مىندەتتى مەكتەپ فورماسىنا قارسى پەتيسيا ءبىر اپتانىڭ ىشىندە 143 مىڭنان استام قول جيناپ، وعان قارسى شىققاندار سانى نەبارى 6 مىڭنىڭ توڭىرەگىندە بولدى، دەپ حابارلايدى Dalanews.kz.
پەتيسيا اۆتورلارىنىڭ ەسەبىنشە، ءبىرىنشى سىنىپ وقۋشىسىنا ەڭ قاراپايىم وقۋ فورماسىن دايىنداۋ ءۇشىن كەمى 80–100 مىڭ تەڭگە قاجەت. بۇل ورتاشا جالاقىنىڭ ۇشتەن ءبىرى. ال تابىسى تومەن نەمەسە كوپبالالى وتباسىلار ءۇشىن بۇل قولجەتپەس سوما، سوندىقتان ولار كەيدە نەسيە الۋعا، كەيدە ەڭ قاجەت دۇنيەدەن ۇنەمدەۋگە ءماجبۇر.
بۇل ماسەلەگە قوعام قايراتكەرلەرى دە نازار اۋداردى.
"مەنىڭ سەگىز بالام بار، ونىڭ بەسەۋى مەكتەپكە بارادى. بالالاردى ءوزىم كيىندىرەمىن. تۇراقتى تابىسىم بولماسا دا، قاتارلارىنان قالدىرماۋعا تىرىسامىن. مەملەكەت كومەكتەسەدى، ءبىراق ءار ساتىپ العان زاتقا تۇبىرتەك سۇرايدى. ال بازاردا ونى كىم بەرەدى؟ بۋتيكتە ءبىر بالانى كيىندىرۋدىڭ ءوزى 150–200 مىڭ تەڭگە تۇرادى. بالالاردى مەكتەپكە دايىنداۋ — مەن ءۇشىن ۇلكەن سىناق. باعا شارىقتاپ كەتتى، ءبارى قىمبات"، – دەدى اكتەر ەرجان جامانكۇلوۆ NEGE تىلشىسىنە بەرگەن سۇحباتىندا.
ايتا كەتەيىك، بۇعان دەيىن اتا-انالار مەكتەپ فورماسىن الىپ تاستاۋ تۋرالى پەتيسياعا قول جيناعان ەدى. بۇل تۋرالى "كتك"تەلەارناسى مالىمدەدى.
ەكى بالانىڭ اناسى ءاليا تۇياقبايەۆا مەكتەپ فورماسى قىمباتتاعانىنا قاپالى. ونىڭ سوزىنشە، بالالارى وقيتىن مەكتەپتىڭ اكىمشىلىگى اتا-انالارعا فورمانى تەك بەلگىلى ءبىر دۇكەننەن الۋدى مىندەتتەگەن. باعاسى دا قالتاعا ايتارلىقتاي سالماق سالادى. بيىل ۇلى مەن قىزىن تولىق كيىندىرۋگە 130 مىڭ تەڭگەدەن اسا قاراجات جۇمساعان.
"اياق كيىم مەن جەيدەنى قوسپاعاندا، ەكى بالاعا فورماعا 130 مىڭ تەڭگە جۇمسادىم. ۇل بالاعا جيلەت، شالبار، كوستيۋم، قىز بالاعا بەلدەمشە، سارافان جانە شالبار الدىق. مەكتەپ باسشىلىعى ءبارىن بەلگىلى ءبىر دۇكەننەن ساتىپ الۋدى مىندەتتەدى. وقۋ جىلىنىڭ سوڭىندا جينالىس وتكىزىپ، الدىن الا دايىندالۋ كەرەك ەكەنىن ايتتى جانە كىرەبەرىستەگى تاقتاعا كەلەسى جىلعى فورما ۇلگىسىن ءىلىپ قويدى. مەنىڭ ويىمشا، ەركىن ستيلدەگى فورما قاجەت ەمەس، تەك ءتۇسىن بەلگىلەۋ جەتكىلىكتى"، - دەيدى ول.
تەلەارنا مالىمەتىنشە، الماتى دۇكەندەرىندە قىزدارعا ارنالعان جەيدە مەن ۇلدارعا ارنالعان جەيدەنىڭ باعاسى 5 مىڭ تەڭگەدەن باستالادى. ال تولىق جيىنتىق - كوستيۋم مەن جەيدە نەمەسە بەلدەمشە مەن جەيدە اتا-انالارعا ورتا ەسەپپەن 35 مىڭ تەڭگەگە شىعادى ەكەن.
ساتۋشىلاردىڭ ايتۋىنشا، جىل سايىن مەكتەپ فورماسىنىڭ قۇنى شامامەن 10-15 پايىزعا قىمباتتايدى. كەيبىر اتا-انالار مەكتەپ فورماسى قىمبات بولعاندىقتان، ونى مىندەتتى ەتپەۋ كەرەك دەپ سانايدى. ءارى بالانىڭ ۇلگەرىمى ونىڭ ۇستىندەگى كيىمىنە بايلانىستى ەمەس ەكەنىنە سەنىمدى. سوندىقتان ولار قول جيناپ جاتىر. ازىرگە پەتيسيا 156 عانا قول جيناپتى.
ءقازىر ءبىرقاتار جەكەمەنشىك مەكتەپ وزدەرىنىڭ ارنايى فورماسىن ەنگىزسە، مەملەكەتتىك ءبىلىم وردالارىندا عانا ءبىرىڭعاي ۇلگى ساقتالىپ وتىر. الايدا ساۋداگەرلەردىڭ ايتۋىنشا، بۇل جاعداي ساتىلىمعا ايتارلىقتاي اسەر ەتكەن جوق. ويتكەنى فورما مىندەتتى بولعاندىقتان، اتا-انالار ءبارىبىر ساتىپ الۋعا ءماجبۇر.
جاۋاپتى مينيسترلىك تە ءاربىر وقۋشى مىندەتتى مەكتەپ فورماسىن كيۋگە ءتيىس دەپ سانايدى. ولاردىڭ پىكىرىنشە، بىركەلكى كيىم ۇلگىسى وقۋ ورنىندا ءتارتىپ پەن ىسكەرلىك اتموسفەرانى قالىپتاستىرىپ، بالالاردىڭ نازارىن ءبىلىم الۋعا اۋدارادى.
