بيىل تۇركىستان وبلىسىنىڭ باس گازەتى «وڭتۇستىك قازاقستان» قوعامدىق-ساياسي گازەتىنىڭ شىعا باستاعانىنا 100 جىل تولىپ وتىر. بۇگىن وبلىس ورتالىعىندا قاراشاڭىراق باسىلىمنىڭ عاسىرلىق تويى اتالىپ ءوتتى. سالتاناتتى جيىنعا قازاقستان رەسپۋبليكاسى پرەزيدەنتىنىڭ كەڭەسشىسى - باسپا ءسوز قىزمەتىنىڭ جەتەكشىسى بەرىك ءۋالي قاتىسىپ، مەملەكەت باسشىسى قاسىم-جومارت توقايەۆتىڭ قۇتتىقتاۋ حاتىن گازەت باسشىسى اباي بالاجانعا تابىستادى. سونىمەن قاتار ءبىرقاتار جۋرناليستەر پرەزيدەنتتىڭ العىس حاتىمەن ماراپاتتالدى.
اۋقىمدى شاراعا تۇركىستان وبلىسىنىڭ اكىمى دارحان ساتىبالدى، ق ر پارلامەنتىنىڭ سەنات دەپۋتاتى اليشەر ساتىبالدييەۆ جانە ق ر پارلامەنتىنىڭ ءماجىلىس دەپۋتتاتى ۇلاسبەك سادىبەكوۆ، باسىلىمنىڭ تاريحىندا قولتاڭباسى قالعان ارداگەر قالامگەرلەر، زيالى قاۋىم وكىلدەرى مەن قالامى قارىمدى جۋرناليستەر قاتىستى.
– سىزدەردى بۇگىنگى مەرەيتويمەن شىن جۇرەكتەن قۇتتىقتايمىن! «وڭتۇستىك قازاقستان» گازەتى – وزىندىك تاريحى بار، باعىت-باعدارى ايقىندالعان، قالىڭ وقىرمانى قالىپتاسقان بەدەلدى باسىلىمداردىڭ ءبىرى. قازاق جۋرناليستيكاسىنداعى جۇيرىكتەر مەن اقيىق اقىندار، كورنەكتى جازۋشىلار، قوعام قايراتكەرلەرى وسىندا قىزمەت ەتىپ، تۇلەپ ۇشتى.
«گازەت– حالىقتىڭ كوزى، قۇلاعى ءھام ءتىلى» دەپ ۇلت قايراتكەرى احمەت بايتۇرسىنوۆ ايتقانداي، وبلىس ايناسىنا اينالعان گازەتىمىز قوعامعا قىزمەت ەتۋ مىندەتىن ابىرويمەن ورىنداپ كەلەدى. جاڭا ءداۋىرى باستالعان، جاڭارعان تۇركىستاننىڭ جاڭاشىل باعىتىن جۇرتشىلىققا جەتكىزىپ جۇرگەن قاراشاڭىراق باسىلىمعا دەگەن قۇرمەتىمىز جوعارى. وقىرماندارىڭىز كوپ، قالامدارىڭىز قۋاتتى، ءار كۇندەرىڭىز شۋاقتى بولسىن! – دەگەن وبلىس اكىمى شىعارماشىلىق ۇجىمنىڭ بىرنەشە وكىلىن ماراپاتتادى. سونداي-اق گازەت ۇجىمىنا جەڭىل اۆتوكولىك تابىستادى.
جيىن بارىسىندا وبلىس اكىمىنىڭ ورىنباسارى ەرتاي التايەۆ باسىلىمنىڭ جۋرناليستەرىن ق ر«اقپارات سالاسىنىڭ ۇزدىگى» توسبەلگىسىمەن، ق ر مادەنيەت جانە اقپارات مينيسترلىگىنىڭ قۇرمەت گراماتوسىمەن جانە العىس حاتىمەن ماراپاتتادى. ارنايى قاتىسقان قۇرمەتتى قوناقتار ىزگى لەبىزىن ءبىلدىردى.
مەرەيلى كۇنگە وراي بىرنەشە ءىس-شارا جوسپارلانعان. كۇنى كەشە وبلىس ورتالىعىنداعى «جىبەك جولى» ساياباعىندا «وڭتۇستىك قازاقستان» گازەتىنىڭ اللەياسى اشىلدى. وعان ءوڭىردىڭ زيالى قاۋىم وكىلدەرى مەن گازەت رەداكسياسىنىڭ ۇجىمى قاتىسىپ، 100 جىلدىق مەرەيتويعا وراي 100 ءتۇپ كوشەت وتىرعىزدى. ال بۇگىن «وڭتۇستىك قازاقستان» – تاريح تولقىنىندا» اتتى عىلىمي-پراكتيكالىق كونفەرەنسيا وتكىزىلدى. وندا جۋرناليستيكانى دامىتۋ جولدارى، تىڭ يدەيالار ايتىلدى. سونىمەن قاتار گازەتتىڭ تاريحىنان سىر شەرتەتىن فوتوكورمە كوپشىلىك نازارىنا ۇسىنىلدى. ءارى قاراي سالتاناتتى جيىن مەرەكەلىك كونسەرتكە ۇلاستى. وندا وبلىستىڭ ونەرپازدارى جۇرتشىلىققا كوتەرىڭكى كوڭىل-كۇي سىيلادى.
باسىلىم جولى سۇلتانبەك قوجانوۆ پەن تۇرار رىسقۇلوۆ سياقتى قايراتكەرلەر نەگىزىن قالاعان «اقجول» گازەتىنەن باستاۋ الادى. بۇل گازەتتە قازاق رۋحانياتى مەن جۋرناليستيكاسىنا ەڭبەك سىڭىرگەن قالامگەرلەر مەن جۋرناليستەردىڭ، ەل جاناشىرلارىنىڭ قالامىنىڭ ءىزى قالعان. وڭتۇستىك جۋرناليستەرىنىڭ قاسيەتتى قاراشاڭىراعى قازىرگى تاڭدا مەملەكەت باسشىسى قاسىم-جومارت توقايەۆتىڭ سارا ساياساتىن ەلگە كەڭىنەن ءتۇسىندىرىپ، تۇركىستان ءوڭىرىنىڭ دامۋىنا ۇلەس قوسۋدا. گازەت ۇجىمى تەك جۋرناليستيكامەن شەكتەلمەي، ۇلتتىق قۇندىلىقتاردى دارىپتەۋگە باستاماشى بولىپ ءجۇر. وعان دالەل رەتىندە قازاق كۇرەسىنەن «وڭتۇستىك قازاقستان» گازەتىنىڭ ءداستۇرلى ءتۋرنيرىن، جاس جىرشىلار بايقاۋىن ايتۋعا بولادى.
ايتا كەتەيىك، ءبىر عاسىردا «وڭتۇستىك قازاقستان» گازەتىنە 30-دان استام بىلىكتى جۋرناليستەر رەداكتورلىق ەتتى. سولاردىڭ اراسىندا رەداكتور اسەت تىلەۋكەيەۆ، امىرسەيىت الييەۆ، كارىم ۇكىبايەۆ، انار باكىروۆا سىندى قايراتكەر تۇلعالار گازەت تاريحىندا قالدى.
بۇگىندە 21 مىڭ 650ء-شى سانى جارىق كورىپ وتىرعان باسىلىم وڭتۇستىك ايماق قانا ەمەس، ەلىمىزدەگى تاريحي گازەتتەردىڭ ءبىرى
