ەڭبەك جانە الەۋمەتتىك قورعاۋ ءمينيسترى ءبىرجان نۇرىمبەتوۆ حالىقتىڭ قارتتىقتى لايىقتى قارسى الۋعا اقشاسى جەتپەيتىنىن ايتتى دەپ حابارلايدى Dalanews.kz.
- وكىنىشكە وراي بۇگىنگى زەينەتاقى جۇيەسى قارتتىقتى ۋايىمسىز-قامسىز قارسى الۋعا كەپىلدىك بەرە المايدى. بۇل جۇيەنى تەز ارادا وزگەرتۋ كەرەك. قازىردە زەينەتاقى جۇيەسىنەن شامامەن 212 مىڭ ادام زەينەتاقى الادى، تولەمنىڭ ورتا مولشەرى 21 مىڭ تەڭگەنىڭ توڭىرەگىندە. 22 جىلدا جۇرتتىڭ جيعان-تەرگەنى 10،8 ترلن تەڭگەنى قۇرادى. ورتا ەسەپپەن ءبىر سالىمشىنىڭ جيناعى 1 ملن تەڭگەدەن اسپايدى، – دەيدى مينيستر نۇرىمبەتوۆ.
ايتۋىنشا بۇگىنگى زەينەتاقى جۇيەسىنىڭ كوزگە ۇرىپ تۇرعان ءۇش كەمشىلىگى بار.
– بىرىنشىدەن، جۇمىس ىستەيتىن جۇرتتىڭ تابار تابىسى تومەن. ەكىنشىدەن، زەينەتاقى سالىمىن تولەۋدەگى تۇراقسىزدىق، سونىڭ سالدارىنان سالىم تولەۋ مىندەتتەمەسى بويىنشا قارىز جينالىپ قالادى، جۇمىسقا كەلىسىمشارتسىز ورنالاسۋ داعدىسىنان دا ءالى ارىلعان جوقپىز. ۇشىنشىدەن، زەينەتاقى اكتيۆتەرىنىڭ تابىسى تومەن، – دەيدى مينيستر.
بۇدان بولەك ول ۇكىمەت پەن ۇلتتىق بانك بىرلەسىپ "سالىمشىلاردىڭ زەينەتاقى جۇيەسىنە دەگەن سەنىمىن ارتتىرۋ ماقساتىندا اتالعان جۇيەنى مودەرنيزاسيالاۋ" جۇمىسى جۇرگىزىلەتىنىن ايتتى.
سونىڭ نەگىزىندە جۇرت زەينەتاقى جيناعىنىڭ ءبىر بولىگىن ناقتى ماقساتقا جۇمساي الادى. بۇل باستامانى پرەزيدەنت توقايەۆ تا قولداپ وتىر.
– 2020-2024 جىلدىڭ ارالىعىندا زەينەتاقى جۇيەسىندەگى ولقىلىقتاردى تۇزەيتىن بولامىز. وسى ماقساتتا جول كارتاسىن ازىرلەۋ ۇستىندەمىز، – دەيدى مينيستر نۇرىمبەتوۆ.
