ءۇش ءتىلدى ءبىلىم بەرۋدى ەنگىزۋدە كوپتەگەن تۇسىنىكسىز نارسەلەردىڭ بولۋىنا بىزدەن دە كىنا بار. قازاقستان ءبىلىم سالاسى قىزمەتكەرلەرىنىڭ رەسپۋبليكالىق تامىز كەڭەسىندە ءسوز سويلەگەن ق ر پرەمەر-مينيسترىنىڭ ورىنباسارى داريعا نازاربايەۆا وسىلاي دەدى.

بۇل تۋرالى qamshy.kz حابارلادى.

«كەلەسى وزەكتى قوعامدىق رەزونانس تۋدىرعان تاقىرىپ، ياعني ءۇش ءتىلدى ءبىلىم بەرۋدى ەنگىزۋ. بۇل ساياساتتا كوپتەگەن تۇسىنىكسىز نارسەلەردىڭ بولۋىنا بىزدە دە كىنا بار. مۇنى مويىندايمىز»، - دەدى داريعا نازاربايەۆا.

ونىڭ اتاپ وتۋىنشە، ءۇش ءتىلدى ءبىلىم بەرۋ كەزەڭ-كەزەڭمەن جۇزەگە اسىرىلادى جانە ەڭ الدىمەن 10-11 سىنىپتاردا عانا تەك 2019 جىلدان باستالادى.

«وسى ماسەلە بويىنشا ءالى دە ءتۇسىندىرۋ جۇمىستارىن جاستار مەن وقۋشىلار، ولاردىڭ اتا-انالارى اراسىندا دا جۇرگىزۋ قاجەت. جۇمىستى جانداندىرۋ ءۇشىن ءبىزدىڭ ءالى دە 2 جىلدان استام ۋاقىتىمىز بار»،-  دەدى ۆيسە-پرەمەر.

سونداي-اق، ول بۇل وقىتۋ جۇيەسىنە كوشكەن جاعدايدا قازاق تىلىنە ەشقانداي ءقاۋىپ تونبەيتىنىن ايتادى.

«قازاق تىلىنە ەشقانداي ءقاۋىپ ءتونىپ تۇرعان جوق. كەرىسىنشە، تەك ءبىر ءپان قازاق تىلىندە ءوتىپ جۇرگەن ورىس ءتىلدى مەكتەپتەردە مەملەكەتتىك تىلدە ءبىلىم بەرۋدى جەتىلدىرۋ جوسپارلانىپ وتىر. ق ر ءبىلىم جانە عىلىم مينيسترلىگى مەملەكەتتىك ءتىلدى ۇيرەنۋگە باعىتتالعان جاڭا ءارى جەڭىلدەتىلگەن ادىستەمەنى جاساپ جاتىر. مەن ءبىلىم بەرۋدىڭ بۇل ءادىسى ءساتتى بولاتىنىنا سەنەمىن. پاندەردى وقىتقاندا بىزگە ءتىل نەگە كەرەك؟ ەگەر ول ءتىلدى كۇندەلىكتى قولدانباساڭ، تەز ۇمىتىپ كەتەسىڭ»، - دەدى داريعا نازاربايەۆا.