قازاقستاندا ءموبيلدى ينتەرنەت تاريفتەرىنىڭ قىمباتتاۋى قوعامدا جاڭا نارازىلىق تولقىنىن تۋعىزدى. بۇل جولى ماسەلەنى اشىق تۇردە كوتەرگەن — ازامات ۋسمان اسانوۆ، دەپ حابارلايدى Dalanews.kz.
ول GosRating.com پلاتفورماسىندا ۇيالى ينتەرنەت باعاسىن تومەندەتۋ جانە بايلانىس نارىعىنا مەملەكەتتىك باعا رەتتەۋىن ەنگىزۋ تۋرالى پەتيسيا باستادى. ونىڭ ايتۋىنشا، قولجەتىمدى ينتەرنەت – بۇل جاي عانا قىزمەت ەمەس، ازاماتتاردىڭ بازالىق قۇقىعى.
بۇل باستاما – سوڭعى جىلدارى قازاقستاندىقتار اراسىندا كۇشەيىپ كەلە جاتقان سيفرلىق تەڭسىزدىككە قارسى نارازىلىقتىڭ ءبىر كورىنىسى.
قازاقستاندا ءموبيلدى ينتەرنەت فورمالدى تۇردە «باسەكەلى نارىق» دەپ سانالادى. ءبىراق ءىس جۇزىندە نارىق ءۇش ءىرى وپەراتوردىڭ قولىندا. تاريفتەر جىل سايىن ءوسىپ وتىر، ال ساپا مەن قامتۋ ايتارلىقتاي جاقسارمايدى. اسىرەسە وڭىرلەردە ينتەرنەت جىلدامدىعى تومەن، ال باعاسى ءىرى قالالارمەن بىردەي.
