وڭتۇستىك قازاقستان وبلىسىندا سۋعا شومىلۋ جانە جىلىتۋ ماۋسىمىنداعى وقىس وقيعالار سانى وتكەن جىلدىڭ ءتيىستى مەرزىمىمەن سالىستىرعاندا ازايدى. بۇل تۋرالى وقو وڭىرلىك كوممۋنيكاسيالار قىزمەتىندە وتكەن باسپا ءسوز جينالىسىندا وبلىستىق توتەنشە جاعداي دەپارتامەنتىنىڭ وكىلدەرى مالىمدەدى. بريفينگتە ءسوز العان دەپارتامەنتتىڭ توتەنشە جاعدايلاردى جويۋ ءبولىمىنىڭ باستىعى نۇرجان اسىبەكوۆتىڭ ايتۋىنشا، دەپارتامەنت پەن جەرگىلىكتى پوليسيا قىزمەتكەرلەرىنىڭ جۇمىلا جۇمىس اتقارۋى وڭ ناتيجە بەرىپ وتىر.

– جىل باسىنان بەرى سۋعا كەتكەن ادامدار سانى 71-دەن 31 ادامعا دەيىن، ياعني، 56 پايىزعا كەمىدى. بيىلعى 1 قازانداعى جاعداي بويىنشا وبلىستىڭ سۋ ايدىندارىندا 31 ادامنىڭ سۋدا قازا بولۋ وقيعاسى تىركەلدى، ونىڭ ىشىندە 17ء-سى – بالالار مەن جاسوسپىرىمدەر. شىلدە-تامىز ايىندا ادامداردىڭ كوپ قازا بولۋى سۋ ايدىندارىندا تىركەلىپ وتىر. بۇل ەڭبەك دەمالىسى مەن جازعى دەمالىس كەزەڭىمەن بايلانىستى، – دەدى ن.اسىبەكوۆ.

ءبولىم باسشىسىنىڭ ايتۋىنشا، وقىس وقيعالاردىڭ نەگىزگى سەبەپتەرى جابدىقتالماعان سۋ ايدىندارىندا سۋعا شومىلۋ، بالالاردىڭ ەرەسەك ادامداردىڭ قاراۋىنسىز قالۋى، سۋداعى قاۋىپسىزدىكتىڭ قاراپايىم قاعيدالارىن بۇزۋ بولىپ وتىر. ەندى كۇن سۋىتسا دا سۋ ايدىندارىنداعى قاۋىپسىزدىك ماسەلەسى ءالى وزەكتى، سەبەبى كۇز بەن قىستا بالىق اۋلاۋ كەزەڭى باستالىپ كەتتى. بۇعان قوسا جىلىتۋ ماۋسىمىنداعى وقىس وقيعالار دا ازايىپ وتىر. توتەنشە جاعداي دەپارتامەنتى وكىلدەرىنىڭ ايتۋىنشا، وقو-دا 2017 جىلعى جىلىتۋ ماۋسىمىندا ۋلى گازبەن ۋلانۋدىڭ  24 وقيعاسى تىركەلدى.

«2017 جىلدىڭ ءقاڭتار-ساۋىر ايلارى ارالىعىندا ءيسى گازىمەن ۋلانۋدىڭ 24 وقيعاسى تىركەلدى. سونىڭ سالدارىنان 46 ادام زارداپ شەكتى، ونىڭ ىشىندە  11ء-ى قايتىس بولدى. وتكەن جىلمەن سالىستىرعاندا تىركەلگەن وقيعا مەن زارداپ شەككەن ادامدار سانى ازايدى. سالىستىرۋ ءۇشىن ايتساق، 2016 جىلى 29 وقيعا تىركەلىپ، 76 ادام زارداپ شەكتى. 28 ادام قايتىس بولعان ەدى»، – دەيدى ءورت قاۋىپسىزدىگى سالاسىنداعى باقىلاۋ جانە الدىن الۋ قىزمەتى باسقارماسى باستىعىنىڭ ورىنباسارى باۋىرجان ءىزباساروۆ.

بارلىق وقيعالاردى دەپارتامەنت ماماندارى زەردەلەپ شىعىپ، ادامدار ۋلانۋعا قاتىستى 24 وقيعانىڭ 21ء-ى – تابيعي گازبەن ۋلانۋ، ال ۇشەۋى قاتتى وتىن جاعىلاتىن پەشتى قولدانعاندا ورىن العانىن انىقتادى. كوبىسى، ياعني، 21 فاكتى جەكە ۇيدە بولسا، قوعامدىق مونشادا 2 وقيعا تىركەلگەن. ۋلانۋدىڭ نەگىزگى سەبەپتەرى – جارامسىز پەشتەردى پايدالانۋ مەن تۇرمىستىق گاز قۇرىلعىلارىن پايدالانۋ كەزىندە ءورت قاۋىپسىزدىك قاعيدالارىنىڭ بۇزىلۋى. سونداي-اق ۋلى گازبەن ۋلانعانداردىڭ باسىم كوبىسى ۇيقىدا بولعان. ەندى وسىنداي كەلەڭسىزدىكتەردىڭ الدىن الۋ ماقساتىندا دەپارتامەنت ماماندارى الدىن الۋ ءىس-شارالارىن باستاپ كەتكەن.  ماسەلەن، 1 قىركۇيەكتەن باستاپ تۇرعىن ءۇي سەكتورلارىندا ءورت قاۋىپسىزدىگى ايلىعى وتكىزىلۋدە.

وقو اكىمىنىڭ باسپا ءسوز قىزمەتى