قازاقستاندا اعاشتارعا كەلتىرىلگەن زالال ءۇشىن تولەنەتىن وتەماقىنىڭ جاڭا مولشەرى بەلگىلەندى. ەندى كەيبىر اعاش تۇرلەرىن زاڭسىز كەسۋ، ءبۇلدىرۋ نەمەسە جيناۋ جاعدايىندا ءبىر دانا اعاش ءۇشىن تولەم 314 560 تەڭگەگە دەيىن جەتۋى مۇمكىن. بۇل تۋرالى ەكولوگيا مينيسترلىگىنىڭ جاڭا بۇيرىعىندا كورسەتىلگەن،- دەپ حابارلايدى Dalanews.kz.
بۇل وزگەرىستەر 2023 جىلعى №61 بۇيرىققا ەنگىزىلدى. قۇجاتتا وسىمدىكتەرگە كەلتىرىلگەن زالال ءۇشىن تولەنەتىن وتەماقىنىڭ بازالىق مولشەرلەمەلەرى ەگجەي-تەگجەيلى كورسەتىلگەن كەستە بەرىلگەن. ايىپپۇل مولشەرى تەك اعاش تۇرىنە ەمەس، ونىڭ جاسىنا دا بايلانىستى ەسەپتەلەدى.
اعاشتار ءتورت جاس كاتەگورياسىنا بولىنەدى: 10 جاسقا دەيىن، 11–20 جاس ارالىعى، 21–30 جاس جانە 31 جاستان جوعارى. اعاش نەعۇرلىم ۇلكەن بولسا، وتەماقى كولەمى دە جوعارى بولادى.
ايىپپۇلدار جەكە دە، زاڭدى تۇلعالاردان دا وندىرىلەدى. جەرگىلىكتى اتقارۋشى ورگاندار ءار توقسان سايىن سالىق ورگاندارىنا وندىرىلگەن سومالار تۋرالى ەسەپ بەرىپ وتىرۋى قاجەت، وعان قوسا قاجەت بولعان جاعدايدا زالالدى وتەتۋ ءۇشىن سوتقا تالاپ قويۋعا ءتيىس.
جاڭا مولشەرلەمەلەر رەسمي تۇردە كۇشىنە ەندى.
