بيۋرو وتىرىسىندا ءسوز العان داريعا نازاربايەۆا پالاتا وتىرىسىنىڭ كۇن تارتىبىنە ەنگىزىلگەن زاڭ جوبالارى ءبىزدىڭ مەملەكەت پەن قوعام ءۇشىن اسا ماڭىزدى ەكەنىن اتاپ ءوتتى. سوڭعى جىلدارى ازاماتتارىمىز كوتەرىپ جۇرگەن كوپتەگەن ماسەلەلەر وسى جاڭا زاڭنامالىق اكتىلەردە كورىنىس تاپتى.
"ءبىز سونىمەن بىرگە بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى زاڭ جوباسىن دا قارايمىز.
بۇل زاڭ جوباسى ەلىمىزدە جينالىستار مەن ميتينگىلەر ۇيىمداستىرۋ، وتكىزۋدىڭ قازىرگى پراكتيكاسىن تۇبەگەيلى تۇردە وزگەرتەدى.
جوبا ازاماتتاردىڭ قۇقىقتارىن، ميتينگىلەر وتكىزۋ كەزىندەگى جاۋاپتىلىقتى وڭتايلى ۇشتاستىرۋعا باعىتتالعان جانە تۇتاستاي العاندا حالىقارالىق ستاندارتتارعا سايكەس كەلەدى"، - دەدى د.نازاربايەۆا.
سەنات ءتوراعاسى د.نازاربايەۆا بيۋرو وتىرىسىن قورىتىندىلاي كەلىپ، ەلىمىزدە كوروناۆيرۋس جۇقتىرعاندار سانى ارتىپ، ۇدەمەلى كەزەڭگە جەتۋىنە بايلانىستى توتەنشە جاعداي ءتارتىبىنىڭ 1 مامىرعا دەيىن ۇزارتىلۋى قاجەتتى شارا بولعانىن اتاپ ءوتتى.
"بۇگىننەن باستاپ نۇر-سۇلتان جانە الماتى قالالارىنداعى كەيبىر كاسىپكەرلىك سۋبەكتىلەرى سانيتارلىق-ەپيدەميولوگيالىق شارالاردى ساقتاي وتىرىپ، جۇمىستارىن باستايتىن بولادى. وسىعان بايلانىستى كاسىپورىندار قىزمەتكەرلەرىن جۇمىسقا شىعارۋعا دايىن با؟ - دەگەن سۇراق ماڭىزدى بولىپ وتىر. ولار ءوز ۇجىمدارىنا قاۋىپسىزدىك پەن گيگيەنا ساقتاۋعا قاجەتتى بارلىق جاعدايدى جاساي الا ما؟" - دەدى د.نازاربايەۆا.
د.نازاربايەۆا اكىمدىكتەر بەرگەن اقپاراتتارعا سايكەس، ورتالىق پەن جەرگىلىكتى جەرلەردەگى جۇمىستى ۇيلەستىرۋ ناشار ەكەنىن، كەلىسۋ مەن ماسەلەنى شەشۋگە كوپ ۋاقىت كەتەتىنىن اتاپ ءوتتى.
سونىمەن قاتار، سەنات باسشىسى بۇقارالىق اقپارات قۇرالدارىندا جاريالانعان جۋرناليستەر، دارىگەرلەر، پوليسيا مەن اسكەري قىزمەتكەرلەردىڭ، ەرىكتىلەردىڭ قاتىسۋىمەن ورىن العان كەلەڭسىز كورىنىستەرگە دە توقتالدى.
"بۇگىنگى تاڭدا دارىگەرلەر دە، جۋرناليستەر دە العى شەپتە قىزۋ ەڭبەك ەتىپ جاتقانىن ەسكە سالعىم كەلەدى. ولار ىقتيمال قاۋىپ-قاتەرمەن كۇندە بەتپە-بەت كەلسە دە وزدەرىنىڭ كاسىبي بورىشىن ادال اتقارىپ ءجۇر. سوندىقتان ولارعا قۇقىقتىق قورعاۋ مەن ادامي قولداۋ اسا قاجەت"، - دەدى ول.
داريعا نازاربايەۆا ءقازىر كىنالىنى ىزدەمەي، تۇسىنبەۋشىلىكتەردى ورشىتپەي، وزەكتى ماسەلەلەردى بىرىگىپ شەشىپ، ىنتىماقپەن جۇمىس ىستەيتىن، بىر-بىرىنە كومەكتەسەتىن ۋاقىت ەكەنىن اتاپ ءوتتى.
بۇل رەتتە قۇقىق قورعاۋ ورگاندارىنىڭ قىزمەتكەرلەرىنە باعىنباۋ، اسىرەسە پوليسياعا شابۋىل جاساۋ نەمەسە قارسىلىق كورسەتۋدىڭ جولىن كەسۋ كەرەك. قۇقىق قورعاۋ ورگاندارىنىڭ قىزمەتكەرلەرى ءوز وكىلەتتىلىكتەرىنىڭ اياسىندا عانا ارەكەت ەتۋى، سىپايى، ادەپتى بولۋى ءتيىس.
"ءقازىر بارىنە دە قيىن، ءبىراق بىر-بىرىمىزگە جاردەمدەسىپ قانا وسى جاعدايدان تەزىرەك شىعا الامىز"، - دەپ اتاپ ءوتتى د.نازاربايەۆا.
