الەۋمەتتىك جەلىدە نىعماتۋللين، جاقسىبەكوۆ جانە ءمامين ۇشتىگىنىڭ ەلورداداعى مەيرامحانالاردىڭ بىرىندە كەزدەسۋى قىزۋ تالقىلانۋدا. بۇگىن وسى كەزدەسۋگە قاتىستى اسقار ءمامين وزدەرىنىڭ قازاقتىڭ جورالعىسىمەن سىرعا سالۋ ماسەلەسىن ءسوز ەتكەنىن ايتىپ، ەلدىڭ نازارىن باسقا جاققا اۋدارۋعا تىرىسىپتى.

قازاقتىڭ ءجون-جورالعىسى بويىنشا سىرعا سالۋدى ايەلدەر ءوزارا شەشەدى ەمەس پە؟ بۇلاردىڭ قازاقستاندى گۇلدەندىرىپ، ەندى سىرعا سالعانى قالىپ ەدى.

ءبىراق ءبىر وتىرىكتى ءبىر وتىرىكپەن جاماۋدا الدىنا قارا سالدىرمايتىن اسەكەڭ وسى جولى تاعى دا جازىق جەردە سۇرىنگەنىن ءوزى دە بايقاماي قالعانداي...

ايتەۋىر ءماميننىڭ "بالەنشەنىڭ نەمەرەسىن قىرقىننان شىعارۋ ماسەلەسىن اقىلداسىپ وتىرعان ەدىك" دەپ ايتپاعانىنا شۇكىر. وندا اسەكەڭنىڭ بۇل اڭگىمەسى عاسىرلىق "پريكولعا" اينالار ەدى.

ءماميننىڭ سىرعا سالۋعا قاتىستى اڭگىمەسى (ءوزى ءالى كەلىن ءتۇسىرىپ، قىز ۇزاتپاعان با؟) جۇرتتىڭ ۇشتىكتىڭ كەزدەسۋىنە قاتىستى كۇمان-كۇدىگىن ۇلعايتا تۇسكەندەي.

ءماميننىڭ اڭگىمەسىنەن كەيىن ءۇش نوياننىڭ نەدەي ماسەلەنى تالقىلاعانىن بىلۋگە جۇرتتىڭ قۇشتارلىعى ەسەلەپ ارتا ءتۇستى دەسەك ارتىق ايتقاندىق بولماس.

ۇشتىكتىڭ جولداۋدان كەيىن باسقوسىپ، اقىلداسۋى ولاردىڭ ساياسي كەلەشەگىنە الاڭداپ وتىرعانىن بايقاتسا كەرەك.

ءماميننىڭ سىرعا سالۋ وپەراسياسىنا ەشكىمنىڭ سەنبەگەنى انىق.

بۇگىن "نۇرلان ءنىعماتۋليننىڭ دۋبايعا ۇشىپ بارادى" دەگەن فوتولار الەۋمەتتىك جەلىدە جاريالانىپ، ءماميننىڭ سىرعا سالۋعا قاتىستى اڭگىمەسىن تاس-تالقانىن شىعارعانداي بولدى.

نازاربايەۆ كەزەڭىندە بۇل ۇشتىك ىقپالدى فيگۋرا بولعانى بارشاعا ءمالىم. بۇلار توقايەۆتىڭ جاڭا قازاقستاندى قۇرۋداعى باستاماسىن قولدان كەلگەنشە كەدەرگى جاساپ، دوڭگەلەككە تاياق تىعۋعا دايار وتىر.

نىعماتۋلين ماجىلىستەن كەتكەننەن كەيىن ءوزىنىڭ ءبىراز بيزنەسىنەن ايىرىلعانى بەلگىلى.

ادىلبەك جاقسىبەكوۆ بولسا نازاربايەۆ پرەزيدەنتتىك بيلىكتەن كەتكەننەن كەيىن بيزنەسىن ءبىرشاما رەتتەپ، ساقتىق شارالارىن قابىلداعانىن بىلەمىز. سوندىقتان ادەكەڭ انا ەكەۋىندەي جوعالتاتىن دۇنيەسى كوپ ەمەس.

ال ءماميننىڭ جاعدايى ءماز ەمەس. ول ۇكىمەت باسقارىپ تۇرعان كەزىندە اسەكەڭە قاتىستى توم-توم كومپروماتتار دايىن تۇر دەگەن اڭگىمەلەر جەلدەي ەسۋشى ەدى. جەل سوقپاسا ءشوپتىڭ باسى قيمىلداماسى انىق. سوندىقتان اسەكەڭدى ەلوردادان ۇزاپ شىعا المايتىن تۇساۋلى اتقا تەڭەۋگە بولادى.

جالپى العاندا بۇل ۇشتىككە جاڭا قازاقستاندا ورىن جوق. ونى وزدەرى دە جاقسى بىلەدى. سوندىقتان ءۇش نويانىڭ كەزدەسىپ جۇرگەنى بەكەر ەمەس.

قۇپيا كەزدەسۋ اشكەرە بولعاننان كەيىن ءنىعمايۋلليننىڭ دۋبايدى بەتكە الۋى سەكەم الدىرا تۇسكەندەي... الداعى ۋاقىتتا نۇرەكەڭ الىستا جاتىپ، اڭىسىن اڭدۋى مۇمكىن. ەگەر شىنىمەن دۋبايعا كەتسە، ءبىرازعا دەيىن ەلگە ات ءىزىن سالماۋى مۇمكىن.