وڭتۇستىك قازاقستان وبلىسى اكىمى جانسەيىت تۇيمەبايەۆ «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمى مەن ايماقتاعى ءبىلىم سالاسىنىڭ باسشىلارىمەن كەزدەستى. باسقوسۋ ماقساتى – اتالعان وقۋ ورنىنىڭ وزىق پەداگوگيكالىق تاجىريبەلەرىن وزگە مەكتەپتەرگە تاراتۋ، ايماقتاعى يننوۆاسيالىق ءبىلىم بەرۋدىڭ ساپاسىن ارتتىرۋ. كەزدەسۋ بارىسىندا ءوڭىر باسشىسى بۇگىنگى تاڭدا ەلىمىزدە ءبىلىم بەرۋ جۇيەسىنىڭ جاڭا باعىتقا بەت بۇرعاندىعىن ايتتى.

– ەلباسىمىز «ءبىلىم-عىلىم-يننوۆاسيا» اتتى ۇشتىك ۇستەمدىككە باعىت الۋىمىز كەرەك» دەپ اتاپ وتكەن بولاتىن. ەندەشە، ءبىلىم بەرۋ جۇيەسىنىڭ جاڭا ساپالىق دەڭگەيگە ءوتۋ قاجەتتىلىگى ارتا تۇسۋدە. وڭتۇستىگىمىزدەگى يننوۆاسيالىق ءبىلىم بەرۋدىڭ ساپاسىن ارتتىرۋدا ورتاق مۇددەلەرگە بىرلەسىپ قول جەتكىزۋدى كوزدەپ وتىرمىز. نەگىزگى ماقسات – جان-جاقتى ءبىلىمدى، قابىلەتتى جەكە تۇلعانى، ەلىمىزدىڭ ەرتەڭگى تۇتقاسىن بەرىك ۇستاۋعا دايىن تولىققاندى جەتىلگەن مەملەكەتشىل، پاتريوت جاڭا بۋىن قالىپتاستىرۋ، – دەدى جانسەيىت قانسەيىت ۇلى.

ايتا كەتەرلىگى، وڭتۇستىك قازاقستان وبلىسىندا پەداگوگ كادرلاردى قايتا دايارلاۋدا بيىل 17 مىڭ پەداگوگ بىلىكتىلىگىن ارتتىرعان. سونداي-اق، وبلىستاعى 15 اۋدان بويىنشا قۇرامىنا 352 ءمۇعالىم ەنگەن ءموبيلدى توپتار قۇرىلىپ، جۇمىس اتقارىلۋدا. ال 2018 جىلى 2500-دان استام ءمۇعالىمدى اعىلشىن ءتىلى كۋرسىنان وتكىزۋ جوسپارلانىپ وتىر.

ءوز كەزەگىندە ءسوز العان «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتوراعاسى كۇلاش شامشيدينوۆا «جاڭارتىلعان ءبىلىم بەرۋ نە ءۇشىن كەرەك؟» تاقىرىبىندا بايانداما جاساپ، جاڭا وقىتۋ ادىستەمەلەرىنىڭ وزگە دە مەكتەپتەرگە ەنگىزۋدىڭ ماڭىزدىلىعىن جەتكىزدى. سونداي-اق، وڭىردەگى ءبىلىم بەرۋ ۇيىمدارىمەن ارىپتەستىك تانىتاتىندىعىن ايتتى.

باسقوسۋ سوڭىندا وبلىس اكىمدىگى مەن «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمى اراسىندا 2017-2019 جىلدارعا ارنالعان ءوزارا ىنتىماقتاستىق ورناتۋ جونىندە مەموراندۋمعا قول قويىلدى. بولاشاقتا مەموراندۋم نەزىندە ايماقتاعى مەكتەپ مۇعالىمدەرى «نازاربايەۆ زياتكەرلىك مەكتەپتەرىنىڭ» وزىق پەداگوگيكالىق تاجىريبەلەرىن مەڭگەرەتىن بولادى.