Nestlé بالالارعا ارنالعان ءسۇت قوسپالارىنىڭ ءبىرقاتار پارتياسىن ىقتيمال توكسين قاۋپىنە بايلانىستى جاھاندىق دەڭگەيدە كەرى قايتارۋ تۋرالى شەشىم قابىلدادى، دەپ حابارلايدى Dalanews.kz.

كومپانيانىڭ حابارلاۋىنشا، كەرى قايتارۋ قازاقستانمەن قاتار فرانسيا، گەرمانيا، اۆستريا، دانيا، يتاليا جانە شۆەسيا نارىقتارىندا ساتىلعان ونىمدەرگە قاتىستى. تەكسەرۋ بارىسىندا قوسپالاردىڭ جەكەلەگەن پارتيالارىندا Bacillus cereus باكتەرياسىنىڭ كەيبىر شتاممدارى بولەتىن سەرۋليد توكسينىمەن ىقتيمال كونتاميناسيا ءقاۋپى انىقتالعان.

حالىقارالىق رەتتەۋشىلەردىڭ دەرەگىنشە، سەرۋليد قۇسۋ، ءىشتىڭ اۋىرۋى جانە جەدەل تاعامدىق رەاكسيالارعا اكەلۋى مۇمكىن، اسىرەسە سابيلەر ءۇشىن ءقاۋىپتى. وسىعان بايلانىستى كومپانيا ءوندىرىستى توقتاتىپ، ءونىمدى سورەلەردەن الىپ تاستاۋعا كىرىسكەن.

ازىق-تۇلىك قاۋىپسىزدىگى جونىندەگى ساراپشىلار مۇنداي قادامدى تاۋەكەلدى باسقارۋدىڭ ستاندارتتى تەتىگى دەپ باعالايدى. ياعني ءوندىرۋشى ىقتيمال قاتەردى ەرتە انىقتاپ، جاپپاي زيان كەلمەي تۇرىپ ارەكەت ەتكەن.

ايتا كەتەيىك، سوڭعى جىلدارى ۇقساس تاجىريبە باسقا دا ءىرى برەندتەردە بولعان. مۇنداي كەرى قايتارۋلار كومپانيالار ءۇشىن قارجىلىق شىعىن اكەلگەنىمەن، تۇتىنۋشىلاردىڭ دەنساۋلىعىن قورعاۋ تۇرعىسىنان ءتيىمدى سانالادى.

قازاقستان ءۇشىن بۇل جاعداي يمپورتتىق بالالار تاعامىنا تاۋەلدىلىك جوعارى ەكەنىن ەسكە سالادى. ساراپشىلار ءقاۋىپتى پارتيالاردى جەدەل انىقتاپ، تۇتىنۋشىلاردى تەز حاباردار ەتۋ تەتىكتەرىن كۇشەيتۋدىڭ ماڭىزىن اتاپ وتەدى.