اقپاننىڭ سوڭىندا الماتى وبلىسىنىڭ تالعار اۋداندىق سوتى رۋسلان ادايبەكوۆتىڭ تالاپ ارىزى بويىنشا شەشىم شىعاردى. ول ۇلتتىق كومپانيا وزىنە تيەسىلى جەر تەلىمىنە زاڭسىز سورعى ستانسياسىن سالىپ، 0،52 گەكتار اۋماقتى ونىڭ رۇقساتىنسىز باسىپ العانىن ايتتى، دەپ حابارلايدى Dalanews.kz.
تەلەگرام ارناداعى مالىمەتكە سۇيەنسەك، قمگ زاڭگەرلەرى سوتتا بارلىق قاجەتتى رۇقسات پەن جوبالىق قۇجاتتى العاننان كەيىن سورعى ستانسياسىنىڭ سالىنىپ، پايدالانۋعا بەرىلگەنىن دالەلدەدى. ول سورعى گرەك-ريم جانە ەركىن كۇرەس، تاەكۆوندو، كاراتە، كوركەم گيمناستيكا جانە ۆەلوسپورتتان ۇلتتىق قۇراما كوماندا سپورتشىلارى جاتتىعاتىن "اق بۇلاق" شيپاجايىن اۋىز سۋ جانە تەحنيكالىق سۋمەن قامتاماسىز ەتىپ وتىر.
سۋدى ىستەن شىعارعان جاعدايدا، "اق بۇلاق" شيپاجايى جۇمىسىن توقتاتىپ، جۇزدەن استام ادام جۇمىسسىز قالۋى مۇمكىن. بۇل داۋدا سوت ۇلتتىق كومپانيانىڭ پايداسىنا شەشىم شىعاردى.
رۋسلان ادايبەكوۆ – ەكس-پرەزيدەنتتىڭ جيەنى نۇرالى الييەۆتىڭ قايىن ەنەسى لەيلا ادايبەكوۆانىڭ اعاسى. ونىڭ ۇلى ەلنار ادايبەكوۆ 2020 جىلدىڭ ماۋسىمىنان 2023 جىلدىڭ ماۋسىمىنا دەيىن «ترانستەلەكوم» اق باسقارما ءتوراعاسى قىزمەتىن اتقاردى. ال داريعا نازاربايەۆانىڭ تۇڭعىش ۇلى سول اكسيونەرلىك قوعامنىڭ اكسيا يەلەرىنىڭ ءبىرى.
