تاجىكستاننىڭ كولىك ءمينيسترى ءحۋدوور ءحۋدوورزودا ازاتتىقتىڭ تاجىك قىزمەتىنە بەرگەن سۇقباتىندا جاعدايىنىڭ جاقسارعانىن، ءبىراق ءالى دارىگەرلەر باقىلاۋىندا ەكەنىن ايتقان.

رەسمي اقپاراتقا سايكەس، 11 تامىزدا كولىك ءمينيسترى وزىنە قول جۇمساماق بولعان، ءبىراق تۋىستارى قۇتقارىپ قالعان.

62 جاستاعى ءحۋدوور ءحۋدوورزودا سۋيسيد جاساماق بولعان سەبەبىن ايتپادى.

"اۋرۋحانادان قاشان شىعارادى، بىلمەيمىن. ءقازىر ەمدەلىپ جاتىرمىن"،- دەدى كولىك ءمينيسترى.

تاجىكستان باس پروكۋراتۋراسىنىڭ مالىمدەۋىنشە، ءحۋدوور ءحۋدوورزودا وتباسىلىق جانجال كەزىندە ءاسۇي پىشاعىمەن وزىنە قول سۇقپاق بولعان.

ءبىراق كولىك مينيسترلىگى قىزمەتكەرلەرى سول كۇنى مينيستر دەپرەسسيادا بولعانىن ايتادى.

"سۋيسيد سەبەبى وتباسىنداعى پروبلەماعا بايلانىستى بولماسا كەرەك، سول كۇنى ءحۋدوورزودانىڭ ءوزى جۇمىستا دەپرەسسيادا وتىردى. وتباسىندا ەشقانداي جانجال بولعان ەمەس. تاماشا ايەلى مەن بالالارى بار"، - دەدىك كولىك مينيسترلىگىنىڭ وكىلى.

تاجىكستاننىڭ باس پروكۋراتۋراسى بۇل ىسكە قاتىستى تەرگەۋ ءجۇرىپ جاتقانىن مالىمدەدى. شەنەۋنىكتىڭ تۋىستارى سۇقبات بەرۋدەن باس تارتتى.

وسىنىڭ الدىندا "يستيكلول" مەديسينا ورتالىعىنىڭ دارىگەرى ءاتى-جونىن جاسىرىپ، ءحۋدوور ءحۋدوورزودانىڭ ىشىنەن پىشاق جاراقاتىن الىپ، اۋرۋحاناعا تۇسكەنىن حابارلاعان.

ءحۋدوور ءحۋدوورزودا 2017 جىلدان بەرى كولىك ءمينيسترى قىزمەتىن اتقارىپ كەلەدى.