ەلوردامىز نۇر-سۇلتان قالاسىندا پاتەرلەر تەك كەزەك بويىنشا بەرىلەتىنىن اكىمنىڭ كەڭەسشىسى ەلنۇر بەيسەنبايەۆ العا تارتتى، – دەپ حابارلايدى قالانىڭ رەسمي سايتى.

تاياۋدا مەسسەندجەرلەردە نۇر-سۇلتان قالاسىندا پاتەرلەردى كەزەكسىز الىپ جاتقانى تۋرالى جالعان اقپارات تاراعان. شىندىعىندا كەزەكسىز پاتەر بەرۋ قاراستىرىلماعان. الەۋمەتتىك باسپانا كەزەكتە تۇرعان ازاماتتارعا زاڭ شەڭبەرىندە تەك كەزەك بويىنشا بەرىلۋدە.

اعىمداعى جىلدىڭ اقپان ايىندا مەملەكەتتىك ورگاندار مەن تۇرعىندار اراسىندا كوممۋنيكاتيۆتى ۆاككۋم قالىپتاسقانى جاسىرىن ەمەس. بۇل ماسەلەنى شەشۋ ءۇشىن قالالىق اكىمشىلىك قوعامدىق قابىلداۋلاردىڭ قىزمەت ساپاسىن جاقسارتۋعا مۇمكىندىك بەرەتىن كونسەپتۋالدى شارالاردى قابىلداعان-دى.

بۇگىنگى تاڭدا اكىمدىكتىڭ نەگىزگى قىزمەتى حالىقپەن كەرى بايلانىستى نىعايتىپ، ازاماتتىق قوعاممەن تولىققاندى ءوزارا بايلانىس ورناتىپ ۇلگەردى.

ايتالىق، ەلوردادا الەۋمەتتىك جەلىلەردە «كەرى بايلانىس» ورناتىلىپ، «جانۇيا» جانە iKomek ورتالىقتارى جۇمىس ىستەر تۇر. سونىمەن بىرگە قالا اكىمىنىڭ جانىندا قوعامدىق قابىلداۋ ءتيىمدى قىزمەت اتقارۋدا.

– اعىمداعى جىلدىڭ ماۋسىم ايىنان باستاپ ءار اپتا سايىن قالا اكىم، ونىڭ ورىنباسارلارى، اۋدان اكىمدەرى مەن مەملەكەتتىك ورگاندار باسشىلارىمەن تۇراقتى تۇردە ازاماتتاردى قابىلداۋدا. اتاپ ايتقاندا، اكىمنىڭ قوعامدىق قابىلداۋى باستالعان ۋاقىتتان باستاپ، 29 ماۋسىمنان بۇگىنگە دەيىن ا.كولگىنوۆ قالانىڭ 500-دەن استام تۇرعىنىن قابىلدادى.

وندا 1347 ءوتىنىم بويىنشا ماسەلە كوتەرىلىپ، 89%-ى كەشىكتىرىلمەي شەشىمىن تاپتى. سونداي-اق، ورىنباسارلارىمەن 1،4 مىڭنان اسا، اۋدان اكىمدەرى مەن باسقارما باسشىلارى 2،5 مىڭنان اسا ەلوردا تۇرعىنىن قابىلدادى، – دەدى ە.بەيسەنبايەۆ.

تۇرعىنداردان تۇسەتىن شاعىمداردا كوبى تۇرعىن ءۇي، ءبىلىم، نەسيەلىك قارىزدى وتەۋ، دەنساۋلىق ساقتاۋ، جۇمىسپەن قامتۋ، ماتەريالدىق كومەك، اباتتاندىرۋ، تكش، جولدارعا قاتىستى بولىپ كەلەتىنى ءمالىم بولدى.

بۇگىندە «جانۇيا» وتباسىن قولداۋ ورتالىعى 70-تەن اسا مەملەكەتتىك قىزمەتتى بىرىكتىرىپ، ءبىر تەرەزە قاعيداسى بويىنشا ازاماتتارعا كومەك كورسەتۋدە. شىلعان كۇننەن باستاپ وعان 4،5 مىڭنان اسا ادام جۇگىنىپ، 8،5 مىڭ ماسەلە كوتەرگەن. ونىڭ 6،5 مىڭى بويىنشا جۇيەلى كەڭەستەر بەرىلىپ، 2 مىڭعا جۋىعى شەشىمىن تاپقانىن ايتا كەتۋىمىز كەرەك. بۇدان باسقا باس قالادا اۋدان اكىمدىكتەرىمەن «Open Akimat» ءپرينسيپى ەنگىزىلىپ، ونىڭ شەڭبەرىندە اشىق ەسىك كۇندەرى وتكىزىلۋدە. وعان ەلوردانىڭ مىڭنان اسا تۇرعىنى قاتىستى.