جاڭادان قۇرىلعان كووپەراتيۆتەردىڭ تىنىس-تىرىشلىگىمەن تانىسۋ ماقساتىندا ارنايى باسپا ءسوز تۋرى ۇيىمداستىرىلىپ، وندا ب ا ق وكىلدەرى قازىعۇرت اۋدانىنداعى «حانشايىم» كووپەراتيۆىنە باردى. سەرىكتەستىك مال بورداقىلاپ، ونىڭ ەتىن وتكىزۋمەن اينالىسادى. سەكسەنگە جۋىق مۇشەسى بار كووپەراتيۆتە بۇگىندە 1000-نان استام ءىرى قارا بورداقىلانۋدا. سونىمەن قاتار، ونىڭ مەنشىگىندە 50 باسقا ارنالعان مال سويۋ بەكەتى مەن ارنايى قويمالار قاراستىرىلعان.
مەملەكەتتەن جەڭىلدەتىلگەن نەسيە الۋ ءىسى قولجەتىمدى بولا تۇسكەنىن ايتقان كووپەراتيۆ ءتوراعاسى سىرىم ەرتايەۆ دايىن ءونىمدى وتكىزۋدە كەدەرگىلەر جويىلىپ، ەتتى ەكسپورتتاۋعا مۇمكىندىك مولايعانىن اتاپ ءوتتى.
ونىڭ ايتۋىنشا، بۇگىندە مال ەتىن وتكىزۋ ءۇشىن ەلىمىزدىڭ وزگە ايماقتارىنان بولەك، وزبەكستان جانە اۋعانستانمەن كەلىسسوزدەر جۇرگىزىلۋدە. سونىمەن قاتار، كووپەراتيۆ مۇشەلەرى مەملەكەت تاراپىنان بەرىلەتىن سۋبسيديا مەن جەڭىلدەتىلگەن نەسيەلەر الۋ ءۇشىن قۇجاتتار دايىنداۋ ۇستىندە. «حانشايىم» كووپەرتيۆىنە مۇشەلىككە ەنگەندەردىڭ ءبىرى جەڭىس سلامبايەۆ.
– جەكە شارۋا ءۇيىنىڭ اۋلاسىندا 40-قا جۋىق ءىرى قارانى بورداقىلاۋدا. بۇرىن ەتتى وتكىزۋ جايى اجەپتەۋىر ويلاندىراتىن بولسا، كووپەاراتيۆكە كىرگەلى بەرى بۇل ىسكە باس قاتىرمايتىن بولدىق دەيدى. وعان قوسا مەملەكەت تاراپىنان بۇقانىڭ ءار باسىنا 20 مىڭ تەڭگە سۋبسيديا الامىز. كەلەشەكتە كووپەراتيۆ اتىنان 6 پايىزبەن نەسيە الىپ، مال باسىن 100-گە دەيىن جەتكىزسەم دەگەن ماقساتىم بار، – دەيدى ول.
بۇدان كەيىن ب ا ق وكىلدەرى شاراپحانا اۋىلىنداعى «قاراتاس» اۋىل شارۋاشىلىعى كووپەراتيۆىندە بولدى. اتالعان سەرىكتەستىك ءسۇت ونىدىرۋمەن اينالىسادى. جىلدىڭ باسىندا قۇرىلعان كووپەراتيۆكە بۇگىندە 86 شارۋا مۇشە. ۇجىمنىڭ قاراماعىندا 700-گە جۋىق ءىرى قارا بولسا، ونىڭ 150 باسى ساۋىن سيىرلار. كووپەراتيۆ تاۋلىگىنە 1،2 توننا ءسۇت وندىرەدى.
سەركىتەستىكتىڭ 30 مۇشەسى جۋىردا «اۋىل شارۋاشلىعىن قارجىلاۋ قولداۋ قورى» ارقىلى 130 ملن تەڭگە كولەمىندە جەڭىلدەتىلگەن نەسيەگە قول جەتكىزگەن. اتالعان قارجىعا ساۋىن سيىرلار ساتىپ الىنۋدا. ياعني ءونىم كولەمىنىڭ ارتۋىنا بايلانىستى كووپەراتيۆ سىيىمدىلىعى 2 توننالىق ءسۇت ساقتايتىن تانكەر الۋدى جوسپارلاپ وتىر. شىعىننىڭ 50 پايىزىن مەملەكەت وتەپ بەرەدى. دەمەك، كەلەشەكتە سەرىكتەستىك تاۋلىگىنە 3 تونناعا دەيىن ءسۇت وندىرمەك.
جالپى، 2021 جىلعا دەيىن وقو-دا 90 مىڭعا جۋىق جەكە شارۋا قوجالىقتارىن بىرىكتىرەنتىن 600-دەن استام كووپەراتيۆتەر قۇرىلادى دەپ جوسپارلانۋدا.
وقو اكىمدىگى باسپا ءسوز قىزمەتى
