انتيكور ەكس-مينيستر باعدات مۋسينگە قىلمىستىق ءىس قوزعالدى دەگەن اقپاراتقا قاتىستى پىكىر ءبىلدىردى، - دەپ حابارلايدى Dalanews.kz Zakon.kz-كە سىلتەپ.
30 ساۋىردە باعدات مۋسين سيفرلىق دامۋ مينيسترلىگىنەن كەتكەن بولاتىن. ارتىنشا الەۋمەتتىك جەلىدە ەكس-مينيسترگە قىلمىستىق ءىس قوزعالدى دەگەن اقپاراتتار تاراپ كەتتى.
انتيكور بۇل اقپاراتتى تەرىسكە شىعاردى.
«قازىرگى ۋاقىتتا سىبايلاس جەمقورلىققا قارسى ءىس-قيمىل اگەنتتىگى مەن ونىڭ اۋماقتىق بولىمشەلەرىندە بۇرىنعى سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى مۋسين باعدات باتىربەكۇلىنا قاتىستى قىلمىستىق ءىس جوق»، - دەدى سوتقا دەيىنگى تەرگەپ-تەكسەرۋ قىزمەتىنىڭ باسشىسى قانات سۇلەيمەنوۆ.
باعدات مۋسين سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىن 2020 جىلدىڭ قىركۇيەگىنەن 2024 جىلدىڭ ساۋىرىنە دەيىن باسقاردى. پرەزيدەنتتىڭ ۇكىمىمەن قىزمەتىنەن بوساتىلدى. ءمۋسيننىڭ ءوزى وتستاۆكاعا ءوزى بەرگەنىن ايتتى.
باعدات مۋسين الەۋمەتتىك جەلىدەگى پاراقشاسىندا مينيستر قىزمەتىندە بولعان كەزدە قانداي جۇمىستار اتقارعانىن ءتىزىپ شىققان بولاتىن. ودان بولەك، مۋسين ءوز قىزمەتىن جۇزەگە اسىرۋ كەزىندە ولقىلىقتارعا جول بەرگەنىن مويىندادى.
«ەشتەڭە جاسامايتىن ادام قاتەلەسپەيدى دەگەن ءسوز بار عوي. الداعى ۋاقىتتا ءجۇرىپ وتكەن جولدى وي ەلەگىنەن وتكىزىپ، جاۋاپتى قىزمەتتەگى تىعىز كەستەگە بايلانىستى كوڭىل بولە الماعان وتباسىممەن بىرگە دەمالۋ جوسپاردا بار.
مۇنىڭ ءبارى قايتادان ساپتا بولۋ ءۇشىن قاجەت! ويتكەنى مەن پرەزيدەنتىمىزدىڭ سەنىمدى قولداۋشىسى، جاڭا قازاقستان ساياساتىنىڭ جاقتاۋشىسىمىن جانە سولاي بولىپ قالا بەرەمىن، قاي جەردە بولماسىن، وسى ماقساتتىڭ يگىلىگى ءۇشىن جۇمىس ىستەۋگە بارىمدى سالامىن. ال ازىرگە ءجيى كەيىنگە قالدىرعان ىستەرمەن اينالىسقىم كەلەدى»، - دەدى ەكس-مينيستر.
