كسرو اتوم جوباسى اياسىندا قۇرىلعان ءۇمز ەلىمىزدىڭ يادرولىق يندۋسترياسىنداعى العاشقىلاردىڭ بىرىنە اينالدى. ىزىنشە بەريلليي، تانتال جانە ۋران ونىمدەرىن شىعاراتىن وندىرىستەر ورىندارى بىرىنەن سوڭ ءبىرى اشىلدى. ءۇمز-دا جۇمىس ىستەۋ ءۇشىن بەدەلدى جوعارعى وقۋ ورىندارى وزدەرىنىڭ ۇزدىك تۇلەكتەرىن اتتاندىردى. ۇلبىلىكتەردىڭ كوپ ساندى ۇجىمى العا ۇمتىلىپ، ءوندىرىستى جەتىلدىردى، ءونىمنىڭ جاڭا تۇرلەرىن مەڭگەردى.
بۇگىندە ءۇلبى مەتاللۋرگيالىق زاۋىتى – ونىمدەرى الەمنىڭ كوپتەگەن ەلدەرىنە تانىمال بىرەگەي كاسىپورىن. زاۋىت مەرەيتويعا ورىندالعان وندىرىستىك جوسپارلارىمەن كەلىپ وتىر. ۋران وندىرىسىندە تابيعي ۋراننىڭ حيميالىق كونسەنتراتتارىن وڭدەۋ كولەمى ۇلعايدى. وتىن تابلەتكالارىنىڭ پارتياسى ازىرلەنىپ، قىتايلىق تاپسىرىس بەرۋشىلەرگە جونەلتىلدى. بەريلليي وندىرىسىندە اليۋمينيي-بەريلليي ليگاتۋرالارىن شىعارۋ ارتا ءتۇستى. جاقىن بولاشاقتا ءونىمنىڭ جاڭا ءتۇرى – تۇيىرشەك تۇردەگى مىس-بەريلليي قورىتپاسى جۇڭگو نارىعىنا شىعارىلماق. تانتال ءوندىرىسى مەتاللۋرگيالىق سۇرىپتاعى تانتال ۇنتاعىن امەريكالىق تاپسىرىس بەرۋشىلەرگە جەتكىزە باستادى. يتترييمەن موديفيكاسيالانعان تانتال جانە نيوبيي تاسپالارىن ءوندىرۋ تەحنولوگياسى ازىرلەنىپ، ولاردى شەتەلدىك سەرىكتەستەرگە كوممەرسيالىق جەتكىزىپ بەرۋلەر جولعا قويىلعان. جوعارى وتكىزگىشتىك سۇرىپتاعى تازالىققا يە نيوبيي قۇيمالارىن ءوندىرۋ تەحنولوگياسى ازىرلەنىپ، ول سىناقتان ءساتتى وتكىزىلدى.
تانتال ءوندىرىسى قىزمەتكەرلەرىنىڭ رەسپۋبليكالىق «راسيوناليزاتور.kz» بايقاۋىنان تابىسپەن ورالعانى دا زاۋىت مەرەيتويىنا لايىقتى تارتۋ بولدى. زاۋىت جاڭاشىلدارى «جىلدىڭ ۇزدىك ونەرتاپقىشتىق شەشىمى» اتالىمىندا ەكىنشى ورىندى يەلەدى. بۇعان دەيىن دە، 2011 جىلى «ءۇمز» اق وسى بايقاۋدىڭ «كاسىپورىندا ونەرتاپقىشتىقتى قولداۋدىڭ ۇزدىك جۇيەسى» اتالىمىندا جەڭىمپاز اتانعان بولاتىن.
ءۇمز ۇجىمىن مەرەيتويمەن قۇتتىقتاعان «قازاتومونەركاسىپ» ۇاك» اق باسقارما ءتوراعاسى نۇرلان قاپپاروۆ ەلىمىزدىڭ يادرولىق سالاسى الدىندا تۇرعان جاۋاپتى مىندەتتەردى شەشۋدەگى كاسىپورىن رولىنە توقتالدى.
