Nur Otan پارتياسىنىڭ باسپا ءسوز قىزمەتىنىڭ مالىمەتىنشە، جەرگىلىكتى جەرلەردە وزەكتى ماسەلەلەردى شەشۋ ماقساتىندا پارتيالىق باقىلاۋ كوميسسيالارى 2 مىڭعا جۋىق وتىرىس وتكىزگەن. ال ازاماتتاردىڭ وتىنىشتەرى نەگىزىندە 3 مىڭنان استام ءتۇرلى رەيد ۇيىمداستىرىلدى، – دەپ حابارلايدى Dalanews.kz.

ماسەلەن، شىعىس قازاقستان وبلىسىندا پارتيا وكىلدەرى بەسقاراعاي اۋدانىنا قاراستى دولەن اۋىلى تۇرعىندارىنىڭ ورتالىق سۋمەن جابدىقتاۋ جۇيەلەرى قۇرىلىسىنىڭ ۇزاققا سوزىلۋىنا قاتىستى شاعىمىنا قۇلاق استى. وبلىستىق فيليالدىڭ اقپاراتىنا سايكەس، بۇل ماسەلە ەرەكشە پارتيالىق باقىلاۋعا الىنعان. ناتيجەسىندە، بۇگىندە بارلىق قۇرىلىس جۇمىستارى اياقتالىپ، ۇيلەرگە سۋ كىرگىزۋ جۇمىسى جۇرگىزىلۋدە.

الماتى وبلىسىندا پارتيالىق باقىلاۋ كوميسسياسى مەكتەپ ماڭىندا جول ينفراقۇرىلىمىنىڭ جوقتىعىنا شاعىمدانعان قوسوزەن اۋىلى تۇرعىندارىنىڭ ارىزى بويىنشا تەكسەرۋ جۇرگىزدى. پارتياعا جۇگىنگەننەن كەيىن جاياۋ جۇرگىنشىلەر وتكەلىنە تەز ارادا جول بوگەتى قويىلىپ، تروتۋار سالىندى جانە مەكتەپكە ىرگەلەس جاتقان جولعا جارىق ورناتىلدى. سونداي-اق وقۋشىلاردى تاسىمالداۋ ءۇشىن 2 اۆتوبۋس ءبولۋ تۋرالى شەشىم قابىلداندى.

تۇركىستان وبلىسىنا قاراستى قازىعۇرت اۋىلىنداعى بالاباقشا قىزمەتكەرلەرى اتقارعان جۇمىستارى ءۇشىن ۇنەمى اقى تولەمەيتىنىنە شاعىمداندى. پارتيانىڭ ارالاسۋىنان كەيىن اۋداندىق ءبىلىم ءبولىمى 9 ملن 451 مىڭ تەڭگە كولەمىندە قالعان جالاقى سوماسىن اۋدارىپ، مەكەمە باسشىلىعىنا ءتيىستى تارتىپتىك جازا شارالارىن قولداندى.

پارتيانىڭ باسپا ءسوز قىزمەتى اتاپ وتكەندەي، جىل باسىنان بەرى تۇسكەن ازاماتتاردىڭ وتىنىشتەرىن تالداۋ بويىنشا، پارتيالىق باقىلاۋ كوميتەتى مەن وڭىرلەردەگى كوميسسيالار ورتالىق جانە جەرگىلىكتى اتقارۋشى ورگاندارعا 6 مىڭنان استام ۇسىنىس جولدادى. 210 ادام پارتيالىق جاۋاپكەرشىلىككە تارتىلسا، ولاردىڭ اراسىندا ءبىرقاتار ۆيسە-مينيسترلەر، ءوڭىر اكىمدەرىنىڭ ورىنباسارلارى، ءماسليحاتتارداعى فراكسيا باسشىلارى جانە ت.ب. بار. ولاردىڭ ىشىندە ءتۇرلى ولقىلىقتارعا جول بەرگەنى ءۇشىن 56 ادام پارتيادان شىعارىلدى.