وڭتۇستىك قازاقستان وبلىسىندا كومىر تاپشىلىعى جوق. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە وبلىستىق ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ باسشىسى مارعۇلان مارايىم ءمالىم ەتتى.

بۇدان بولەك، سپيكەر تۇركىستان قالاسىنداعى تۇرمىستىق-شارۋاشىلىق جاعدايعا كومىر جەتىسپەيتىندىگى تۋرالى «Youtube» جەلىسىندە شىققان بەينەجازبا 2017 جىلى بولعان وقيعا ەكەنىن، بۇگىندە تۇركىستان قالاسى بويىنشا كومىر تاپشىلىعىنىڭ جوقتىعىن ايتتى.

– تۇركىستان قالاسىنىڭ جىلۋ ماۋسىمىنا تۇرمىستىق-شارۋاشىلىققا قاجەتتى كومىر وتىنىنىڭ كەرەكتى كولەمى 90 مىڭ توننانى قۇراسا، ونىڭ بۇگىنگە قامتاماسىز ەتىلگەنى 85 مىڭ توننا. بۇگىنگى تاڭعا، تۇركىستان قالاسىنداعى كومىر بازالارىنداعى وتىننىڭ قورى 1،4 مىڭ توننانى قۇرايدى. قوسىمشا قالاعا كۇندەلىكتى كومىر تاسىمالدانۋدا. وبلىستىق ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسى «قازاقستان تەمىر جولى» كاسىپورنىمەن بىرلەسىپ كومىر تاسىمالداۋ بارىسىنا كۇندەلىكتى مونيتورينگ جۇرگىزىلۋدە، – دەدى م.مارايىم.

بريفينگ بارىسىندا باسقارما باسشىسى ءوڭىر تۇرعىندارى جىلىنا تۇرمىستىق-شارۋاشىلىق كومىرگە قاجەتتىلىگى 1 ملن. توننا ەكەنىن ايتتى. ونىڭ 750 مىڭ تونناسىن تۇرعىندار  پايدالانسا، 250 مىڭ تونناسى جىلى جايلارعا جۇمسالادى. بۇگىنگە وبلىسقا 870 مىڭ توننا كومىر جەتكىزىلگەن بولسا، ونىڭ 19 مىڭ تونناسى كومىر بازالارىندا. جالپى، وبلىسقا كۇنىنە ورتاشا 2،5 مىڭ توننا شاماسىندا كومىر كەلەدى.

وڭتۇستىك وڭىرىنە تۇرمىستىق-شارۋاشىلىق كومىر، نەگىزىنەن قاراعاندى وبلىسىنىڭ «شۇباركول» جانە پاۆلودار وبلىسىنىڭ «مايكوبە» كەندەرىنەن تاسىمالدانادى.

وقو اكىمىنىڭ باسپا ءسوز قىزمەتى

 

https://dalanews.kz/33672