* * *
بالا كۇنىمدە «جۇلدىزدىق اۋرۋىمەن» اۋىردىم-اۋ دەيمىن. وتكەن كۇندەردە بالالىق تا، شالالىق تا بولدى. ال ءقازىر «جۇلدىز» بولۋ، ەركەلىك كورسەتۋ دەگەن قاسيەتتەردەن اۋلاقپىن.
* * *
كەيبىر جۋرناليستەرگە وكپەم بار، ارينە. ويتكەنى ايتقان نارسەڭدى بۇرمالايدى.
ءومىردىڭ ءار بەلەسىنەن ءوتىپ، بيىككە كوتەرىلۋ ءبىر باسقا دا، سول بيىكتە تۇراقتاپ قالۋ – ءبىر باسقا. ەكىنشىسىنىڭ سالماعى اۋىرلاۋ…
* * *
كىشكەنتايىمنان ءار ءتۇرلى ونەر يەلەرىمەن ارالاستىم، ەل كوردىم، جەر كوردىم. ءبىر سوزبەن ايتقاندا، بالالىق شاعىما ايتار شاعىمىم جوق، وتە قىزىقتى ءوتتى.
باسىمىزدان شۋاقتى دا، قيىن-قىستاۋ كۇندەر دە ءوتتى. حالىق بارىنەن حاباردار. ءبىز اۋىرساق، بىرگە اۋىردى…
* * *
مەن قالادامىن، اكە-شەشەم الماتىنىڭ ىرگەسىندەگى «جاڭا تۇرمىس» دەگەن اۋىلدا تۇرادى. سەبەبى، مەن ءىس-ساپاردا ءجيى بولامىن. بالا كەزىمنەن بولەك تۇرىپ، ءوز بەتىمشە ءومىر سۇرۋگە ۇيرەنگەنمىن. 1989 جىلى الماتىعا ءبىرجولاتا كوشىپ كەلدىم دەسەم دە بولادى.
* * *
بولدىم-تولدىم دەپ ماساتتانۋدان اۋلاقپىز، قازاق ەستراداسىنىڭ ارداگەرى «دوس-مۇقاسان» ءالى دە قازاقتى اسەم اندەرىمەن تامساندىرىپ، 45 جىلدىعىن تويلاپ جاتسا، «تاراز» تريوسى دا ساحنانىڭ تورىنەن ءان شىرقاپ جاتسا، التىنبەك قورازبايەۆ دومبىراسىن كۇمبىرلەتىپ، قوڭىر داۋسىمان ءان تەربەپ تۇرسا، ءبىزدىڭ دەمالۋعا حاقىمىز جوق.
* * *
ونەر – مەنى جاستايىمنان قايىسپاۋعا، مۇقالماۋعا ۇيرەتتى.
* * *
ساناتورييگە جاتقاندا مىندەتتى تۇردە تەلەفون، ينتەرنەتتى وشىرەم دە، ادەبي كىتاپ وقيمىن.
* * *
كەي كەزدەرى حالقىمىز ءبىزدى ماقتاعاندا دا اسىرا سىلتەپ جاتادى، مۇنى ءبىز ولاردىڭ ماحابباتى دەپ بىلەمىز. حالىقتىڭ ماحابباتىنا بولەنگەن ءبىز باقىتتى انشىلەرمىز.
* * *
كۇندە ءسىز بەن ءبىز ەستىپ جۇرگەن، ەلىندە بايىپ الىپ، ءومىر ءسۇرۋ ءۇشىن شەتەلگە تايىپ تۇراتىن ازاماتتار باردا، ەلجاندىلىق جوق.
* * *
اقىن دوستارىم بار، ولارمەن بىرگە ءجۇرىپ، وزىڭنەن-وزىڭ اقىن بولىپ كەتەسىڭ كەيدە… از-ماز جازىپ كوردىم، ءبىراق ءبارىبىر اقىن بولۋ ءۇشىن قۇدايدان بەرىلگەن تالانت بولۋ كەرەك. مەنىكى – اۋەسقويلىق.
* * *
قاراپايىم حالىق مۇددەسىن ويلاپ جاتقان ەشكىم جوق. بيلىك باسىنداعىلاردىڭ باسىم كوپشىلىگى قازاق ءتىلىن بىلمەيدى. ءوز ءتىلىن بىلمەگەندەردەن نە ءۇمىت، نە قايىر بولادى؟
* * *
دەپۋتات بولماي-اق، كەز كەلگەن قاراپايىم ادام ۇلتى ءۇشىن جانى اشۋى ءتيىس. پاتريوت بولۋ ءۇشىن دەپۋتات بولۋدىڭ قاجەتى جوق.
* * *
ءومىر بويى ءان ايتىپ جۇرەمىن دەپ ويلامايمىن. كەلەر كۇننىڭ نە ازىرلەپ تۇرعانى ءبىر قۇدايعا عانا ايان. سوندىقتان، جاس كەلە ەستافەتا تاياقشاسىن جاس انشىلەرگە ۇستاتاتىن بولارمىز.
* * *
ازىرگە ءان ايتۋعا قابىلەتىم جەتىپ تۇرعاندا، كوپ نارسەنى حالىققا انمەن عانا جەتكىزگىم كەلەدى.
* * *
تانىمال بولۋدى ماقسات تۇتىپ، نە بولسا سونىمەن اينالىسۋ – لاس تىرلىك.
قىزىما «كىمنىڭ قىزىسىڭ؟» دەسەڭ، «اكەمنىڭ قىزىمىن» دەيدى. «اكەڭنىڭ قانداي قىزىسىڭ؟» دەسەڭ، «ەڭ ءتاتتى قىزىمىن» دەيدى.
* * *
قازىرگى قازاق ەستراداسىندا مەنەن دە مىقتى جاقسى انشىلەر بار دەپ ويلايمىن.
ءلاج بولسا، تەك جاقسى جاعىمنان تانىلعىم كەلەدى. ويتكەنى، مەن دە اتا-انانىڭ ۇلىمىن، قارىنداستىڭ اعاسىمىن، بالانىڭ اكەسىمىن…
دەرەككوزى: el.kz
