ۇلكەن كومپانيالار تەندەر ارقىلى وتاندىق ءونىم دەپ كورسەتىپ، ءبىراق قىتايدىڭ ءونىمىن ارزان باعاعا الىپ كەلىپ، ەمبلەماسىن اۋىستىرىپ، مەملەكەتتى الداپ وتىر. مۇنداي كۇماندى سحەمالارعا قۇزىرلى ورگاندار نەگە كوز جۇما قاراپ وتىرعانىن نەگە كورسەتپەي وتىرعانىن الداعى ۋاقىتتارى بىلەتىن بولامىز. 

ايگۇل ورىنبەك وسى ماسەلەگە قاتىستى جاساعان زەرتتەۋىن كورسەتتى. 

"سامۇرىق-قازىنا" اق سايتىن اشامىز. ءبىرىنشى كوزگە تۇسكەن لوت قازاقستان تەمىر جولى ۇلتتىق كومپانياسىنىڭ ساتىپ الۋى. الىپ كومپانيا ەلىمىزدىڭ سەگىز وڭىرىنە جالپى سوماسى 185 024 000 تەڭگەگە اشىق كونكۋرس جاريالاعان. ناقتى ايتار بولساق 18 دانا جىلجىمالى ەلەكترستانسياسىن، قاراپايىم تىلدە ايتقاندا گەنەراتور ساتىپ الماق بولعان.مۇنداعى باستى تالاپ بەلگىلى ءبىر برەندتى، ياعني Ameco industrial-دى جەتكىزۋ كەرەك. وسى تۇستا ماسەلە تۋىندايدى"، - دەيدى ايگۇل ورىنبەك. 

تەندەر شارتىنا ساي تاۋار وتاندىق ءونىم بولۋى كەرەك.

"سەبەبى ەلىمىزدە وتاندىق وندىرۋشىگە ارتىقشىلىق بەرىلەدى. كونكۋرسقا قاتىسۋشى كومپانيالاردىڭ ءوندىرۋشى ورىندارىن ىزدەگەن ولار ەشقانداي زاۋىت ەمەس، جاي عانا تۇرعىن ءۇي پاتەردە تىركەلگەن. ال جاي پاتەردە گەنەراتور وندىرىلمەيتىنى ءمالىم"، - دەيدى زاڭگەر. 

ونىڭ سوزىنشە، وسىنداي ءتاسىل ارقىلى بەلگىلى ءبىر كومپانيالار قىتايدان ءارقايسى 200-300 مىڭ تەڭگە تۇراتىن گەنەراتورلاردى الىپ كەلىپ، قازاقستاندا قۇراستىرىلعان دەپ كورسەتىپ، مەملەكەتكە 1،5 ميلليون تەڭگەگە وتكىزىپ وتىرعان. 

"مىسالى قازاقستان تەمىر جولى ءبىر گەنەراتوردى 1 516 000 تەڭگەگە كونكۋرسقا شىعارعان. اشىق دەرەكتەردە وسى سومما بويىنشا 55 ميلليون تەڭگە جەتكىزۋشىگە الدىن الا تولەم رەتىندە اۋدارىلىپ كەتكەنى كورسەتىلگەن. بۇل تاۋاردىڭ باعاسى باسقا سايتتاردا  359 000 تەڭگە، ال تاعى ءبىر باسقا سايتتا 200 مىڭ تەڭگە شاماسىندا تۇر. ءبىر گەنەراتوردى بىرنەشە ەسە جوعارى كورسەتىپ، ساتىپ الىپ وتىرسا، ۇلتتىق كومپانيالار مەملەكەتتىك اشىق توناپ وتىر دەگەن ءسوز ەمەس پە؟ بۇل ءبىر عانا مىسال"، - دەيدى ايگۇل ورىنبەك.

زاڭگەر ۇلتتىق كومپانيالاردىڭ ىشىندە الدىن الا كەلىسىپ العان تەندەرلەر ءجۇرىپ جاتقانىن ايتتى. 

"ال تەندەرگە قاتىسىپ جۇرگەن دەلدال كومپانيالار ناقتى تاۋار ءوندىرۋشى ەمەس، جاي عانا ۇستىنەن پايدا كورىپ وتىرعان بيزنەس قۇرىلىمدار. ولار ءونىمنىڭ وتاندىق ەكەنىن دالەلدەيتىن قاعازىن رەتتەپ الىپ، مەملەكەتتىك ساتىپ الۋدا سىبايلاستارى ارقىلى جەڭىسكە جەتىپ وتىرادى. ەڭ قيىنى بۇلاردى ەشكىم تەكسەرىپ وتىرعان جوق. نەگە شارا قولدانىلماي وتىر؟ ادىلەتتى قازاقستان دەسەك ەڭ الدىمەن جۇيەدەگى وسىنداي بىلىقتارعا ءۇڭىلۋ كەرەكپىز"، - دەيدى زاڭگەر.