بۇگىن وڭتۇستىك قازاقستان وبلىسىنىڭ اكىمى ج.تۇيمەبايەۆ سەلەكتورلىق رەجيمدە وتكەن اپپاراتتىق جيىندا ازىق-تۇلىك تاۋارلارى باعالارىن تۇراقتاندىرۋ جانە تاۋار وندىرۋشىلەر مەن ديقاندارعا ءوز ونىمدەرىن ساۋدالاۋعا مۇمكىندىك بەرەتىن الەۋمەتتىك بازار اشۋدى اۋدان، قالا اكىمدەرىنە تاپسىردى.



[caption id="attachment_31659" align="alignright" width="318"] فوتو. سامات مىرزالييەۆ.[/caption]

– الەۋمەتتىك ماڭىزى بار ازىق-تۇلىك تاۋار باعالارىنىڭ وسۋىنە جول بەرمەۋ ماقساتىندا وڭىردە ءبىر اي كولەمىندە الەۋمەتتىك بازارلار اشۋىمىز قاجەت. ول ءۇشىن شىمكەنتتەن 1-1،5 گەكتار جەر قارالىپ، تالاپقا ساي جاساقتالۋىن، ال ءىرى اۋداندار 70 سوتتىق، كىشى اۋداندار 50 سوتتىق جەر ءبولىپ از ۋاقىتتىڭ ىشىندە تاۋار وندىرۋشىلەرگە ءوز ونىمدەرىن ساتۋعا مۇمكىندىك جاسالۋ كەرەك، – دەدى اكىم. سونىمەن قاتار، ايماق باسشىسى الەۋمەتتىك  بازارلاردا ونىمدەر اۋىل شارۋاشىلىق جارمەڭكەلەرىنە باسەكەلەسەتىندىكتەن  جانە  تاۋار وندىرۋشىلەرمەن تىكەلەي قارىم-قاتىناس جاساۋ ارقىلى ءونىم باعاسىن تومەندەتۋگە مۇمكىندىك تۋاتىنىن اتاپ ءوتتى.

ماجىلىستە ءسوز العان وبلىستىق كاسىپكەرلىك، يندۋستريالدى-يننوۆاسيالىق دامۋ جانە تۋريزم باسقارماسى باسشىسىنىڭ ورىنباسارى باعلان جۇماشبەكوۆ جالپى وبىستا الەۋمەتتىك ازىق-تۇلىك تاۋارلارى باعالارىنىڭ كۇرت ءوسىمى ورىن الماعانىن جانە تاۋارلارعا جەتىسپەۋشىك بايقالمايتىنىن ءمالىم ەتتى.

ونىڭ ايتۋىنشا، باعانى تۇراقتاندىرۋ ماقساتىندا وبلىس اۋماعىنداعى ساۋدا ورىندارىنىڭ باسشىلارىمەن باعانى نەگىزسىز وسىرمەۋ جونىندە مەموراندۋمعا قول قويىلعان. سونىمەن قاتار، اۋىلشارۋاشىلىق تاۋارلارىنىڭ جارمەڭكەسىن وتكىزۋ ارقىلى باعا تۇراقتىلىعى ساقتالۋدا. ماسەلەن، جىل باسىنان بەرى وڭىردە 77 جارمەڭكە وتكىزىلگەن بولسا، وندا جالپى سومماسى 639،3 ملن. تەڭگە بولاتىن 842،1 توننا ازىق-تۇلىك تارۋارلارى ساتىلعان. ياعني، جەرگىلىكتى تاۋار وندىرۋشىلەردىڭ جارمەڭكەدەگى تىكەلەي ساتىلىمىنىڭ ەسەبىنەن باعالار نارىقتاعىدان تومەن بولعان. بۇدان بولەك، ول  اكك تۇراقتاندىرۋ قورىنا ازىق-تۇلىك تاۋارلارىن جەتكىزۋ بويىنشا جالپى سومماسى 752،3 ملن تەڭگەنى قۇرايتىن فيۋچەرلىك/فورۆاردتىق  كەلىسىم شارتتارعا قول قويىلعانىن جەتكىزدى.

ايتا كەتەيىك، بۇگىنگى تاڭدا تۇراقتاندىرۋ قورىندا – 1 مىڭ توننا قانت،  2 مىڭ توننا كارتوپ،  1 مىڭ توننا پياز، ءسابىز 1 200 توننا،  كۇرىش 70 توننا، ال  سيىر ەتى  200 جانە 30 توننا ماكارون ونىمدەرى بار.  مۇنان بولەك، قويمادا وتكەن جىلى الىنعان تاۋارلاردان قالعان 2500 توننا ۇن، 1 244 توننا قانت جانە 69،1 توننا كۇرىش ساقتالۋدا.

جيىندى قورىتىندىلاعان وبلىس اكىمى ازىق-تۇلىك باعالارىنىڭ ءوسۋى حالىقتى الاڭداتاتىن ەڭ ماڭىزدى ماسەلە ەكەنىن ايتىپ، ءاربىر اۋدان، قالا اكىمدەرىنە تۇرعىنداردىڭ كۇندەلىكتى تۇتىناتىن تاۋار باعالارىنىڭ وسۋىنە جول بەرمەۋدى نىقتاپ تاپسىردى.

وقو اكىمىنىڭ باسپا ءسوز قىزمەتى