ءماجىلىس دەپۋتاتى مۇرات ابەنوۆ مەملەكەتتىك تەلەارنالاردا قالىڭدىقتى الىپ قاشۋدى ناسيحاتتايتىن ماتەريالداردىڭ شىعۋىن سىنعا الدى، دەپ حابارلايدى Dalanews.kz.
“جۋىردا مەملەكەتتىك ارنالاردىڭ بىرىنەن جىگىتتىڭ: “ەگەر كەلىسىم بەرمەسەڭ، سەنى الىپ قاشامىن” دەگەن ءسوزىن ەستىدىم. بۇل — ايەلدەردىڭ قۇقىقتارىن ورەسكەل بۇزۋدى اشىق تۇردە ناسيحاتتاۋ. مەملەكەتتىك تەلەارنادا مۇنداي دۇنيەلەردىڭ ەفيرگە شىعۋى مەنى قاتتى قىنجىلتتى”، — دەدى دەپۋتات.
سونداي-اق ول “ءداستۇر” دەگەن جەلەۋمەن قىزدى كۇشتەپ الىپ قاشۋ نەمەسە ەركىنەن تىس ۇيدە ۇستاۋ قىلمىس ەكەنىن اتاپ ءوتتى. ابەنوۆتىڭ سوزىنشە، مۇنداي ارەكەتكە قاتىسى بار ادامداردىڭ ءبارى زاڭ الدىندا جاۋاپ بەرۋى كەرەك.
ەسكە سالايىق، 2025 جىلدىڭ 16 قىركۇيەگىنەن باستاپ قازاقستاندا ستالكينگ ءۇشىن قىلمىستىق جاۋاپكەرشىلىك قاراستىرىلعان جاڭا زاڭ كۇشىنە ەندى. بۇل- ەلىمىزدەگى قۇقىقتىق جۇيەدە ۇلكەن جاڭالىق جانە قوعام ءۇشىن اسا وزەكتى قادام.
قىلمىستىق كودەكستىڭ 115-1- بابىنا سايكەس، ستالكينگ جاساعان ادامعا كەلەسى جازالار قاراستىرىلعان:
- 200 ايلىق ەسەپتىك كورسەتكىشكە دەيىن (2025 جىلى شامامەن 786 400 تەڭگە) ايىپپۇل،
- 200 ساعاتقا دەيىن قوعامدىق جۇمىستارعا تارتۋ،
- نەمەسە 50 تاۋلىككە دەيىنگى مەرزىمگە قاماۋ.
بۇل تۇزەتۋلەر پرەزيدەنت قاسىم- جومارت توقايەۆتىڭ باستاماسىمەن قابىلدانعان قىلمىستىق زاڭنامانى وڭتايلاندىرۋعا باعىتتالعان وزگەرىستەردىڭ ءبىر بولىگى. بۇعان دەيىن قازاقستان زاڭناماسىندا ستالكينگكە ارنايى باپ قاراستىرىلماعان ەدى. ەندى مۇنداي ارەكەتتەر ناقتى سيپاتتالىپ، ولارعا قارسى ناقتى شارالار قابىلداناتىن بولدى.
