ول ءوزىنىڭ كونستيتۋسيالىق كەڭەسكە ۇندەۋى وتە قاراپايىم ماسەلەنىڭ ءبىرى ەكەنىن ءتۇسىندىردى.
– بۇگىندە قوعامدى سايلاۋ ماسەلەسى قىزىقتىرادى. ءبىراق، بۇل تاقىرىپقا قاتىستى جۇرتتى دۇرلىكتىرۋدىڭ قاجەتى جوق. اتا زاڭىمىزدا، «قازاقستان رەسپۋبليكاسىنىڭ پرەزيدەنتى تۋرالى» كونستيتۋسيالىق زاڭدا سايلاۋ وتكىزۋدىڭ ءتارتىبى مەن ۋاقىتى، وكىلەتتىلىكتىڭ اياقتالۋ مەرزىمى انىق جازىلعان. كونستيتۋسياعا سايكەس پرەزيدەنت كەزەكتەن تىس سايلاۋ وتكىزۋ جونىندە مالىمدەمە جاساۋعا قۇقىلى، ءبىراق ونداي جاعداي بولا قويماس. سوندىقتان، تىنىشتىق ساقتاپ، كۇندەلىكتى جۇمىسپەن اينالىسا بەرۋ كەرەك، – دەدى نۇرسۇلتان نازاربايەۆ.
ونىڭ مالىمدەمەسى اقوردادانىڭ Facebook-تەگى پاراقشاسىندا جاريالاندى.
بۇدان بۇرىن نۇرسۇلتان نازاربايەۆ كونستيتۋسيالىق كەڭەسكە كونستيتۋسيانىڭ 42-بابىنىڭ 3-تارماعىن ءتۇسىندىرۋ تۋرالى ءوتىنىش ءبىلدىردى، اڭگىمە مەملەكەت باسشىسىنىڭ وكىلەتتىكتەرىن توقتاتۋ شارتتارى تۋرالى بولدى.
– كونستيتۋسيالىق كەڭەسكە ءوتىنىش بىلدىرۋىمە بايلانىستى قىسقاشا جاۋاپ بەرسەم دەيمىن. كونستيتۋسيادا پرەزيدەنتتى الماستىرۋ جولدارى ايقىندالماعان، سونداي-اق ونىڭ ءوز ەركىمەن وتستاۆكاعا كەتۋ جاعدايى قاراستىرىلماعان. مۇنداي نورمالار الەم ەلدەرى كونستيتۋسيالارىنىڭ بارىندە بار. بۇل اسپەكتىلەردىڭ وزەكتىلىگى زور ەكەنىن ەسكەرىپ، مەن كونستيتۋسيالىق كەڭەستەن وسى ەرەجەنى ءتۇسىندىرۋدى سۇرادىم، – دەپ ءتۇسىندىردى نازاربايەۆ.
ول كونستيتۋسيالىق كەڭەسكە تاعى دا ءبىر ءوتىنىش بەرىلەتىنىن ايتا كەتتى. ول اكىمشىلىك جازاعا تارتىلعانداردى ءماجبۇرلى ەڭبەككە جىبەرۋ مۇمكىندىگىن قاراستىرۋعا قاتىستى بولادى.
ايتا كەتەيىك، 1995 جىلى قازاقستان رەسپۋبليكاسىنىڭ كونستيتۋسياسىن قابىلداعان ساتتەن باستاپ وسى كۇنگە دەيىن كونستيتۋسيالىق كەڭەسكە 220 ءوتىنىش، سونىڭ ىشىندە پرەزيدەنتتەن 22 ءوتىنىش جولدانعان.