– قازاتومونەركاسىپ قۇرامىندا جۇمىس جۇرگىزەتىن كاسىپورىنعا قازىرگى تاڭدا يادرولىق وتىن سيكلىنداعى بۋىنداردىڭ بارىنشا كوپ سانىنا يە كومپانيا قۇرۋداي ماڭىزدى مىندەت جۇكتەلگەن. ءۇمز جوعارعى تەحنولوگيالىق ۋران، تانتال جانە بەريلليي ونىمدەرىمەن حالىقارالىق نارىقتا قازاقستان اتىن لايىقتى تانىتىپ كەلەدى. بۇل ءىستىڭ بارلىعى كوپ ءبىلىم مەن تاجىريبەنى، تەرەڭ بىلىكتىلىكتى تالاپ ەتەرى انىق، مۇنىڭ ءبارى ۇلبىلىكتەردە بار ەكەنى كۇمان تۋعىزبايدى.
زاۋىت ارداگەرلەرى مەن قىزمەتكەرلەرىنە قاراتا سويلەگەن «ءۇمز» اق باسقارما ءتوراعاسى يۋريي شاحۆوروستوۆ:
– ۇلبىلىكتەر ەڭبەكتە ابدەن شىنىققان، قيىندىقتاردان تايساقتامايدى – ارداگەرلەرگە ءتان وسى قاسيەتتەر جاڭا ەكونوميكالىق جاعدايلاردا زاۋىتتىقتاردىڭ قازىرگى بۋىنىنا دا ءوز سوقپاقتارىن سالۋعا كوپ كومەگىن تيگىزۋدە. كاسىپورىن ءونىمنىڭ جوعارى ساپاسىن ساقتاي جانە ونىڭ تىزبەكتەمەسىن كەڭەيتە وتىرىپ، ۇزاق مەرزىمدى جوبالاردى دايەكتىلىكپەن ىسكە اسىرىپ كەلەدى.
ءۇمز-دا ءار جىلى زاۋىتتىڭ تۋعان كۇنى قارساڭىندا وندىرىستىك جانە شىعارماشىلىق ەڭبەگىمەن ورتاق ىسكە ەلەۋلى ۇلەسىن قوسقاندارعا ايرىقشا قۇرمەت كورسەتىلەدى. بيىل ۋران ءوندىرىسىنىڭ سلەسار-جوندەۋشىسى قايدار نۇرعالييەۆ پەن تانتال ءوندىرىسىنىڭ اپپاراتشىسى ورازالى جەتەنوۆتىڭ ەسىمدەرى زاۋىتتىڭ قۇرمەت كىتابىنا جازىلدى. «زاۋىت ارداگەرى» قۇرمەتتى اتاعىن لايىقتى 20 قىزمەتكەر الدى. 10 قىزمەتكەر قۇرمەت گراموتاسىمەن ماراپاتتالىپ، تاعى 57-سىنە العىس جاريالاندى. سونىمەن قاتار، بارلىق قىزمەتكەرلەرگە اقشالاي سىيلىق بەرىلدى.
مەرەيتوي قۇرمەتىنە ءۇمز-دا سالتاناتتى ءىس-شارالار جوسپارلانعان. زاۋىتتىڭ داڭقتى ديرەكتورى ۆ.پ. پوتانين جانە كسرو ورتا ماشينا جاساۋ ءمينيسترى ە.پ. سلاۆسكيي ەسكەرتكىشتەرىنە، ۆ.ف. كونوۆالوۆتىڭ مەموريالدىق تاقتاسىنا گۇل شوقتارى قويىلادى. «ءۇمز» اق باسقارما ءتوراعاسى «ULBA» مادەنيەت سارايىندا جاقىن شەتەلدەردەن كەلگەن قوناقتار مەن زاۋىت ارداگەرلەرىنە ارناپ، رەسمي قابىلداۋ وتكىزەدى.
مەرەكەلىك باعدارلاما «ULBA» ومس-دا وتكىزىلەتىن كونسەرتپەن جالعاسادى. وعان وسكەمەن قالاسىنىڭ تانىمال ونەر ۇجىمدارى جانە ورىنداۋشىلارىمەن قاتار، زاۋىت قىزمەتكەرلەرى دە قاتىسادى.
«ءۇمز» اق باسپا ءسوز قىزمەتى
