وزبەكستان پرەزيدەنتى شاۆكات ميرزيويەۆ رەسەيلىك ارىپتەسى ۆلاديمير پۋتينمەن كەزدەسۋ بارىسىندا ەلدە اەس سالۋ جونىندەگى قۇجاتقا قول قوياتىنىن جەتكىزدى، دەپ حابارلايدى Dalanews.kz.
پۋتين مەملەكەتتىك ساپارمەن وزبەكستانعا كەلدى. مۇندا ەكى ەل اراسىندا سالماقتى كەلىسسوزدەر جۇرگىزىلۋدە. ناقتىراق ايتساق، مەملەكەت باسشىلارى وزبەكستاندا سالىناتىن اەس قۇرىلىسىنا بايلانىستى ءوزارا ىمىراعا كەلدى.
"بۇگىن ءبىز وزبەكستاندا قۋاتتىلىعى از اتوم ەلەكتر ستانسيالارىن سالۋ جونىندە ماڭىزدى كەلىسىمگە قول قويامىز. ستراتەگيالىق جوبانى جۇزەگە اسىرۋدى جەدەلدەتۋ ءۇشىن ونىڭ شارتتارى مەن تەحنيكالىق قۇرىلىمدارىن ۇزاق ۋاقىت بويى ساراپشىلار دەڭگەيىندە تالقىلاپ كەلەمىز"، - دەدى ميرزيويەۆ.
ەسكە سالايىق، 2018 جىلى قىركۇيەكتە وزبەكستان رەسەيمەن اتوم ەلەكتر ستانسياسىنىڭ قۇرىلىسى تۋرالى ارىپتەستىك تۋرالى كەلىسىمگە قول قويعان. ەش ەسكەرتۋسىز قابىلدانعان شەشىم وزبەكستانعا كورشىلەس ورنالاسقان مەملەكەتتەردىڭ الاڭداۋشىلىعىن تۋدىرعان بولاتىن.
دەرەكتەرگە سۇيەنسەك، اەس وزبەكستان-قازاقستان شەكاراسىنان 40 كيلومەتر جەردە ورنالاسقان جيزاق وبلىسى تۇزقان كولىنىڭ ماڭىندا سالىنادى دەگەن جوسپار بار. بۇل - ايدار-ارناساي كولدەر جۇيەسىنىڭ بولىگى. مۇندا ستراتەگيالىق ماڭىزدى نىسان شاردارا سۋ قويماسى ورىن تەپكەن. سونىمەن قاتار زاۋىت ءۇش ميلليون حالىقتى قامتىعان وزبەكستان استاناسى تاشكەنتتەن نەبارى 140 كم قاشىقتا بوي كورسەتپەك.
سوندىقتان جوبا ورتالىق ازياداعى ەكولوگيالىق تەپە-تەڭدىك پەن ينۆەستيسيالىق احۋالعا ءقاۋىپ ءتوندىرىپ، ايماقتىق قاۋىپسىزدىك شيەلىنىستەرىن ودان ءارى ۋشىقتىرۋى مۇمكىن. قالا بەردى وزبەكستاننىڭ رەسەيگە ستراتەگيالىق تۇرعىدان تاۋەلدى بولۋ كورسەتكىشى دە ارتپاق.
ال ساراپشىلار مۇندا ماگنيتۋداسى 6،0-6،5-كە دەيىن، ءتىپتى ودان دا جوعارى جەر سىلكىنىسى بولادى دەپ دابىل قاعۋدا. راسىمەن دە، وزبەكستاننىڭ بىرنەشە قالاسىندا سەيسميكالىق بەلسەندىلىك جوعارى. سونىڭ ىشىندە زاۋىتقا جاقىن جەردە ورنالاسقان جيزاق ەلدى-مەكەنى جەر سىلكىنىسىنە سەزىمتال ايماق ەكەنىن اتاپ وتكەن ءجون. ريحتەر شكالاسى بويىنشا بۇل جەردە 9 باللدىق اپات بولۋى مۇمكىن.
