نۇر-سۇلتان قالاسى اكىمىنىڭ ورىنباسارى باقتيار ماكەننىڭ ءتوراعالىق ەتۋىمەن قوعامدىق دەنساۋلىق ساقتاۋ باسقارماسىنىڭ وتكەن جىلدى قورىتىندىلاۋعا ارنالعان القا وتىرىسى ءوتتى، دەپ حابارلايدى قالا اكىمدىگىنىڭ رەسمي سايتى.
قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ەلورداداعى دەنساۋلىق ساقتاۋ سالاسىنىڭ وتكەن جىلداعى كورسەتكىشتەرىنە وڭ باعا بەردى.
«2018 جىلمەن سالىستىرعاندا اۋرۋشاڭدىق 9،3%-عا، جالپى ءولىم-جىتىم 2،5%-عا تومەندەدى. انا مەن بالا ءولىمىنىڭ ايتارلىقتاي تومەندەۋى بايقالادى، بالا تۋۋ كورسەتكىشى ارتتى. بۇعان قاتەرلى ىسىكتەر كەزىندە مەديسينالىق كومەك كورسەتۋدىڭ ينتەگراسيالانعان مودەلىن ەنگىزۋ سوڭعى كەزەكتە اسەر ەتكەن جوق.
سونداي-اق سوزىلمالى اۋرۋلار كەزىندە ەمدەۋ مەن دارى-دارمەكپەن قامتاماسىز ەتۋ اتالمىش كورسەتكىشتەردىڭ ازايۋىنا سەبەپ بولدى. ناتيجەسىندە، تۋبەركۋلەزبەن اۋىرۋ 8،3%-عا، تۋبەركۋلەزدەن ءولىم-جىتىم 54%-عا ازايدى. بالالار اراسىندا تۋبەركۋلەزبەن اۋرۋ 19%-عا تومەندەدى»، - دەدى ساۋلە قيسىقوۆا.
بۇگىنگى تاڭدا نۇر-سۇلتان قالاسىندا باستاپقى سانيتارلىق-مەديسينالىق كومەكتى كورسەتەتىن 31 ۇيىم جۇمىس اتقارادى.
2019 جىلى 12 «قولجەتىمدى دارىگەر» جوباسى، جانە «كوپبەيىندى مەديسينالىق ورتالىعىندا» «ينسۋلت ورتالىعى» اشىلعان بولاتىن. 2018 جىلمەن سالىستىرعاندا ينسۋلت ورتالىقتارىندا ەمدەلگەن ادامداردىڭ كورسەتكىشى كوبەيگەن.
قازاقستاندا اعىمداعى جىلدىڭ 1 قاڭتارىنان باستاپ مىندەتتى الەۋمەتتىك مەديسينالىق ساقتاندىرۋ جۇيەسىن ەنگىزۋ القا وتىرىسىندا تالقىلانعان ماڭىزدى تاقىرىپتاردىڭ ءبىرى بولدى. قوعامدىق دەنساۋلىق ساقتاۋ باسقارماسى باسشىسى ءمامس شەتەلدەردە كەڭىنەن قولدانىلاتىن وزىق تاجىريبە ەكەندىگىن، جۇيەنىڭ ءبىزدىڭ ەلدە دە جاقسى ناتيجە بەرەتىندىگىن اتاپ ءوتتى.
ستاتيستيكالىق مالىمەتتەرگە سايكەس، 1 قاڭتاردا 1 162 878 استانالىق ەمحانالارعا تىركەلگەن. 2020 جىلى ءمامس اياسىندا 8،1 ملرد تەڭگە قاراستىرىلعان.
وتىرىستا سونداي-اق ەلىمىزدىڭ دەنساۋلىق ساقتاۋ سالاسىن كەشەندى دامىتۋعا باعىتتالعان «دەنساۋلىق 2020-2025» باعدارلاماسى تالقىلاندى.
قازاقستاندىقتاردىڭ دەنساۋلىعىن نىعايتۋ ماقساتىندا مەديسينالىق مەكەمەلەر قىزمەتىنىڭ ناتيجەلەرىن جاقسارتۋ قاجەتتىلىگىمەن قاتار، اتالعان باعدارلامادا مەديسينا قىزمەتكەرىنىڭ مارتەبەسىن ارتتىرۋعا جانە ماماندار ءۇشىن حالىقارالىق تالاپتار مەن ستاندارتتارعا سايكەس جاعدايلار جاساۋعا ۇلكەن كوڭىل بولىنەدى.
ماتەريالدىق-تەحنيكالىق بازانى ۇنەمى جاڭارتۋمەن قاتار، مەديسينا ۇيىمدارىنىڭ باسشىلارى كادر تاپشىلىعى ماسەلەسىن كوتەردى.
وتكەن جىلى دارىگەرلەر تاپشىلىعى 494 بىرلىكتى قۇرادى، ونىڭ ىشىندە ماماندىقتار بويىنشا: جالپى پراكتيكا دارىگەرلەرى – 107، پەدياترلار – 36، تەراپيەۆتەر – 52، اكۋشەر-گينەكولوگتار – 42، انەستەزيولوگ-رەانيماتولوگتار – 41، كارديولوگتار – 16، پسيحياترلار – 3، ونكولوگتار – 16، نەوناتولوگتار – 28 جانە باسقالار.
وسى ماسەلەنى شەشۋ ماقساتىندا 2019 جىلى ەلوردالىق دەنساۋلىق ساقتاۋ ۇيىمدارىنا 217 جاس مامان جۇمىسقا ورنالاستىرىلدى. مەديسينا كادرلاردىڭ تاپشىلىعى 44%-عا تومەندەدى، ونىڭ ىشىندە جالپى پراكتيكا دارىگەرلەرى – 41%-عا، پەدياترلار – 36،1%-عا، تەراپيەۆتەر – 42،3%-عا، اكۋشەر – گينەكولوگتار – 69%-عا، انەستەزيولوگ-رەانيماتولوگتار – 22%-عا، كارديولوگتار – 56،3%-عا، نەوناتولوگتار – 3،6%-عا تومەندەدى.
باحتيار ماكەن وتىرىسقا قاتىسۋشىلاردى كادر تاپشىلىعى ماسەلەسىن قاراستىرىپ، مەديسينالىق ۇيىمدارى باسشىلارىنىڭ وسى ماسەلەنى شەشۋگە اتسالىسۋ قاجەتتىگىن ەسكەرتتى.
«مەديسينالىق ۇيىمداردىڭ باسشىلىعى بۇل ماسەلەگە بەي-جاي قاراماۋ قاجەت. ءبىز بىرلەسىپ مەديسينالىق مەكەمەلەرگە جاس مامانداردى تارتۋدىڭ جۇيەلى مەحانيزمدەرى مەن ادىستەرىن شەشۋىمىز ءتيىس»، - دەدى ول.
ءسوز سوڭىندا اكىم ورىنباسارى بارلىق مەديسينا قىزمەتكەرلەرىنە حالىقپەن كەرى بايلانىس جاساپ، ساپالى قىزمەت كورسەتۋدى تاپسىردى.
