تالدىقورعاندا شەرزات بولاتتىڭ ولىمىنە قاتىستى ءىس بويىنشا سوت پروسەسى جالعاسىپ جاتىر. سوت وتىرىسى مارقۇم شەرزات بولاتتىڭ اجەسى جۇمابيكە قادىروۆا جاۋاپ بەرۋدەن باستالدى، - دەپ حابارلايدى Dalanews.kz.

سوت وتىرىسى جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا ءوتىپ جاتىر. ايىپتالۋشىلار ورىندىعىندا توعىز ادام بار، ولاردىڭ ءبىرى كامەلەتكە تولماعان.

شەرزاتتىڭ اجەسى بۇل وقيعاعا دەيىن كۇدىكتىلەردىڭ ەشقايسىن تانىماعانىن مالىمدەدى.

"ساعات 23:00 كەزىندە جۇمىستان كەلدىم. شاي ءىشىپ وتىرعان كەزىمدە كەلىنىمنىڭ تەلەفونىنا حابارلاستى. قارجاۋبايدان ەكەن، "شەرزات بىرەۋدى ۇرىپ قويدى، سوعان نۇرعاناتتى وياتىپ جىبەر" دەدى. نۇرعانات تەز-تەز كيىنىپ كەتتى. تىنىشتىق ەمەس ەكەنىن ءبىلدىم دە، ىزىنشە جۇگىرىپ شىعىپ كەتتىك. تاكسي توقتاتامىن دەگەنشە ون-ون بەس مينۋت ۋاقىت ءوتتى. ماگازينگە باردىق، بارساق ەكى جەردە توپ بولىپ تۇرعان ەكەن. ...تاكسيدەن ءتۇسىپ جاتىپ قارجاۋبايدى دا، نۇرعاناتتى دا ىزدەگەن جوقپىن، بىردەن شەرزاتتى ىزدەي باستادىم. شەرزات كورىنگەن جوق. بالالار ولاي ءۇيىلىپ تۇر دەگەن ويىما كەلگەن جوق. "بىرەۋدى ۇرىپ قويعان ەكەن، اجەسىمىن عوي، بارىپ كەشىرىم سۇرايىن" دەدىم. بالام جەتكەن ادامنىڭ جاعاسىنا جابىسىپ، قول كوتەرىپ جۇرگەن بالا ەمەس. شەكتەن شىعۋشىلىق بولعان شىعار، سوسىن قول كوتەرگەن شىعار دەگەن وي بولدى"، - دەدى مارقۇمنىڭ اجەسى.

جۇمابيكە قادىروۆا سول كۇنگى وقيعانى بايانداپ بەردى.

"شەرزاتتى تاپپادىم. جولدى كەسىپ وتكەن بويىمدا تۇرعان بالالار جۇگىرىپ كەتتى. سول كەزدە شەرزاتتى كورىپ قالدى. الدىنان "ءاي بالالار" دەپ شىققان كەزىمدە كوك سپورت كيىمىندەگى ابزال بار كۇشىمەن تارتىپ جىبەرگەن كەزدە قولىمداعى تەلەفونىم ۇشىپ، جەرگە قۇلاپ قالدىم. ونىڭ ابزال ەكەنىن نۇرعانات ايتتى... نۇرعاناتتىڭ اجالىنا دا وسى بالالار سەبەپشى بولدى. سەبەبى بەتتەستىرۋ كەزىندە نۇرعانات كەلىپ "ماما، ولار قۇمىرسقانى باسىپ كەتكەن ادام سياقتى دا كورىپ وتىرعان جوق" دەدى. ...ءبارىن باستان باستاپ ەسكە ءتۇسىرۋ دە وڭاي ەمەس. ولتىرگەن ادامداردىڭ ءتۇرىن كورۋ دە وڭاي ەمەس"، - دەپ كوزىنە جاس الدى جابىرلەنۋشى تاراپ وكىلى.

شەرزات بولاتتىڭ ءولىمى تۋرالى نە بەلگىلى؟

ەسكە سالايىق، بىلتىر تالعاردا جاپپاي توبەلەس بولىپ، سالدارىنان 16 جاستاعى ءجاسوسپىرىم شەرزات بولات كوز جۇمدى.

كامەلەتكە تولماعان بالانى ءولتىرۋ دەرەگى بويىنشا الماتى وبلىسىنىڭ پوليسيا دەپارتامەنتى قىلمىستىق ءىس قوزعادى. سونداي-اق، ولاردىڭ ءۇيى ورتەنىپ كەتتى.

كوپ ۇزاماي، ياعني 9 جەلتوقساندا مارقۇم شەرزات بولاتتىڭ اعاسى نۇرعانات عايىپبايەۆ اجال قۇشتى. پوليسيا دەپارتامەنتى الدىن الا دەرەكتەر بويىنشا ول سۋيسيد جاساعانىن مالىمدەدى. وعان دالەل رەتىندە پوليسەيلەر نۇرعاناتتىڭ تۋىسىنا مەسسەندجەر ارقىلى جازعان حاتىن جاريا ەتتى. 

ال مارقۇم شەرزاتتىڭ اكەسى باۋىرى نۇرعانات عايىپبايەۆتى جەر قوينىنا تاپسىرعانان كەيىن بۇقارالىق اقپارات قۇرالدارىمەن كەزدەسۋدى تالاپ ەتىپ، كوشەگە شىقتى. الايدا اراعا ۇزاق ۋاقىت سالماي قارجاۋباي نۇرىموۆتى پوليسيا قىزمەتكەرلەرى ۇستاپ اكەتتى. ارتىنشا شەرزات بولاتتىڭ اپكەسى قاماۋعا الىندى. كەيىن قارجاۋباي نۇرىموۆ 15 تاۋلىككە اكىمشىلىك قاماۋعا الىندى.