مينيسترلىك WhatsApp پەن Telegram-عا تىيىم سالىنادى دەگەن اقپاراتقا جاۋاپ بەردى، دەپ حابارلايدى Dalanews.kz.
"باق-تا تارالىپ جاتقان WhatsApp، Telegram جانە باسقا دا شەتەلدىك مەسسەندجەرلەردى قولدانۋعا تىيىم سالىنادى دەگەن اقپارات شىندىققا جاناسپايدى. سيفرلىق دامۋ مينيسترلىگى جەكە ماقساتتا شەتەلدىك سەرۆيستەردى قولدانۋعا ەش تىيىم سالىنبايتىنىن حابارلايدى"، - دەپ جازىلعان حابارلامادا.
ۆەدومستۆو مالىمەتىنشە، Aitu مەسسەندجەرىن ەنگىزۋ باستاماسى ورتالىق جانە جەرگىلىكتى مەملەكەتتىك ورگاندارعا، سونداي-اق، كۆازيمەملەكەتتىك سەكتور ۇيىمدارىنا قىزمەتتىك كوممۋنيكاسيا ءۇشىن عانا ۇسىنىلادى. ول مەملەكەتتىك قىزمەتكەرلەر تەك جۇمىس بارىسىندا پايدالاناتىن اقپاراتپەن ءقاۋىپسىز الماسۋدى قامتاماسىز ەتۋ ماقساتىندا قولدانىلادى.
"Aitu قىزمەتتىك حات الماسۋدىڭ، جۇمىس چاتتارىنىڭ، جەدەل حابارلامالاردىڭ جانە مەملەكەتتىك سيفرلىق پلاتفورمالارمەن ءوزارا ارەكەتتەسۋدىڭ نەگىزگى قۇرالىنا اينالادى. ونىڭ باستى ارتىقشىلىعى بارلىق سەرۆەر قازاقستان اۋماعىندا ورنالاسقان"، - دەپ جازىلعان حابارلامادا.
