تۇركىستان قالاسىنداعى «دوستىق ءۇيى» عيماراتىندا رەسپۋبليكا كۇنى ۇلتتىق مەرەكەسىنە وراي ەتنوس جاستارى اراسىندا قازاقستان حالقى اسسامبلەياسىنىڭ «مىڭ بالا» رەسپۋبليكالىق مادەني-اعارتۋشىلىق جوباسىنىڭ وبلىستىق كەزەڭى ءوتتى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

اتالعان بايقاۋ تۇركىستان وبلىستىق قوعامدىق دامۋ باسقارماسىنىڭ «قوعامدىق كەلىسىم» كمم-نىڭ قولداۋىمەن ۇيىمداستىرىلدى.

اشىلۋ سالتاناتىندا ءسوز العان وبلىستىق قوعامدىق دامۋ باسقارماسى «قوعامدىق كەلىسىم» كمم-نىڭ باسشىسى ەلميرا جانعازييەۆا بايقاۋدىڭ قازاقستاندىق بىرەگەيلىك پەن بىرلىكتى نىعايتۋداعى رولىنە توقتالىپ، قاتىسۋشىلارعا ساتتىلىك تىلەدى.

جىل باسىنان بەرى باستاۋ العان «مىڭ بالا» مادەني-اعارتۋشىلىق  جوباسى  اۋدان، قالالاردا 7 نوميناسيا بويىنشا وتكىزىلدى. اتالعان بايقاۋدىڭ 5 سايىسى بويىنشا ۇزدىك شىققان جەڭىمپازدار بۇگىنگى شارادا ماراپاتتالدى. سونداي-اق 2 بايقاۋ  بويىنشا ۇمىتكەرلەر وبلىستىق كەزەڭدە ب ا ق سىناستى.

جاس تالانتتاردىڭ شەبەرلىگىن شىڭداعان بايقاۋعا ءوز سالاسىنىڭ بىلگىرلەرى، مادەنيەت، ونەر سالاسىنىڭ مايتالمان ماماندارى قازىلىق ەتتى. ءادىلقازىلار مۇشەلەرى قاتىسۋشىلاردىڭ سويلەۋ مانەرىنە، ءماتىننىڭ بەينەلىك جۇيەسى مەن مازمۇندىق قۇرىلىمىنا، اكتەرلىك شەبەرلىگىنە، تاڭداپ الىنعان شىعارمانىڭ ەرەكشەلىگىنە ءمان بەردى.

بايقاۋدا قازىلار قاتارىندا تۇركىستان وبلىسى قوعامدىق دامۋ باسقارماسى «قوعامدىق كەلىسىم» كمم-نىڭ باسشىسى ەلميرا جانعازييەۆا، قازاقستان جاستار وداعى سىيلىعىنىڭ لاۋرەاتى، ق ر مادەنيەت قايراتكەرى، قازاقستان كومپوزيتورلار وداعىنىڭ مۇشەسى، انشى-كومپازيتور ساۋرانبەك ەلەۋوۆ، قوجا احمەت ياساۋي اتىنداعى ءحقتۋ-نىڭ «ورىنداۋشىلىق ونەر» كافەدراسىنىڭ اعا وقىتۋشىسى، ق ر مادەنيەت قايراتكەرى، كومپازيتور ءالىمباي بوتاقارايەۆ، قوجا احمەت ياساۋي اتىنداعى ءحقتۋ-نىڭ «ورىنداۋشىلىق ونەر» كافەدراسىنىڭ اعا وقىتۋشىسى، ق ر مادەنيەت سالاسىنىڭ ۇزدىگى اياكوز ياكۋب جانە وبلىستىق قوعامدىق دامۋ باسقارماسى قحا حاتشىلىعى جانە ەتنوسارالىق قاتىناستاردى دامىتۋ ءبولىمىنىڭ مامانى مادينا كامەدەنوۆا تورەلىك ەتتى.

بايقاۋ قورىتىندىسى بويىنشا «جارقىرا، جاس دارىن» بايقاۋىندا كەنتاۋلىق ۆەنەرا راسۋلوۆا توپ جارسا، ءىى ورىندى تولەبيلىك مارجونا رافيكجانوۆا، ءىىى ورىندى تۇلكىباستىق اعجا اگالى يەلەندى.  ال «ونەرلى ورگە جۇزەر» بايقاۋىندا ونەر كورسەتكەن ماقتاارالدىق لابور يبادۋللايەۆا جەڭىمپاز اتانىپ، رەسپۋبليكالىق بايقاۋعا جولداما الدى. بۇل سىندا ساۋراندىق شاحزود رۋستامحان ءىى ورىنعا، تۇلكىباستىق گۋلنازا ميرحاميتوۆا ءىىى ورىنعا لايىق دەپ تانىلدى.

جەڭىمپازدار مەن جۇلدەگەرلەر تۇركىستان وبلىستىق قوعامدىق دامۋ باسقارماسىنىڭ باسشىسى ەرلان كۇزەمبايەۆتىڭ اتىنان العىس حاتتارمەن جانە قارجىلاي سىيلىقتارمەن ماراپاتتالدى.