قازاقستان مەن موڭعوليا پرەزيدەنتتەرى شاعىن قۇرامدا كەلىسسوز جۇرگىزدى، - دەپ حابارلايدى Dalanews.kz.
قاسىم-جومارت توقايەۆ قوناقجايلىق كورسەتكەنى ءۇشىن ۋحنااگيين حۋرەلسۋحكە ريزاشىلىق ءبىلدىرىپ، ءوزىنىڭ مەملەكەت باسشىسى رەتىندەگى موڭعولياعا العاشقى ساپارىنا ەرەكشە ءمان بەرەتىنىن اتاپ ءوتتى.
ۋحنااگيين حۋرەلسۋح قازاقستان پرەزيدەنتىنىڭ موڭعولياعا مەملەكەتتىك ساپارى ەكىجاقتى ىنتىماقتاستىقتى مۇلدەم جاڭا دەڭگەيگە كوتەرەتىنىنە سەنىم ءبىلدىردى.
"شىن مانىندە، ەكى ەل اراسىندا ديپلوماتيالىق قارىم-قاتىناس ورناعانىنا 30 جىلدان استى. قازاقستان پرەزيدەنتىنىڭ موڭعولياعا مەملەكەتتىك ساپارى سوڭعى رەت وسىدان 16 جىل بۇرىن بولعان ەدى. ەلىمىز ءسىزدىڭ بۇگىنگى ساپارىڭىزدى ەكىجاقتى ىنتىماقتاستىقتىڭ تاياۋ جىلدارداعى پەرسپەكتيۆتى باعىتتارىن ايقىندايتىن مەزەت رەتىندە قاراستىرادى. بۇل ساپار ەكى ەلدىڭ قارىم-قاتىناسىن ستراتەگيالىق سەرىكتەستىك دەڭگەيگە شىعارۋ تۇرعىسىنان وتە ماڭىزدى"، – دەدى موڭعوليا پرەزيدەنتى.
مازمۇندى اڭگىمەلەسۋ بارىسىندا مەملەكەتتەر باسشىلارى ساياسي، ساۋدا-ەكونوميكالىق جانە ينۆەستيسيالىق بايلانىستاردى دامىتۋ پەرسپەكتيۆاسىنا ايرىقشا ءمان بەردى. سونداي-اق اۋىل شارۋاشىلىعى، تاۋ-كەن جانە مەتاللۋرگيا كەشەنى، ەنەرگەتيكا، كولىك-لوگيستيكا، قارجى سالالارىنداعى قارىم-قاتىناس ماسەلەلەرى تالقىلاندى.
مەملەكەت باسشىسى قاسىم-جومارت توقايەۆ بىرلەسكەن جوبالار مەن قول قويىلعان قۇجاتتاردى ساپالى جۇزەگە اسىرۋدىڭ ءمانى زور ەكەنىن اتاپ ءوتتى.
پرەزيدەنتتەر حالىقارالىق جانە وڭىرلىك كۇن تارتىبىندەگى وزەكتى ماسەلەلەر، سونىڭ ىشىندە كوپجاقتى قۇرىلىمدار اياسىنداعى ىقپالداستىق جونىندە پىكىر الماستى.
كەزدەسۋ سوڭىندا موڭعوليا پرەزيدەنتى مەملەكەت باسشىسىنا 60 مىڭنان استام ءسوز ەنگەن قازاق-موڭعول سوزدىگىن سىيعا تارتتى.
