پرەمەر-مينيستر ولجاس بەكتەنوۆ اباي وبلىسىنا جۇمىس ساپارى اياسىندا «سەمەي ورمانى» تابيعي رەزەرۆاتى اۋماعىن اۋەدەن تەكسەرىپ، مەملەكەت باسشىسىنىڭ ورتەنگەن قاراعايلى ورماندى قالپىنا كەلتىرۋ جانە ءورتتىڭ الدىن الۋ، ورمان شارۋاشىلىعىنداعى ماسەلەلەردى شەشۋ جونىندەگى تاپسىرمالارىنىڭ ورىندالۋىن تەكسەردى.
بۇگىنگى تاڭدا بىلتىرعى ماۋسىم ايىندا ورىن العان، 66 مىڭ گەكتارعا جۋىق ورمان قورى زارداپ شەككەن ءىرى ورمان ءورتىنىڭ سالدارىن جويۋ ماقساتىندا اعاشتاردى كوبەيتۋ جۇمىستارى جۇرگىزىلۋدە.
ۇكىمەت باسشىسى تابيعي رەزەرۆات اۋماعىنداعى ورمان ءتالىمباعى كەشەنى مەن اعاش تۇقىمى ستانساسىن ارالاپ كوردى، وندا زاماناۋي شۆەد جابدىقتارى ارقىلى جەدەلدەتىلگەن تەحنولوگيا بويىنشا جابىق تامىر جۇيەسى بار قاراعاي كوشەتتەرى وسىرىلەدى. ءبىر جىلدا ماماندار ەكى رەت: جالپى 3 ملن كوشەتكە دەيىن الادى. جابىق تامىر جۇيەسى بار كوشەتتەردىڭ ساپاسى ءداستۇرلى ادىسپەن وسىرىلەتىندەردەن جوعارى، بۇل ورمان داقىلدارىنىڭ جوعارى دەڭگەيدە جەرسىنۋىن قامتاماسىز ەتەدى. سونداي-اق رەزەرۆات اۋماعىندا ەرتىس ءوڭىرىنىڭ تاسپا قاراعايىن ءوسىرۋ جانە قالپىنا كەلتىرۋ جوبالارى ىسكە اسىرىلۋدا. سونىمەن قاتار «تازا قازاقستان» ەكولوگيالىق اكسياسى اياسىندا «سەمەي ورمانى» رەزەرۆاتىنىڭ اۋماعىنا 70 مىڭنان استام كوشەت وتىرعىزىلدى.
سونىمەن قاتار ساۋ كوشەتتەردى ءدىڭ زيانكەستەرىنىڭ تارالۋىنان جانە قۋراپ جاتقان ورماننىڭ جاڭا وشاقتارىنىڭ پايدا بولۋىنان ساقتاۋ جانە قورعاۋ ماقساتىندا ورتەنگەن سۇرەكدىڭدەر كەسىلەدى. كۇيگەن اعاشتاردى كادەگە جاراتۋ جانە قايتا وڭدەۋ ءۇشىن وڭىردە دايىن ءونىم – لابت، اجت، ببت، وتىن بريكەتتەرىن شىعاراتىن اعاش وڭدەۋ كەشەنىن سالۋعا 7،5 ملرد تەڭگە كولەمىندە ينۆەستيسيا تارتىلدى. بۇگىنگى تاڭدا سەمەي قالاسىنىڭ يندۋستريالدى ايماعىنداعى 55 گا جەر تەلىمىن تىركەۋ ءراسىمى جۇرگىزىلۋدە. بۇل رەتتە وتكەن جىلى تابيعي رەزەرۆات اۋماعىندا ءوز كۇشىمەن 38،3 مىڭ تەكشە مەتر جۇمىر اعاش دايىندالدى. جوبا اياسىندا 530 جۇمىس ورنىن اشۋ جوسپارلانىپ وتىر.
