دانيار اقىشيەۆ بايانداماسىندا "دەلتا بانك" پەن "ربك" بانكىندەگى پروبلەمالارعا توقتالدى.
"دەلتا بانك" ءقازىر ليسەنزياسىنان ايىرىلعان، كرەديتتىڭ 100 پايىزعا جۋىعى بانك اكسيونەرىنىڭ باقىلاۋىنداعى كومپانيالارعا تيەسىلى بولعان. بانكتىڭ ەسەبىندە بۇل مۇلدە كورسەتىلمەگەن جانە تەك تەكسەرىس كەزىندە انىقتالدى. بۇل بانكتىڭ مىندەتتەمەلەرىنىڭ 60 پايىزىن كۆازيمەملەكەتتىك قۇرىلىمداردىڭ شوتى قۇراعان. ربك بانكىندە كرەديتتەردىڭ 90 پايىزى بانك اكسونەرلەرى نەمەسە سونىمەن بايلانىستى ءتورت قارىز الۋشىعا بەرىلگەن"، — دەدى اقىشيەۆ.
وسى كەزدە پرەزيدەنت اقىشيەۆتى توقتاتىپ، ءتوراعانىڭ جۇمىسىن سىنعا الدى.
"قاشان ءبىز وسى ىسكە نۇكتە قويامىز؟ ءابليازوۆ باستاعان بتا بانك ءبارىنىڭ كوز الدىندا مەملەكەت پەن حالىقتىڭ اقشاسىن جاپپاي ۇرلادى. بۇكىل الەم بويىنشا ءبىز مۇنى اشكەرەلەدىك، مەمەكەت اقشاسىن ۇرلاۋ ەكەنىن دالەلدەدىك. ال ءقازىر نە؟ بانك قۇردىق، ۇلتتىق كومپانيالار، ادامدار بارىپ جاتىر.
ەندى وسى اكسيونەرلەر سول جەردەن اقشانى شىعارىپ جاتىر، ال ۇلتتىق بانك بولسا قاراپ، سىرتتان باقىلاپ وتىر.
بۇل قالاي سوندا؟"، — دەدى نازاربايەۆ اشۋلانىپ،
"وتە دۇرىس ايتاسىز"، — دەدى اقىشيەۆ.
"نە وتە دۇرىس؟ سوندا قاداعالاۋ ورگانى نە ءۇشىن قاجەت؟ باسقا بانكتەر بويىنشا دا ءدال وسىلاي. قالاي اشۋلانبايسىڭ. "جامان بولادى، بانكروتتىقا جول بەرمەۋ كەرەك" دەپ ايتامىز. بانكروتقا ۇشىراسىن نەمەسە اقشانى قالدىرسىن. بۇل اكسيونەرلەر ەشقايدا دا كەتكەن جوق قوي. ولار اقشا جيناپ، كەيىن سونى الىپ شىعۋ ءۇشىن بانك قۇردى. تاپا-تال تۇستە اقشا ۇرلاۋدى قالاي تۇسىنۋگە بولادى؟"، — دەدى پرەزيدەنت.
نازاربايەۆ بانكتىڭ جاعدايىن، اقشا اعىمىن كۇنى بۇرىن قاراپ، باقىلاۋعا مۇمكىندىك بەرەتىن زاڭ جوباسىن ەنگىزگەنىن ايتتى.
"بۇل پروبلەمانى تۇبىرىمەن جويۋ ءۇشىن. زاڭ جوباسىن قاراۋدى تەزدەتۋدى سۇرايمىن"، — دەدى مەملەكەت باسشىسى.
"كوپ راحمەت، نۇرسۇلتان ءابىش ۇلى"، — دەدى اقىشيەۆ.
"نە راحمەت؟ سەن مۇنى باياعىدا-اق ىستەۋىڭ كەرەك ەدى"، — دەپ ەسكەرتۋ جاسادى پرەزيدەنت.
دەرەككوز: sputniknews.kz
