جالپى، يران يسلام مەملەكەتى جىلىنا 2 ملن. 400 مىڭ تونناعا جۋىق قوي ەتىن تۇتىنادى. بۇل قازاقستان ءۇشىن ەت ەسكپورتىن ارتتىرۋعا زور مۇمكىندىك. وسىنى ءتيىمدى پايدالانىپ وتىرعان «قايىپ اتا» جشس-گى بۇگىندە ەت ەكسپورتتاۋ ءىسىن مىقتاپ قولعا العان. قالا ىرگەسىندە ورنالاسقان سەرىكتەستىكتىڭ مال سويۋ بەكەتىندە تاۋلىگىنە 1000 باسقا جۋىق ۇساق مال سويىلىپ، ارنايى قاپتامالارمالارعا سالىنادى. حالىقارالىق تالاپتارعا ساي ەتىپ سالىنعان كەشەندە مال سويۋعا بارلىق جاعداي جاسالعان. كەشەندە مال سويۋ ورىندارى، قويمالار مەن ارنايى توڭازىتقىشتار ورناتىلعان. بۇل جۇمىستىڭ ونىمدىلىگى مەن ساپاسىنىڭ ارتۋىنا ىقپال ەتەدى.
«قايىپ اتا» ءجشس-نىڭ مال بورداقىلاۋ كەشەنى قازىعۇرت اۋدانىنداعى جاڭابازار اۋىلىندا ورنالاسقان. كەشەندە بۇگىندە 5 مىڭعا جۋىق ءىرى قارا بورداقىلانۋدا. سونداي-اق سەرىكتەستىكتىڭ ەنشىسىندە 20 مىڭ باس ۇساق مالعا ارنالعان قورا بار. كەشەندە وسىرىلەتىن ءتورت تۇلىكتىڭ ەتى ەكولوگيالىق جاعىنان تازا ءارى ساپالى بولعاندىقتان سۇرانىس وتە جوعارى. سوندىقتان سەرىكتەستىك ەت ءوندىرىپ قانا قويماي، ونى شەت ەلدەرگە ەكسپورتتاۋ جۇمىسىن دا قولعا العان. ماسەلەن جىل باسىنان بەرى «قايىپ اتا» يرانعا 6 مىڭ باس قوي ەتىن، وزبەكستانعا 300 باس ءىرى قارا مەن 32 جىلقى ەكسپورتتادى.
ودان بولەك، ەل نارىعىنا 393 توننا سيىر ەتى مەن 2 تونناعا جۋىق قوي ەتىن ساۋدالاعان. ناتيجەسىندە مەملەكەت تاراپىنان بيىلدىڭ وزىندە 127،2 ملن. تەڭگە سۋبسيدياعا قول جەتكىزىپتى. «تابىستىڭ كىلتى-بىرىگۋدە» ەكەندىگىن تۇسىنگەن سەرىكتەستىك جىل باسىندا «حانشايىم» كووپەراتيۆىن قۇرعان بولاتىن. بۇگىندە كووپەراتيۆ قۇرامىنا 50-دەن استام شارۋا بىرىككەن. ولاردىڭ بارلىعى مال بورداقىلاۋمەن شۇعىلدانادى. الداعى ۋاقىتتا كووپەراتيۆ مەنشىگىندەگى مالدىڭ سانىن 2000 باس ءىرى قاراعا جەتكىزىپ، جىلىنا 400 توننا ەت ءوندىرۋ جوسپارلانۋدا. بۇل وڭىردەگى ەت ەكسپورتىنىڭ دامۋىنا ەرەكشە سەرپىن بەرمەك.
ەلباسى العا قويعان مىندەتتەردىڭ ءبىرى ەكسپورتتىڭ الەۋەتىن ارتتىرۋ، سونىڭ ىشىندە ەت ەكسپورتتىن دامىتۋ بولاتىن. وڭتۇستىكتە بۇل باعىتتا ناتيجەلى جۇمىستار اتقارىلۋدا. ماسەلەن، اعىمداعى جىلدىڭ 10 ايىندا وڭتۇستىك قازاقستان وبلىسىنان الىس-جاقىن شەت ەلدەرگە 218 توننا ءىرى قارا، 110،8 توننا قوي مەن 2485 توننا قۇس ەتى ەكسپورتتالعان. سونىمەن قاتار، بيىل تمد مەن ەۋروپا ەلدەرىنە 4819 توننا بالىق ەتى جونەلتىلگەن. بۇل جەتىستىكتىڭ بارلىعى مەملەكەتتىك قولداۋلار مەن اگروونەركاسىپ كەشەنىن دامىتۋعا ارنالعان باعدارلامالاردىڭ تيىمدىلىگىنىڭ ارقاسى.
وقو اكىمىنىڭ باسپا ءسوز قىزمەتى
