ءبىراق، شىنى كەرەك، ءقازىر قاناتقا بايلانىستى اڭداتپالارعا بۇرىنعىداي ەلەڭدەمەيتىن بولدىق، – دەپ جازىپتى diamondring.kz.
نەلىكتەن دەيسىز عوي؟ مەنني پاكيامون كەلىسسوزدەر ءجۇرىپ جاتقانىن جازىپ، 22 ناۋرىزدا «الماتى ارەنادا» جانكۇيەرلەرگە ۇلكەن شوۋ جاساۋعا دايىن ەكەندىكتەرىن جازعاندا، راسىمەن دە «وھو» دەستىك. سەندىك. ءبىز دە قازاقتىڭ دارحان دالاسىندا پاكمەندى كۇتتىك.
ءبىراق، ونىڭ جاي عانا PR ەكەنىن كەش بىلدىك.
كەيىن كەل برۋك تۋرالى اقپارات شىعىپ، ونىمەن دە ايقاسۋعا دايىن ەكەندىكتەرىن ءبىلدىردى. ال ءىس جۇزىنە كەلگەندە WBA بەكىتكەن امەريكالىق بوكسشى دجون ۆەراعا قارسى ايقاستان باس تارتتى.
ەگەر سول كەزدە شارشى الاڭعا شىعىپ، جەڭىسكە جەتكەندە وندا ءبىرىنشى ورتا سالماق دارەجەسىندەگى چەمپيوندىق بەلبەۋدەن باستى ۇمىتكەر بولار ەدى. ءبىراق نەگە ەكەنى بەلگىسىز، بۇل جەكپە-جەك اياقسىز قالدى. امەريكالىقتار اشىق ايتتى.
باس تارتقان قانات يسلامنىڭ كومانداسى دەپ مالىمدەمە جاساۋدى دا ۇمىتقان جوق.
ال اشەيىندە بوكسشىسىنا بايلانىستى كەز-كەلگەن جاڭالىققا جاۋاپ جازاتىن يسلامنىڭ كومانداسى بۇل جولى ءۇنسىز قالۋدى ءجون كوردى. سوعان قاراعاندا، بار گاپ راسىمەن دە ءبىز جاقتا سياقتى.
ال دجون ۆەرا شە؟ قاشانعى كۇتىپ ءجۇرسىن، كاسىپقوي بوكستا 18 جەكپە-جەك وتكىزىپ، بارلىعىندا جەڭىسكە جەتكەن، ونىڭ 11-ىندە قارسىلاسىن نوكاۋتقا تۇسىرگەن ۆەرا ناۋرىزدىڭ 24-ىندە فرانسيالىق ميشەل سوروعا (31-2-1، 30 كو) قارسى شارشى الاڭعا شىعاتىن بولدى. قاي جەڭگەنى چەمپيوندىق بەلبەۋدەن باستى ۇمىتكەر اتانادى.
سوندا كۋبالىق ەريسلاندي لارامەن جۇدىرىقتاسۋدى بۇرىننان ماقسات قىلىپ جۇرگەن قانات يسلام نەلىكتەن مۇنداي مۇمكىندىكتەن وڭايلىقپەن باس تارتا سالدى. البەتتە، قانات الگى امەريكالىقتان قورىققانىنان جەكپە-جەكتەن باس تارتتى دەگىمىز جوق. كاسىپقوي بوكستاعى 25 قارسىلاسىنىڭ 20-سىن قۇلاتقان باتىرىمىزعا سالساڭ، ءدال ءقازىر ءبىرىنشى ورتا سالماقتاعى ءتورت چەمپيوندى دا شارشى الاڭعا ءتىزىپ قويىپ، ارقايسىسىمەن كەزەك-كەزەك تە، ءبىر مەزەتتە دە جۇدىرىقتاسۋعا دايىن. كەلىسە الماعان ءبىرىنشى كەزەكتە پروموۋتەرلەرى بولۋى ابدەن مۇمكىن. دەگەنمەن،
نەلىكتەن پروموۋتەرلەرىنىڭ بىلىكسىزدىگىنەن بوكسشى زارداپ شەگۋى قاجەت؟ الدە وعان ءبىر قادام العا جاساۋ ءۇشىن ەكى قادام ارتقا شەگىنۋى كەرەك پە؟
ءبىر قىزىعى، دجون ۆەراعا قاتىستى ەشنارسە ايتپاعان يسلامنىڭ كومانداسى قاڭتار ايىنىڭ سوڭىندا ءىۆF چەمپيونى دجاررەتت حەردپەن توبەلەسۋگە دايىن ەكەندىكتەرىن مالىمدەدى. الايدا، حەرد 7 ساۋىردە قانات ارمانداعان ەريسلاندي لارامەن ايقاسادى. بۇل رەسمي تىركەلگەن داتا.
ءيا، بايقاعاندارىڭىزداي، چەمپيوندىق ايقاستارعا شىعاتىن ۋاقىتى باياعىدا جەتكەنىمەن ازىرگە قانات يسلام كومانداسىنىڭ ىسىنەن ءسوزى كوپ بولىپ تۇر. شارشى الاڭداعى جارقىن جەڭىستەرىنەن ينستاگرامداعى جارقىن جازبالارى ەففەكتكە يە. ءبىراق، قاشانعى Inter-Continental بەلبەۋلەرىن ارقالاپ جۇرە بەرمەك، ونىڭ دا گولوۆكيننىڭ دەڭگەيىنە، كەم دەگەندە جاقيانوۆتىڭ دارەجەسىنە جەتەتىن ۋاقىتى بولدى عوي.
جاسى دا 33-تەن استى. ەندى قاشان؟
بۇگىن قانات يسلامنىڭ پروموۋتەرى الماسقانى تۋرالى اقپارات جارىق كوردى. راسىمەن دە نەلسون لوپەستەن كەتىپ، ەگيس كليماستىڭ قاراماعىنا وتكەن بولسا، جاقسى ەكەن. بۇل قادام قانات يسلامدى كاسىپقوي بوكستا جاڭا بەلەستەرگە شىعارادى دەپ ۇمىتتەنەمىز. ەڭ باستىسى، كليماس ونى شەتقاقپاي، ءتيىستى دارەجەدە كوڭىل بولسە ەكەن دەيمىز. ايتپەسە، ۋاقىت ءقازىر قاناتقا قارسى ءجۇرىپ تۇر.
