پرەمەر-مينيستر ولجاس بەكتەنوۆ مەملەكەت باسشىسى قاسىم-جومارت توقايەۆتىڭ تاپسىرمالارىنىڭ ورىندالۋ بارىسىمەن تانىسۋ ءۇشىن سولتۇستىك قازاقستان وبلىسىنا جۇمىس ساپارىمەن باردى. ۇكىمەت باسشىسى باعدارلاما شەڭبەرىندە كوممۋنالدىق-ەنەرگەتيكالىق سەكتور جانە جول ينفراقۇرىلىمى نىساندارىنىڭ، سونداي-اق، ءبىرقاتار جەڭىل جانە وڭدەۋ ونەركاسىبىنىڭ، اتاپ ايتقاندا، اۋىل شارۋاشىلىعى ماشينا جاساۋ كاسىپورىندارىنىڭ جۇمىسىمەن تانىسادى، - دەپ حابارلايدى Dalanews.kz.

جۇمىس ساپارى بارىسىندا وڭىردەگى سۋ قويمالارىنىڭ جاي-كۇيى مەن سۋ تاسقىنىنا قارسى ءىس-شارالاردى ساپالى ءارى ۋاقتىلى جۇرگىزۋ جۇمىسىنا ەرەكشە نازار اۋدارىلدى. سولتۇستىك قازاقستان وبلىسى سۋ تاسقىنى ءقاۋپى بار ايماققا كىرەدى. وبلىستىڭ نەگىزگى سۋ كوزى – ەسىل وزەنى ءۇش سۋ قويماسى: استانا، سەرگەيەۆ جانە پەتروپاۆل سۋ توراپتارىمەن رەتتەلەدى. 

ۇكىمەت باسشىسى پەتروپاۆل سۋ تورابىنا بارىپ، سۋ قويماسىنىڭ اعىمداعى جاعدايىن تەكسەردى. قازىرگى ۋاقىتتا ول قالىپتى جاعدايدا جانە شتاتتىق رەجيمدە جۇمىس ىستەپ تۇر. سۋ تاسقىنى كەزەڭىندە سۋ قويماسى الگوريتمگە سايكەس جۇمىستىڭ «ترانزيتتىك رەجيمىنە» اۋىستىرىلادى جانە تاسقىن سۋلاردىڭ وتۋىنە اسەر ەتپەيدى.

سونىمەن قاتار، ولجاس بەكتەنوۆ بىلتىر ساۋىردە شامادان تىس تولىپ كەتكەن سەرگەيەۆ سۋ قويماسىنىڭ جاعدايىنا نازار اۋداردى.

«سۋ قويمالارى بار سەرگەيەۆ جانە پەتروپاۆل سۋ توراپتارى - رەسپۋبليكالىق مەنشىكتەگى سۋ شارۋاشىلىعى قۇرىلىستارىنىڭ تىزبەسىنە ەنگىزىلگەن جانە ەرەكشە ستراتەگيالىق ماڭىزى بار سۋ شارۋاشىلىعى قۇرىلىستارى. سەرگەيەۆ سۋ قويماسىنداعى جينالعان سۋدىڭ كولەمى 82%-دى قۇرايدى. بۇل جەرلەردە ساياجاي ۋچاسكەلەرىن ەرەكشە نازاردا ۇستاۋدى تاپسىرامىن»، - دەدى بەكتەنوۆ.

«قازسۋشار» رمك سقوف ديرەكتورى شۇعايىپ ءيباتۋلليننىڭ ايتۋىنشا، وسى كەزەڭدە سەرگەيەۆ جانە پەتروپاۆل سۋ توراپتارى شتاتتىق رەجيمدە جۇمىس ىستەپ تۇر. الايدا اۆتوجولداعى كوپىرلەردىڭ جەكەلەگەن كونسترۋكسيالارى اپاتتى جاعدايدا. وسىعان بايلانىستى وزگە بالامالى جولدار ارقىلى كولىك اعىنىن قايتا باعىتتاۋ ماسەلەلەرى قاراستىرىلۋدا. جالپى وڭىردە سۋ تاسقىنىنا بەيىم 87 ەلدى مەكەن ەسەپكە الىندى. 24 قاڭتاردان باستاپ وبلىس كۇشەيتىلگەن دايىندىق رەجيمىنە اۋىستىرىلدى، 26 ناۋرىزدان باستاپ جەدەل شتاب جۇمىلدىرىلدى.

پرەمەر-مينيستر سولتۇستىك قازاقستان وبلىسىنىڭ اكىمدىگىنە جوسپارلانعان الدىن الۋ ءىس-شارالارىن اياقتاۋدى، ال تجم-عا سۋ تاسقىنى جاعدايى ۋشىققان جاعدايدا كۇشتەر مەن تەحنيكانى جۇمىلدىرۋدى تاپسىردى.

"وزدەرىڭىز كورىپ وتىرعانداي، ەلىمىزدىڭ ءبىرقاتار وڭىرىندە سۋ دەڭگەيى كوتەرىلىپ، سۋ تاسقىنى ورىن الدى. بارلىق كۇشتەر جۇمىلدىرىلدى. رەسپۋبليكالىق جانە وڭىرلىك جەدەل شتابتار تاۋلىك بويى جۇمىس ىستەۋدە. قازىرگى تاڭدا توتەنشە جاعدايلار، ىشكى ىستەر، قورعانىس مينيسترلىكتەرى مەن ۇلتتىق قاۋىپسىزدىك كوميتەتىنىڭ ارناۋلى كۇشتەرى مەن قۇرالدارى - بارلىعى 4 مىڭعا جۋىق ادام، 1،3 مىڭنان اسا تەحنيكا سۋ تاسقىنىنا قارسى جۇمىستارعا تارتىلدى. جول قاتىناسى قيىن جەرلەردە ادامدار تىكۇشاقتارمەن ەۆاكۋاسيالانۋدا. جۇمىستار ءقاۋىپ تولىق سەيىلگەنشە جالعاساتىن بولادى. جاعداي قاتاڭ باقىلاۋدا. زارداپ شەككەندەرگە ۇكىمەت جانە اكىمدىك تاراپىنان قاجەتتى كومەك كورسەتىلەدى»، - دەدى ولجاس بەكتەنوۆ.

سقو-عا جۇمىس ساپارى الدىندا ۇكىمەت باسشىسى ولجاس بەكتەنوۆ وڭىرلەردىڭ اكىمدەرى مەن توتەنشە جاعدايلار ءمينيسترى شىڭعىس ءارىنوۆتىڭ سۋ تاسقىنى جاعدايىن باقىلاۋ بويىنشا جۇرگىزىلىپ جاتقان جۇمىستار تۋرالى ەسەپتەرىن تىڭدادى.