"مەملەكەت باسشىسى قاسىم-جومارت توقايەۆ تۇركىستان وڭىرىنە جاساعان جۇمىس ساپارى بارىسىندا حالىقپەن كەزدەسىپ، تۇركىستانعا ەرەكشە مارتەبە بەرۋ باستاماسىن كوتەرگەن بولاتىن. وسى باعىتتا ناقتى جۇمىستار قولعا الىنىپ، پارلامەنت ءماجىلىسى مەن سەناتىنان، مەملەكەت باسشىسىنان قولداۋ تاپتى. پرەزيدەنتىمىز زاڭعا قول قويدى. بۇل – تۇركىستان قالاسى عانا ەمەس، تۇتاس ءوڭىرىمىز، ەلىمىز ءۇشىن ماڭىزدى وقيعا. بۇل قۇجاتتا تاريحي-مادەني مۇرانى ساقتاۋ – قوجا احمەت ياساۋي كەسەنەسى مەن باسقا دا ەسكەرتكىشتەردى قورعاۋ، ارحەولوگيالىق جانە عىلىمي-رەستاۆراسيالىق جۇمىستاردى رەتتەۋ، ءتۋريزمدى دامىتۋ، قالانىڭ الەۋەتىن كوتەرۋ جولدارى قارالعان. تۇركىستان – ىقىلىم زاماننان تاريحي ورتالىق بولعان. قوجا احمەت ياساۋي عۇلاما ءومىر سۇرگەن شاھاردا ىزگىلىك پەن ءبىلىم نۇرى شاشىلىپ، شارتاراپقا تاراعان. قازاق حاندىعىنىڭ استاناسى رەتىندە ۇلتىمىزدىڭ ايبىنىن اسىرىپ، حالقىمىزدىڭ بىرلىگى مەن ەرلىگىنىڭ ورداسىنا اينالعان. سوندىقتان بۇل شاھاردىڭ ءمانى دە، ماڭىزى دا، بەدەلى دە، مارتەبەسى دە ءاردايىم بيىك بولاتىنى انىق. ەندى قازاق رۋحانياتىنىڭ تەمىرقازىعىنا اينالعان كيەلى مەكەننىڭ ابىرويى ودان سايىن اسقاقتاپ، رۋحاني جانە تاريحي-مادەني مۇرالارىن قورعاۋ، كەڭىنەن تانىتۋ شارالارى ودان ءارى جاندانا تۇسپەك. تۇركىستاننىڭ تاريحي كەلبەتىن، ەسكەرتكىشتەرى مەن مۇرالارىن ساقتاپ، ۇرپاققا جەتكىزۋ – ۇلكەن جاۋاپكەرشىلىك. تاريحى تەرەڭدە جاتقان تۇركىستان قالاسىن جان-جاقتى دامىتۋ باعىتىنداعى جۇمىستارعا بار كۇش-جىگەرىمىزدى سالامىز. بارشا قازاق ەلىن، تۇركىستان جۇرتشىلىعىن وسى تاريحي ساتپەن شىن جۇرەكتەن قۇتتىقتايمىن! ەلىمىزدىڭ ەڭسەسى بيىك بولىپ، تۇركىستانىمىز دامي بەرسىن!" – دەدى نۇرالحان كوشەروۆ.