ۇكىمەت باسشىسى «سەمەي ورمانى» اۋماعىندا قۇقىقتىق ءتارتىپتىڭ ساقتالۋىن قاتاڭ باقىلاۋ قاجەتتىگىن اتاپ ءوتتى. بۇگىندە ىشكى ىستەر مينيسترلىگى مەن ۇلتتىق قاۋىپسىزدىك كوميتەتىنىڭ قىزمەتكەرلەرى پروكۋراتۋرانىڭ ۇيلەستىرۋىمەن ورماندى زاڭسىز كەسۋ جانە ۇرلاۋ فاكتىلەرىن انىقتادى.
«وتكەن جىلى الاپات ءورت ورىن الدى – ءبىز 66 مىڭ گا ورمان قورىن جوعالتتىق. بۇل بۇكىل “سەمەي ورمانى” القابىنىڭ وننان ءبىر بولىگى، سوندىقتان ورمان ورتتەرىنىڭ الدىن الۋ وتە ماڭىزدى مىندەت. ءبىز پرەزيدەنتتىڭ تاپسىرماسى بويىنشا بيىل ءبىرىنشى بولىپ سوققى قابىلدايتىن تجم جانە ورمان شارۋاشىلىعى قۇرىلىمدارىن تەحنيكامەن جابدىقتاۋ باعدارلاماسىن قولعا الدىق. اتالعان باعدارلامانى جالعاستىرىپ، سىزدەردى زاماناۋي تەحنيكامەن قامتاماسىز ەتەمىز. ايتقىم كەلگەن تاعى ءبىر ماڭىزدى ماسەلە – زاڭسىز اعاش كەسۋمەن اينالىساتىن ۇيىمداسقان قىلمىستىق توپتار تۋرالى. ولارمەن كۇرەسۋ كەرەك. سىزدەر ولاردىڭ بار ەكەنىن مەنەن جاقسى بىلەسىزدەر. مەن ءتىپتى جەكەلەگەن قىزمەتكەرلەرگە زاڭسىز اعاش كەسۋگە كەدەرگى كەلتىرمەۋ ءقاۋپى ءتونىپ تۇرعانىن بىلەمىن. مىنە، مۇنىمەن كۇرەسۋ كەرەك. بۇل جەردە ىشكى ىستەر مينيسترلىگى وتە مۇقيات نازار اۋدارۋى قاجەت. ورمان – ءبىزدىڭ ۇلتتىق بايلىعىمىز. زاڭسىز اعاش كەسۋمەن اينالىساتىندار – مەملەكەتتىڭ جاۋى. مۇندا بۇكىل مەملەكەت كۇش سالىپ، تۇبەگەيلى سوققى بەرۋى كەرەك. بۇل سىزدەردىڭ جانە قۇقىق قورعاۋ ورگاندارىنىڭ مىندەتى»، — دەپ اتاپ ءوتتى ولجاس بەكتەنوۆ.
سونىمەن قاتار پرەمەر-مينيستر ماتەريالدى-تەحنيكالىق بازانى جاڭارتۋ، ورمان شارۋاشىلىعى قىزمەتكەرلەرىن قولداۋ شارالارى ماسەلەلەرىن كوتەردى. ماسەلەن، 2023-2027 جىلدارعا ارنالعان «سەمەي ورمانى» رەزەرۆاتى ءۇشىن ماتەريالدىق تەحنيكالىق جاراقتاندىرۋدى كەزەڭ-كەزەڭىمەن نىعايتۋ جونىندەگى كەشەندى جوسپار شەڭبەرىندە بىلتىر جالپى سوماسى 1،4 ملرد تەڭگەگە 37 بىرلىك ارنايى تەحنيكا، ونىڭ ىشىندە ءورت ءسوندىرۋ ماشينالارى، شاعىن ورمان ءورت كەشەندەرى، تراكتور، پاترۋلدىك اۆتوكولىك ساتىپ الىندى. جۇمىس جالعاسۋدا.
