اسىرۋ جۇمىستارى جۇرگىزىلسە، ينۆەستيسيا سومماسى 7،8 ملرد. تگ. قۇرايتىن تۇيە ءسۇتىن قايتا وڭدەيتىن زاۋىت سالۋ جۇمىستارى باستالعان.

سونداي-اق، جۇڭگو ينۆەستورلارىمەن ينۆەستيسيا سومماسى 21،6 ملرد. تگ. قۇرايتىن تومات زاۋىتىن سالۋ جوباسى كەلىسىلسە، 1 مىڭ گا اۋماققا قارقىندى جاڭعاق باۋىن وتىرعىزۋ جوباسىن جۇزەگە اسىرۋ ينۆەستورلار تاراپىنان كەلىسىمىن تاپتى. اتالعان جوبا بويىنشا جەردى تاڭداپ، قۇجاتتاردى راسىمدەۋ جۇمىستارى جۇرگىزىلۋدە. بۇدان باسقا، بىرنەشە ينۆەستورلاردىڭ قاتىسۋىمەن ينۆەستيسيا سومماسى 51،2 ملرد. تگ. قۇرايتىن 136 گا اۋماقتا شىمكەنت ق. وندىرىستىك جىلىجايلار سالۋ جوباسىن («تەپليچنىي راي») جۇزەگە اسىرۋ جوسپارلانۋدا. ال، قازىعۇرت اۋدانىندا «اسىل باستاۋ» ج ش س ينۆەستيسيا سومماسى 603 ملن. تگ. قۇرايتىن قۇرعاق ءسۇت جانە سارى ماي شىعارۋ زاۋىتى سالىنۋدا.

مەملەكەت باسشىسى جىل سايىنعى قازاقستان حالقىنا ارنالعان جولداۋىندا ەلدىڭ اگرارلىق سالاسىنا اسا باسىمدىلىق بەرىپ،  جىلدان-جىلعا سالا قارقىندى دامۋ ۇستىندە. وعان دالەل، وتكەن جىلى اۋىل شارۋاشىلىعى جالپى ءونىم كولەمى 480،4 ملرد.تگ، ناقتى كولەم يندەكسى 105 % قۇرادى. سوڭعى بەس جىلدا شامامەن 2 ەسەگە ۇلعايدى. جالپى ءونىمنىڭ رەسپۋبليكاداعى شاققانداعى ۇلەسى 13 % قۇرادى. بۇل وبلىستىڭ اگرارلىق سالاسىنىڭ ەكسپورتتىق جانە الداعى ۋاقىتتا رەسپۋبليكا حالقىن نەگىزگى ازىق-تۇلىك ونىمدەرىمەن قامتاماسىز ەتەتىن ورتالىققا اينالدىرۋ الەۋەتىنىڭ جوعارعى ەكەندىگىن كورسەتەدى»، - دەدى باسقارما باسشىسى.

ەلباسى جولداۋىندا «اگرارلىق سەكتور ەكونوميكانىڭ جاڭا درايۆەرىنە اينالۋ  كەرەك» دەپ، اۋىل شارۋاشىلىعى سالاسىنا ۇلكەن مىندەتتەر جۇكتەدى. وسى جولداۋدا بەلگىلەنگەن مىندەتتەر بويىنشا اتقارىلىپ جاتقان جۇمىستارعا  جەكە-جەكە توقتالعان سەرىك تۇربەكوۆ  2021 جىلعا دەيىن اگروونەركاسىپ كەشەنى ەكسپورتىنىڭ  كولەمى 35 %-عا، 90 مىڭنان استام جەكە فەرمەرلىك شارۋاشىلىقتاردى بىرىكتىرەتىن 600-دەن استام كووپەراتيۆتەر قۇرۋ جانە 118،8 مىڭ سۋارمالى جەرلەردى قالپىنا كەلتىرۋ جۇمىستارى جۇرگىزىلىپ جاتقانىن اتاپ ءوتتى.