ونەركاسىپتە جاساندى ينتەللەكتىنى قولدانۋ تاۋار باعاسىن تومەندەتۋگە مۇمكىندىك بەرەدى. بۇل تۋرالى يندۋستريا جانە قۇرىلىس ءمينيسترى ەرسايىن ناعاسپايەۆ مالىمدەدى، دەپ حابارلايدى Dalanews.kz.
ءمينيستردىڭ ايتۋىنشا، جاساندى ينتەللەكت پەن سيفرلىق تەحنولوگيالاردى ءوندىرىس پروسەسىنە ەنگىزۋ قازاقستاندىق كاسىپورىندارعا ءونىمنىڭ وزىندىك قۇنىن ازايتىپ، باسەكەگە قابىلەتتىلىكتى ارتتىرۋعا جول اشادى.
ەرسايىن ناعاسپايەۆ قازىرگى تەحنولوگيالار رەسۋرستاردى ءتيىمدى پايدالانۋعا، وندىرىستىك شىعىنداردى تومەندەتۋگە جانە قول ەڭبەگىنە دەگەن قاجەتتىلىكتى ازايتۋعا كومەكتەسەتىنىن اتاپ ءوتتى.
"الەمدىك تاجىريبە ءبىرقاتار سالادا جاساندى ينتەللەكت ادامنىڭ قىزمەتىن ءىشىنارا الماستىرىپ جاتقانىن كورسەتسە دە، قازاقستان ءۇشىن باستى مىندەت — جاڭا جۇمىس ورىندارىن قۇرۋ جانە ەڭبەك نارىعىن ءارتاراپتاندىرۋ بولىپ قالا بەرەدى"، - دەيدى ول.
ءمينيستردىڭ سوزىنشە، ءوندىرىستى سيفرلاندىرۋدىڭ تاعى ءبىر ماڭىزدى ناتيجەسى وتاندىق ءونىم ساپاسىنىڭ ارتۋى جانە ونىڭ قولجەتىمدى بولۋى. وندىرۋشىلەردىڭ كوبەيۋى باسەكەلەستىكتى ارتتىرادى، ال باسەكە تاۋار باعاسىن تومەندەتىپ، ساپاسىن جاقسارتادى. سونداي-اق رەسۋرستارعا، ەنەرگياعا جانە جۇمىس كۇشىنە جۇمسالاتىن شىعىن ازايعان سايىن ءونىمنىڭ وزىندىك قۇنى دا تومەندەيدى.