پرەزيدەنتتىڭ تاپسىرماسى بويىنشا ورمان جانە تابيعاتتى قورعاۋ ۇيىمدارى قىزمەتكەرلەرىن قولداۋ ماقساتىندا وتكەن جىلى مەملەكەتتىك ورمان كۇزەتىنىڭ 12 876 قىزمەتكەرىنىڭ جالاقىسى 100%-عا كوتەرىلدى. بيىل ۇكىمەت قاۋلىسىمەن 1 شىلدەدەن باستاپ ەلىمىزدەگى ورمان جانە تابيعاتتى قورعاۋ مەكەمەلەرىنىڭ قىزمەتكەرلەرى لاۋازىمدىق جالاقىلارىنا ۇستەمەاقى الا باستادى. ورمان ءورت ءسوندىرۋ بەكەتتەرىنىڭ، ورمان شارۋاشىلىعى مەكەمەلەرىنىڭ، تابيعاتتى قورعاۋ جانە ورمان ورنالاستىرۋ ۇيىمدارى قىزمەتكەرلەرىنىڭ لاۋازىمدىق جالاقىسىنا 100%-عا دەيىن ۇستەمەاقى الادى. بارلىعى 3،3 مىڭعا جۋىق قىزمەتكەر قوسىمشا اقىمەن قامتىلدى. اتالعان ماقساتتار ءۇشىن 2024-2027 جىلدارعا رەسپۋبليكالىق بيۋدجەتتەن 8،4 ملرد تەڭگە قاراستىرىلعان.
ۇكىمەت باسشىسى ءورت قاۋىپسىزدىگىنىڭ ماڭىزدىلىعىنا توقتالىپ، «سەمەي ورمانى» رەزەرۆاتىنىڭ، وبلىستىق توتەنشە جاعدايلار دەپارتامەنتى مەن اكىمدىككە ورتكە قارسى قىزمەتتەردىڭ كۇشتەرى مەن قۇرالدارىنىڭ تۇراقتى ازىرلىگىن قامتاماسىز ەتۋدى تاپسىردى.
«ورمان القاپتارىن ساقتاۋ ماسەلەسى جانە ورتكە قارسى شارالاردى قابىلداۋ ءبىزدىڭ ەرەكشە نازارىمىزدا بولادى. مۇنداي اپاتتاردىڭ قايتالانۋىنا جول بەرۋگە بولمايدى. اپاتتىڭ الدىن الۋ شارالارىن قاعاز جۇزىندە ەمەس، ناقتى ءىس جۇزىندە تولىقتاي جۇزەگە اسىرۋ ماڭىزدى. ول ءۇشىن ءبىز رەزەرۆاتتى جاراقتاندىرۋدى جالعاستىرامىز، ونىڭ ىشىندە ورمان ورتتەرىن ەرتە انىقتاۋ جۇيەسىن ورناتامىز»، — دەپ اتاپ ءوتتى ولجاس بەكتەنوۆ.
ەكولوگيا جانە تابيعي رەسۋرستار مينيسترلىگىنە اباي وبلىسىنىڭ اكىمدىگىمەن جانە مۇددەلى مەملەكەتتىك ورگاندارمەن بىرلەسىپ، «سەمەي ورمانىن» ماتەريالدىق-تەحنيكالىق جاراقتاندىرۋ جانە ورمان القابىن مولايتۋ جونىندەگى جۇمىستاردى جالعاستىرۋ، سونداي-اق كۇيگەن اعاشتاردى كادەگە اسىرۋ جونىندەگى جوبانى ىسكە اسىرۋعا قولداۋ كورسەتۋ تاپسىرىلدى.
انىقتاما: بۇگىنگى تاڭدا اباي وبلىسىندا تابيعي ورتتەردىڭ الدىن الۋ جانە دەر كەزىندە ارەكەت ەتۋ ماقساتىندا 132 ادامنان تۇراتىن 32 ءموبيلدى توپ قۇرىلدى. «قازاۆياقۇتقارۋ» تىكۇشاعى كەزەكشىلىكتە جانە اۋماقتى پاترۋلدەۋ جۇرگىزىلەدى. 404 رەيدتىك ءىس-شارا وتكىزىلدى، 109 ءتارتىپ بۇزۋشى اكىمشىلىك جاۋاپكەرشىلىككە تارتىلدى.