ەلوردانىڭ بارلىق اۋدانىندا 18 ناۋرىزدان باستاپ ۆەيپ پەن ناسىبايدىڭ زاڭسىز تارالۋى مەن قولدانىلۋىن انىقتاۋ بويىنشا رەيدتەر جۇرگىزىلۋدە. رەيدتىك ءىس-شارالار باستالعاننان بەرى 800-گە جۋىق ساۋدا ورنى تەكسەرىلدى، شەگىلمەيتىن تەمەكى ونىمدەرىن، ونىڭ ىشىندە ناسىباي ءوندىرىسى بويىنشا جەراستى سەحتارىن ارقىلى 160-تان استام فاكتىسى انىقتالدى، دەپ حابارلايدى ەلوردا اكىمدىگىنىڭ رەسمي سايتى.

اكسيانىڭ ماقساتى – ۆەيپكە، تەمەكى ونىمدەرىنە جانە ناسىبايعا تاۋەلدى ەلوردا تۇرعىندارىنىڭ سانىن ازايتۋ.

رەيدكە بەلگىلى مما جاۋىنگەرى، كوپتەگەن حالىقارالىق تۋرنيرلەردىڭ جەڭىمپازى ۆاسيليي تاحتاي قاتىستى.

– ءبىز بىلەتىندەي، بۇگىنگى تاڭدا تەمەكى ونىمدەرى مەن ناسىبايدى پايدالانۋ ءبىزدىڭ قوعامدا وزەكتى ماسەلە بولىپ سانالادى. بۇگىندە كامەلەتكە تولماعاندارعا ناسىباي مەن باسقا دا تەمەكى ونىمدەرىن زاڭسىز ساتۋدى انىقتاۋ ماقساتىندا رەيد جۇرگىزىلۋدە. ءبىزدىڭ ماقساتىمىز – بۇل ماسەلەنى جويۋ جانە جاستاردى سالاۋاتتى ءومىر سالتىنا باعىتتاۋ، – دەدى ۆاسيليي تاحتاي.

ءىس-شارا بارىسىندا دۇكەن ساتۋشىلارىنا پروفيلاكتيكالىق ءتۇسىندىرۋ جۇمىستارى جۇرگىزىلدى.

– وسى جىلدىڭ 18-29 ناۋرىزى ارالىعىندا ءبىز ناسىباي مەن تەمەكى ونىمدەرىن زاڭسىز ساتۋدى انىقتاۋ بويىنشا رەيد جۇرگىزىپ جاتىرمىز. ءىس-شارا بارىسىندا اسفەندياروۆ، انەت بابا، سىعاناق، ر.باعلانوۆ، ۇلى دالا، قايىم مۇحامەداحانوۆ، وتىرار جانە ۇركەر تۇرعىن الابى، يساتاي باتىر كوشەلەرىندە ورنالاسقان 147 دۇكەن بويىنشا ناسىباي مەن ءسنيۋستى زاڭسىز ساتۋ بويىنشا پروفيلاكتيكالىق ءتۇسىندىرۋ جۇمىستارى جۇرگىزىلدى. ناتيجەسىندە 6 دۇكەن اكىمشىلىك قۇقىق بۇزۋشىلىق تۋرالى كودەكستىڭ (اقبتك) 196-بابىنا سايكەس 25 ايلىق ەسەپتىك كورسەتكىش مولشەرىندە ايىپپۇل سالۋمەن اكىمشىلىك جاۋاپكەرشىلىككە تارتىلدى، – دەدى نۇرا اۋدانى اكىمى اپپاراتىنىڭ كاسىپكەرلىك ءبولىمىنىڭ مامانى بەكتەمىر جولداسقاجييەۆ.

ەستەرىڭىزگە سالا كەتەيىك، مەملەكەت باسشىسى قاسىم-جومارت توقايەۆ 2024 جىلعى 15 ناۋرىزدا ۇلتتىق قۇرىلتايدىڭ ءۇشىنشى وتىرىسىندا ەسىرتكى مەن قازاقستاندىقتاردىڭ دەنساۋلىعىنا زياندى باسقا دا زاتتاردىڭ زيانى تۋرالى ايتقان بولاتىن.ناسىباي مەن ءسنيۋستىڭ زاڭسىز تارالۋىن انىقتاۋ بويىنشا رەيدتەر ەلوردانىڭ بارلىق اۋماعىندا جۇرگىزىلۋدە.