"بۇل كۇندەرى ماعان كوپتەگەن ازاماتتارىمىزدان حاتتار كەلىپ ءتۇسىپ جاتىر. ولار ءۇشىن مەنىڭ پرەزيدەنتتىك وكىلەتتىگىمدى توقتاتۋ تۋرالى شەشىمىم كۇتپەگەن وقيعا بولعان. كەيبىرى قاپالانىپ، ءتىپتى مەنەن الداعى سايلاۋعا ءتۇسۋىمدى وتىنگەن حاتتار دا ءتۇسىپ جاتىر"، - دەدى نازاربايەۆ Nur Otan پارتياسىنىڭ كەزەكتەن تىس XIX سەزىندە.
ەلباسى وزىنە حات جازعان بارشا ازاماتقا ريزاشىلىعىن ءبىلدىرىپ، ولاردىڭ ۋايىمىن تۇسىنەتىنىن ايتتى.
"ادامدار تۇراقتىلىق پەن تەڭدىكتىڭ ساقتالعانىن قالايدى. قازاقستاندىقتارعا ماعان كورسەتكەن قۇرمەتى مەن ماحابباتى ءۇشىن العىس ايتقىم كەلەدى. ولاردىڭ قورقىنىشىن تۇسىنەمىن، مەن بۇل شەشىمدى ابدەن ويلانىپ-تولعانىپ قابىلدادىم"، - دەدى نازاربايەۆ.
ەلباسى قاسىم-جومارت توقايەۆتىڭ لايىقتى كانديدات ەكەنىن اتاپ ءوتىپ، وتانداستاردى ءبىراۋىزدان قولداۋعا شاقىردى.
ايتا كەتسەك، بۇگىن Nur Otan پارتياسىنىڭ كەزەكتەن تىس XIX سەزىندە پارتيا ءتوراعاسى نۇرسۇلتان نازاربايەۆ پارتيا اتىنان الداعى پرەزيدەنت سايلاۋىنا قاسىم-جومارت توقايەۆتىڭ كانديداتۋراسىن ۇسىندى.
دەرەككوز: Sputnik
