سوتتىڭ باسپا ءسوز قىزمەتىنىڭ مالىمەتى بويىنشا اينا باكەيەۆا اكىمشىلىك كودەكستىڭ 434-بابىنىڭ 1-بولىگى بويىنشا ۇساق بۇزاقىلىق جاساعانى ءۇشىن كىنالى دەپ تانىلىپ، 10 تاۋلىككە قاماۋعا الىنعان. شەشىمدى ورىنداۋدى سوت شىمكەنت قالالىق پوليسيا دەپارتامەنتىنە جۇكتەدى.
ايتا كەتەيىك، بۇدان بۇرىن انتيۆاكسەر نۇر-سۇلتان قالاسىندا بالالارعا جاسىرىن ەكپە سالىناتىنى جونىندە حابار تاراتقان. باكەيەۆا باستاعان بىرنەشە ايەل مەكتەپكە رۇقساتسىز كىرىپ، تۇسىرگەن ۆيدەولارىن جەلىدە جاريالاعان ەدى. بەينەجازبا اۆتورى ءوزىن ءجۋرناليستپىن دەپ تانىستىرىپ، ال جانىنداعى سەرىگىنىڭ دارىگەر اينا باكەيەۆا ەكەنىن ايتادى.
سونىمەن قاتار كادر سىرتىنداعى داۋىستان "بالالارعا اتا-انالارىنىڭ رۇقساتىنسىز ەكپە سالىنىپ جاتقانىن" ەستۋگە بولادى.
نۇر-سۇلتان قالاسىنىڭ ءبىلىم باسقارماسى وقيعانىڭ 5 قازان كۇنى №58 مەكتەپتە بولعانىن راستاعان.
ءبىراق، ءبىلىم ورداسىندا بالالارعا ۆاكسينا سالىنادى دەگەن اقپارات شىندىققا سايكەس كەلمەيتىنىن جەتكىزدى.
"ازاماتشا اينا باكەيەۆا مەكتەپ اۋماعىندا جانجال تۋعىزدى. باكەيەۆا مەن ونىمەن بىرگە كەلگەن ادامداردىڭ باستى ماقساتى - مەكتەپتەردە بالالاردى مىندەتتى تۇردە ۆاكسيناسيالاۋ جۇرگىزىلەتىنى تۋرالى الەۋمەتتىك جەلىلەردە شۋ تۋدىرۋ بولعان. ءبىز بۇدان الدىن دا بىرنەشە رەت مۇنداي اقپاراتتىڭ جالعان ەكەنىن ايتقان بولاتىنبىز"، - دەدى ءبىلىم باسقارماسى.
ال ۆيدەوداعى وقۋشىعا كەلەتىن بولساق، دەپارتامەنت بالانىڭ ءۇزىلىس كەزىندە ءوزىن ناشار سەزىنگەندىگىن ايتتى. دەنە شىنىقتىرۋ ساباعىنان كەيىن ءجاسوسپىرىمنىڭ باسى اينالىپ، سول سەبەپتى مەديسينالىق پۋنكتكە جۇگىنگەن دەپ ءتۇسىندىردى ولار.
مەكتەپ قىزمەتكەرلەرىنىڭ ايتۋىنشا، ايەلدەر ءبىلىم بەرۋ مەكەمەسىنە اعزادا تۋبەركۋلەز ميكروباكتەرياسىنا انتيدەنەلەردىڭ بار-جوعىن انىقتاۋ ءۇشىن مانتۋ سىناماسىن تاپسىرعان ءۇشىنشى سىنىپ وقۋشىلارىنىڭ ءبىرىنىڭ اناسىنىڭ نۇسقاۋىمەن كەلگەن. ولار وزدەرىن وقۋشىنىڭ اتا-اناسىمىن دەپ تانىستىرىپ، Ashyq مارتەبەسىن تەكسەرۋ تۋرالى ءوتىنىشتى ەلەمەي، مەكتەپكە باسا-كوكتەپ كىرىپ كەتكەن.
ءبىلىم باسقارماسى مەكتەپكە كەلىپ جانجال تۋدىرعان ايەلدەردىڭ ۇستىنەن ارىز جازعان ەدى.
